1 Yesʉ aɨʉitangile awo nɨikʉmi naabɨɨlɨ naɨʉahoile, akaapa ʉhumi nʉ ʉkʉlʉ nʉa kʉahegelya ɨantʉ ahɨng’wɨ nʉ kʉaponya ɨalwae. 2 Sʉnga akaalagɨɨlya alongole kʉtanantye Ʉtemi wang’wi Itunda nʉkʉaponya ɨalwae. 3 Akaalagɨɨlya akaaɨla, "Nɨmʉlongoe ʉmʉhɨnzo leki kikenkeelyi kɨntʉ kɨhi. Leki kʉholi mʉlanga ang’wɨ mbogoshi ang’wɨ mpamba ang’wi mpia ang’wɨ ngʉo nakʉkaɨla. 4 Nyʉmba ɨhi nʉmʉkusingɨɨlɨgwa nʉkingɨla, ikɨɨ mʉmo kʉpikɨɨla kʉhʉsha nʉkʉlaga mʉkɨsalɨ nɨkanso. 5 Antʉ awo nɨakʉhita kʉmʉsɨngɨɨlya, pumi mʉnyʉmba nanso, nɨmʉkʉpuma kʉnʉnti lʉnkʉndɨ nʉlamɨgʉlʉ anyu kʉlagɨɨla kɨna ahitɨle ʉlʉkani lang’wi itunda." 6 Ʉʉgwa amanyisigwa akandya ʉmʉhɨnzo, akakɨɨla nkɨka yɨhi azetanantya Nkani Nziza nʉ kʉapangataalya alwae pɨhi nɨakɨɨe.

7 Ʉʉgwa ʉ Helode mʉtemi nʉa kʉ Galilaya naɨwija ayo naɨakʉtendeka, akahʉsha kʉnsoko antʉ ang’wɨ aɨakʉtambʉla kɨna ʉ Yohana Mʉbadisi wiʉka. 8 Ingɨ antʉ ang’wi azelʉnga kɨna Eliya wapumɨla a hangɨ, antʉ ang’wi akalʉnga kɨna ʉng’wɨ nʉa anyakɨdagʉ wang’wi Itunda nɨakali wiʉka. 9 Ingɨ ʉ Helode akalʉnga, "Yohana aɨnamʉdʉmʉla itwe namʉbʉlaga, ʉyʉ nyenyu itungo ɨlɨ nɨkija inkani yakwe?" Akahung’wa nsʉla akʉmʉona.

10 Itʉmi naɨatʉlya, akamʉganʉɨla ʉ Yesʉ makani ɨhi naɨitʉmɨle. Yesʉ akakaahola Itʉmi ikʉmi nabɨɨlɨ du, akalongola nɨenso azeipihɨɨye kʉpikɨɨla kɨsalɨ ka Betisaida. 11 Ingɨ antʉ naɨalɨnga kʉendaa akamʉtyata. Yesʉ akaasɨngɨɨlya, akaatambʉɨla nkani nia ʉtemi wang’wi Itunda, kʉnʉ wazeaponya awo naɨaloilwe.

12 Lyoa naɨlahumbeela kʉhaɨɨla, itʉmi awo nikʉmi naabɨɨlɨ akamʉtyata ʉ Yesʉ nʉkamʉɨla, "Alage ɨantʉ alongole mʉisalɨ niikʉlʉniisalɨ niinino, ende ɨdʉmilye ʉlyi nɨndalo, kʉnsoko apa nɨkʉmolɨ mʉwɨɨ kʉtilɨ anga nyʉmba."

13 Ingɨ Yesʉ akaatambʉɨla, "Mʉape nyenye indya."

Nɨenso akamʉsʉkɨɨlya, "Kɨagila indya niyakʉalisa, kʉkete mɨkate ɨtaano ni nsamaki ibɨɨlɨ du. Kwaala kende kʉagʉɨlye ndya ɨantʉ awa ɨhi?" 14 Aɨ akolɨ itʉnja magana anzogu ataano, Ingɨ Yesʉ akatambʉɨla itʉmi nɨikʉmi naabɨɨli akwe, "Ikalɨnshi ɨantʉ maanza aantʉ anga makʉmi ataano ataano itɨ."

