Lucas 7

31 Yesʉ akalongoleka kʉtambʉla, "Antʉ awileli ʉwʉ nɨimpyanie nɨ ntʉni? Itɨɨ, impyani nɨ ntʉni? 32 Impyani nɨang’ɨnya nɨakolɨ pigalagalo. Nɨakikʉtɨɨlya enso, ‘Kʉkʉile impɨlɨmbɨ ʉnyenye shanga maina. Kɨmbile ɨmɨmbo asʉka, ʉnyenye shanga malɨla.’

33 Kʉnsoko ʉ Yohana mʉbadisi aɨʉzile aɨwɨgwalya kʉlya ang’wɨ kʉng’wa dibai, ‘Ʉnyenye mɨkalʉnga. ‘Ʉkete hɨng’wɨ.’ 34 Ng’wana wang’wa Adamu waza ʉkʉlya nʉkʉng’wa nʉnyenye malʉnga, ‘Mʉoni mʉntʉ ʉyʉ mʉlakʉ hangɨ wɨgala, mʉhumbaʉya waa ahangʉlwa kodi nɨanyamɨlandʉ.’ 35 Nɨitɨga ɨmahala ang’wi Itunda akamɨnkɨigwe kɨna atai kʉ awo nɨamagombile."

Yesʉ ʉkʉpʉgʉhɨlwa makuta nʉ mʉsʉngʉ nɨ mʉnyamɨlandʉ

36 Lʉhikʉ lʉng’wɨ mpɨndɨ Palisayo ʉng’wɨ akamʉlompa ʉ Yesʉ alɨzanie indya kitolakwe, ʉʉgwa ʉ Yesʉ akalongolania nʉ Palisayo ʉyʉ akalama pihɨ mʉkɨpalatʉ walye indya. 37 Mʉkɨsalɨ nɨkanso aɨʉkolɨ mʉsʉngʉ ʉng’wɨ mʉnyamɨlandʉ. Naɨwigulye Yesʉ ʉkʉlya ndya mʉnyʉmba ang’wa Palisayo, akapembya nɨ kɨhongolo kizʉe makuta amanyunkɨɨlo,