1 Kʉtambʉla tai ntilɨ mʉng’wa Kilisito, shanga kʉtambʉʉla ʉteele. Ng’wahʉ Ng’welʉ nʉtongilwe nkolo ane ʉlɨngile kɨna kʉtambʉla tai, 2 kʉhiya nʉnge itɨ, nkete ʉkɨa ʉkʉlʉ nʉ ʉwai nʉʉkʉawa mʉnkolo ane, 3 Anga ɨze ikani ɨlɨ lɨkʉaaɨɨlya, azangombile nzung’we nʉ kʉkong’wa nʉ Kilisito, kʉnsoko anyandʉgʉ ane nɨihɨɨ ane! 4 Antʉ awa ingɨ Aisilaeli Itunda naɨahoilwe atule ana akwe, waingɨlya mʉʉkʉlʉ lakwe, wɨkaɨka ilago nɨenso, wɨkaapa nɨ malagɨɨlyo, nʉʉhʉɨɨli nʉwatai nɨ malapo ang’wi Itunda. 5 Aisilaeli ingɨ izʉkʉlʉ a agʉkʉ a akalɨ, nʉ Kilisito kʉ kɨʉntʉ kakwe ʉtugɨwe mʉ Aisilaeli. Nʉyo ʉkolɨ migʉlya amaintʉ ɨhi, nʉwakʉligwe Itunda kalɨ na kalɨ! Yɨyɨ tai.

6 Shanga kʉtambʉla kɨna ilago lang’wi Itunda lakaɨlɨka, kʉnsoko ingɨ Isilaeli akeehʉ nɨ Aisilaeli atai. 7 Angwɨ shanga ɨhi nɨatugilwe nʉ Ibulahimu ingɨ ana ang’wi Itunda. Ingɨ, Itunda aɨʉmʉɨɨe ʉ Ibulahimu, kɨna, "Wileli wakwe ʉkʉpuma mʉng’wa Isaki." 8 Ihanga kʉlʉnga, shanga nɨatugilwe anga antʉ nɨɨtugwa akʉtula ana ang’wi Itunda. Ingɨ ana nɨatugilwe anga Itunda nʉtambʉe wawo akʉaligwa ana ang’wi Itunda. 9 Kʉnsoko ɨko nʉtambʉe Itunda ingɨ sɨlɨ, "Kʉtulya hangɨ matungo nɨhanga yaya kʉng’waka, nʉ Sala ʉkʉlija ng’wana mʉgoha.

10 Shanga yayo du, nʉ Lebeka, aɨʉtugile mintʉtɨ ana ihe ʉng’wɨ, ingɨ Isaki gʉkʉ witʉ. 11 Ingɨ, yigeeleke kɨna Itunda ʉkete ʉhumi nʉwa kʉholania, napa ga naɨakɨlɨ kʉtugwa ɨana nɨ itʉtɨ, ang’wɨ naɨ akɨlɨ kʉlɨnga ni ibɨ ang’wɨ niza, 12 Lebeka aɨʉɨɨwe kɨna, "Ng’wana nʉ mʉkʉlʉ ʉkʉmitʉmɨla ʉ mʉniino wakwe." Kʉlʉlo Itunda aɨʉhoile ng’wenso anga nʉloewe, shanga ntendo a kɨʉntʉ. 13 Anga nɨyandɨkilwe Mʉwandɨkwa wang’wi Itunda, "Aɨnʉmʉloilwe ʉ Yakobo, ingɨ nɨkamʉbɨpɨlwa ʉ Esau."

14 Itɨgwa, kʉlʉnge ʉlɨ? Itɨɨ, Itunda shanga mʉkendene? Shangaʉ. 15 Kʉnsoko Itunda aɨʉmʉɨɨe ʉ Musa, "Kʉmʉaisɨɨlya mʉntʉ wɨhi nɨnʉmʉoilwe, kʉmʉonela kinyaʉwai mʉntʉ wɨhi nɨnʉmʉloilwe. 16 Kʉlʉlo maintʉ ɨhi shanga asanilye anga ngulu niya antʉ ang’wɨ mʉ mʉntʉ nʉloewe, ingɨ asanilye kɨaisa kang’wi Itunda. 17 Kʉnsoko Ʉandɨkwa wang’wi Itunda wandɨkilwe itɨ kʉ mʉtemi Palao, "Aɨnʉkʉɨkile mʉ ʉtemi ingɨ nigeelye ngulu yane kʉng’wako, nɨ lina lane lɨtanantigwe mʉ mahɨɨ ɨhi." 18 Kʉlʉlo gwa, Itunda wɨmʉaisɨɨlya mʉntʉ wɨhi nʉloilwe kʉmʉaisɨlya, hangɨ anga walowe kʉmʉtenda mʉntʉ watule wɨlʉgoha, wɨmʉtendaʉ.