15 Itumi nɨikʉmi naabɨɨli akatenda ʉʉ, akaikalɨnsha ɨantʉ anga naɨalagɨɨgwe. 16 Yesʉ akahola mɨkate nʉtaano ni nsamaki izi nibɨɨlɨ, akalangamɨla kilunde akamʉkʉlya Itunda, akakembeta, akaegania, sʉnga akainkɨɨlya ɨitumi nʉkʉaɨla api ɨantʉ alye. 17 Antʉ ɨhi akalya nʉkikʉta, itʉmi akahoeela ʉnyinyu naɨʉsagile akizʉlya itoto ikʉmi naɨbɨɨlɨ.

18 Lʉhikʉ lʉng’wɨ ʉ Yesʉ aɨwikomile wing’wene wahume kʉlompa, amanyisigwa akwe aɨakolɨ pakupɨ nʉng’wenso. Aɨʉakoye, "Antʉ akenda ntambʉla ʉnene nɨnyenyu?"

19 Itʉmi akwe akamʉsʉkɨɨlya, "Nɨang’wɨ akendalʉnga ʉewe wɨ Yohana Mʉbadisi, nɨang’wɨ akʉlʉnga wɨ Elia, nɨang’wɨ akʉlʉnga ʉewe ʉng’wɨ mʉamanga wang’wi Itunda nɨakalɨ wiʉkile kʉpuma kʉashi."

20 Sʉnga Yesʉ akaakolya, "Ʉnyenye mʉkʉlʉnga, ʉnene ninyenyu?"

Petelo akasʉkɨɨlya, "Ʉewe wɨ Kilisito nʉhoilwe ni Itunda."

21 Yesʉ akaagilya lʉkʉlʉ ɨitumi aleke kʉmʉɨla mʉntʉ wɨhi ʉlʉkani nʉlanso. 22 Yesʉ akatambʉɨla hangɨ kɨna, "Ng’waa Mʉntʉ ʉtakɨwe kagigwa lʉkʉlʉ nʉkʉhitwa nɨanyampala nɨatongeeli ipolyo nɨamanyisi amalagɨɨlyo ang’wa Musa ang’wa Musa. Nʉng’wenso ʉtakiwe kʉbʉlagwa, ingɨ lʉhikʉ nʉla kataatʉ ʉkiʉka."

23 Sʉnga akaatambʉɨla ɨantʉ ɨhi kɨna, "Mʉntʉ wɨhi nʉloilwe kʉntyata, ʉtakɨwe wihite ʉng’wenso, wantyate anga mʉhemba wane mahikʉ ɨhi. 24 Kʉnsoko mʉntʉ wɨhi nʉloilwe kʉgunɨɨlya likalo, ʉkʉleng’wa, ingɨ ʉyʉ nʉkihʉlya hanza kʉnsoko ane ʉkʉgunɨka. 25 Kʉnsoko ʉmʉntʉ ʉkʉlija ntʉni anga wapantɨke makani ɨhi naʉnkʉmbigʉlʉ kʉnʉ walimɨlye ʉʉpanga wakwe ʉng’wenso? 26 Anga mʉntʉ wamonele mɨnyala ʉnene nʉ ʉmanyisa wane, ingɨ Ng’wana wang’wi Itunda ʉkʉmʉhita mʉntʉ nʉanso itungo nʉzɨɨzapembya mʉʉmɨlɨgɨntu wakwe nʉʉmɨlɨgɨntu wang’wa Tata nʉʉmɨlɨgɨntu nʉa a Malaɨka. 27 Ituleʉʉ taai kʉmʉtambʉɨla, Akolɨ antʉ ang’wi papa nɨshanga akʉsha kʉpikɨɨla aʉone Ʉtemi wang’wi Itunda."

28 Naɨwakondya kʉtambʉla ɨkakɨla mahikʉ anga mʉnana itɨ, Yesʉ akaahola Petelo nʉ Yohana nʉ Yakobo akalongolania nɨenso mʉlʉgʉlʉ kenda kʉlompa. 29 Yesʉ naɨʉkʉlompa, wigeeli wikelʉ lakwe wɨkakaɨlɨka nɨngʉo akwe akatula melʉ pee akazemɨlɨgɨnta. 30 Pumpulugu akaaona antʉ abɨɨlɨ akazitambʉlya nʉng’wenso, antʉ nɨanso ingɨ aɨ Musa nʉ Eliya, 31 naɨigee mʉʉmɨlɨgintu, akazitambʉɨla nʉ Yesʉ mpola nia nsha akwe, kɨna ʉkʉbʉlagɨlwa kʉ Yelusalemu. 32 Petelo nɨaʉya aɨakɨɨlwaa tʉlo mʉlito, ingɨ naɨapɨtya lʉkʉlʉ akaʉona ʉmɨlɨgɨntu wang’wa Yesʉ nɨantʉ awo nɨabɨɨlɨ naɨimɨkanilye. 33 Ʉʉgwa antʉ awa nɨabɨɨlɨ naɨakʉhega, Petelo akamʉɨla ʉ Yesʉ, "Isekʉlʉ azaiza ʉsese kikiɨ papa. Kʉzenge itala ɨtaatʉ apaitɨ, kɨtala kɨng’wɨ kɨtule kako, kitala kɨʉya kɨtule kang’wa Musa nɨkɨʉya kɨtule kang’wa Eliya." Petelo ingɨ shanga aɨʉlɨngɨle ʉtambʉe kɨntʉ kɨɨ.

34 Petelo wakaze ʉlongolekile kʉtambʉla, lɨkapumɨla ilunde lɨkaaimba, nɨenso akogopa naɨaimbwa nilunde nɨlanso. 35 Akija lʉli kʉpumɨɨla milunde nɨlanso lʉkalʉnga, "Ʉyʉ Ng’waane nindoiigwe nʉng’wenso ninʉmʉsagʉe, mʉtegeelyi ng’wenso."

36 Lʉli ʉlʉ naɨlakondya kʉtambʉla, Akamʉona ʉ Yesʉ waze wing’wene du. Amanyisigwa awo akaɨka mʉnkolo yao, shanga akamʉɨla mʉntʉ wɨhi naɨamaine.

37 Mʉdaʉ akwe naɨahulumʉka kʉpumɨɨla mʉlʉgʉlʉ, Yesʉ akatankania niumbɨ laantʉ. 38 Miʉmbɨ nɨlanso mʉntʉ ʉng’wɨ akitʉnta, wazelʉnga, "Mʉmanyisi kʉʉlompa ʉmʉgoze ʉng’waane, ingɨ kinyene wane. 39 Kʉnsoko hɨng’wɨ wɨmʉhanga, wɨzezogolya nkʉa yɨdʉ nʉkʉgwa nkolo kʉnʉ wazepuma ipomboolu mʉmʉlomo, hɨng’wɨ ʉyʉ ingɨ wɨmaja itungo ɨlɨpu, wɨmʉlekela itungo iniino ʉdu. 40 Azenɨalompile amanyisigwa ako amʉheje ʉhɨng’wɨ, aleng’wa."

41 Yesʉ akatambʉla, "Ʉnyenye antʉ nɨmɨabɨɨ nɨmɨagila ʉhʉɨɨlɨ, nikiɨ nʉnyenye kʉpikɨɨla nalɨ, papo mʉhume kʉnihʉɨɨla?" Ʉʉgwa akamʉɨla ʉmʉntʉ nʉanso, "Mʉlete ʉng’waako apaitɨ"

42 Ʉng’wana ʉyʉ naɨʉpembilye kʉng’wa Yesʉ, hɨng’wɨ ʉyʉ akagalagaligwa pɨhi akagwankolo. Yesʉ akamʉpatya ʉhɨng’wɨ wapume, akamʉponya ʉng’wana nʉanso, akamʉsʉsha kʉng’wɨ ihe. 43 Antʉ ɨhi akakʉɨlwa naɨaʉona ʉʉkʉlʉ wang’wi Itunda.

Antʉ awo naɨalongolekile kʉkʉɨlwa ɨmakani naɨʉkʉtenda, Yesʉ akaatambʉɨla ɨamanyisigwa akwe, 44 "Tegeelyi kɨsa aya nɨkʉmʉtambʉɨla itʉngɨlɨ. Ng’wana wa Mʉntʉ ʉkʉtwalwa mʉngulu ya antʉ." 45 Amanyisigwa ang’wa Yesʉ shanga akalɨnga ɨndogoelyo a lʉkani ʉlʉ. Kʉnsoko lʉkani ʉlʉ aɨlʉpihilwe kʉng’waao aleke kʉlɨnga, akakisha kʉmʉkolenkeelya ʉlɨɨye ʉli.

46 Aɨwigee wikʉngʉmi mʉamanyisigwa ɨenso kʉ enso, ingɨ nyenyu nʉkʉtula mʉkʉlʉ kʉkɨla ɨhi. 47 Ingɨ ʉ Yesʉ akaalɨngɨlya ɨmasɨgo ao, ʉʉgwa akamʉhola mʉng’yɨnya mʉniino akamʉɨka pang’waakwe. 48 Sʉnga akaatambʉɨla, "Mʉntʉ wɨhi nʉʉkʉmʉsɨngɨɨlya ʉmʉng’yɨnya anga ʉyʉ kʉlina lane, ʉkʉtula wansɨngɨɨlya nene, hangɨ wɨhi nʉʉkʉnsɨngɨɨlya nʉnene, ʉkʉtula wamʉsɨngɨɨlya Tata nʉndagɨɨye ʉnene. Kʉnsoko ʉyʉ nɨmʉniino mʉng’waanyu ingɨ yʉyo mʉkʉlʉ kʉkɨla mɨhi."

49 Yohana akitanguzɨɨlya akatambʉla, "Isekʉlʉ, kʉmʉɨne mʉntʉ ʉng’wɨ ʉkʉtʉmɨla lina lako kʉzunsa ahɨng’wɨ, ʉsese kamʉgilya kʉnsoko nʉanso shangamɨitʉ."

50 Ingɨ ʉ Yesʉ akalʉnga, "Leki kʉmʉgilyi, ʉyʉ nɨshanga ʉkʉhutana nʉnyenye ingɨ nʉanso mɨanyu."

51 Matungo naɨahumbeela nang’wa Yesʉ kʉholwa walongole kigʉlʉ, nʉanso akitʉntʉmɨɨlya walongole kʉ Yelusalemu. 52 Ʉʉgwa akaalagɨɨlya antʉ amʉtongeele, antʉ nɨanso akatongela akingɨla mʉkɨsalɨ kɨng’wɨ nɨkakʉ Samalia amʉnɨng’anɨlɨlye makani ɨhi. 53 Ingɨ akola ihɨɨ nanso aɨahitile kʉmʉsɨngɨɨlya kʉnsoko aɨwitʉntʉmɨɨye kʉ Yelusalemu. 54 Amanyisigwa akwe ɨa Yohana nʉ Yakobo, naɨaine aya akalʉnga, "Isekʉlʉ ʉloilwe kʉlagɨɨlye moto ʉsime kʉpuma kilunde ʉalimansɨɨlye?"

55 Yesʉ akaapɨlʉkɨla akaakenela. 56 Yesʉ nɨamanyisigwa akwe akapuma akalongola kɨsalɨ kɨngɨɨza

57 Naɨakɨlɨ akolɨ mʉnzɨla mʉntʉ ʉng’wɨ akamʉtambʉɨla ʉ Yesʉ, "Kʉʉtyatiila nkɨka yɨhi kʉwinzʉ."

58 Yesʉ akamʉɨla ʉmʉntʉ ʉyʉ, "Amʉlʉla akete igaya niakipɨhɨla, ninyʉnyi ikete iiuyɨ, ingɨ Ng’waa Mʉntʉ mʉgila ndalo nʉʉsupɨlyo."

59 Yesʉ akamʉɨla mʉntʉ mʉngɨɨza, "Ntyate." Ingɨ mʉntʉ nʉanso akamʉɨla, "Isekʉlʉ ndeke hanza nende nʉmʉɨke ʉtataane."

60 Yesʉ akamʉɨla, "Aleke ɨanyakɨlɨngʉ aaɨke ɨashiao, Ʉewe longola wendetanantya Ʉtemi wang’wi Itunda."

61 Nʉmʉntʉ mʉya akamʉɨla, "Ʉnene kʉʉtyata, itungo ɨlɨ ngombye hanza nendealaga awa nɨkikalania mitolane."

62 Yesʉ akamʉɨla, "Mʉntʉ wɨhi nʉandyaa kʉlɨma kʉnʉ ʉkikeya, shanga ʉtakɨwe kitʉma Mʉʉtemi wang’wi Itunda."