19 Itɨ gwa mɨkankolya, "Ang’wɨʉ, Itunda ʉkʉhuma ʉlɨ kʉmʉsosha mʉntʉ? Kʉnsoko nyenyu nʉhumile kʉgilya makani ni Itunda ʉmaloilwe?" 20 Ingɨ, ʉewe nʉwing’waa mʉntʉ, wɨnyenyu ʉewe nʉkikʉngʉma ni Itunda? Itɨɨ, ɨkɨntʉ nɨkɨʉmbilwe kɨhumilene kʉkolya, "Nɨkɨ ʉmʉmbile itɨ?" 21 Itɨɨ, mʉkanyi ilongo shanga ʉhumilene kʉtendeela ilongo mʉloewe, ʉhumile kʉʉmba yʉngʉ ibɨɨlɨ kilongo lɨlo lɨɨlo, kɨng’wɨ ʉkʉkɨsania ɨkɨʉya ʉkʉkɨdalaha.

22 Itɨʉ yɨlɨ kʉng’wi Itunda. Aɨʉkʉhiya kʉlagɨɨla ikuo lakwe nʉkʉkʉmʉʉla ʉhumi wakwe. Itɨ gwa, aɨʉalindɨɨe nʉ kiʉmɨɨlya kʉ antʉ naɨatakɨwe kʉhangwa nikʉo lakwe, antʉ naɨatakɨwe kʉlimansɨɨligwa. 23 Yitule ʉlɨgwa, anga itule nʉwanso aɨʉtendile itɨ wahume kʉtanantya ʉkʉlʉ wakwe kʉ antʉ naɨʉahoile asɨngɨɨlye kɨaisa kakwe. Itunda aɨwakondya kʉanoneelya ingɨle mʉʉkʉlʉ wakwe. 24 Ingɨ antʉ nɨanso sese naɨ ʉkitangile, shanga kʉ Ayahudi du ingɨ kʉpuma antʉ nɨshanga Ayahudi. 25 Kʉnsoko anga Itunda nʉtambʉe mʉmbugulu a mʉmanga Hosea kɨna,

"Awa naɨshanga antʉ ane

kʉitanga, antʉ ane.’

Nʉyu, ‘Nɨshanga mʉlowa,

kʉmitanga mʉlowa wane.’

26 Napoitɨ naɨaɨɨwe, ‘Ʉnyenye shanga mɨana ang’wi Itunda’

akitangwa, ana ang’wi Itunda nɨ mʉpanga."

27 Isaya mʉmanga wang’wi Itunda nʉyo, aʉatambʉɨe Aisilaeli, "Palʉng’wɨ nʉkʉtula Aisilaeli ɨdʉ anga ʉmʉhanga hanga nʉwa lʉzɨ, ingɨ nɨakʉkomolwa akeehʉ da, 28 kʉnsoko Isekʉlʉ shanga ʉkʉtinia kʉʉpɨsɨɨlya ʉnkumbigʉlʉ kʉ ʉlamʉli nʉ ʉkondanɨɨe." 29 Hangɨ anga Isaya nʉwatongee kʉlʉnga, "Isekʉlʉ Mʉkola Ngulu yɨhi anga aɨwaleke kʉʉsagɨlya ana nɨang’wɨ nɨa Aisilaeli, aɨkʉziimpyana nɨ antʉ akʉ Sodoma, nɨ antʉ akʉ Gomola."

30 Kʉlʉlo kʉlʉnge ʉlɨ gwa? Antʉ nɨshanga Ayahudi nɨshanga adumile kʉgombwa ni Itunda, agombilwe ni Itunda kʉʉhʉɨɨli, 31 ingɨ Aisilaeli naɨakagupile kʉduma kʉgombwa ni Itunda kʉtyata malagɨɨlyo shanga ɨkahuma. 32 Kʉnsoko kɨɨ? Kʉnsoko aɨasanilye ntendo niyao ɨkaleka kʉsania ʉhʉɨɨli. Ɨkʉmpa migwe nɨlɨsasha antʉ agwe." 33 Anga niyandɨkilwe Mʉwandɨkwa wang’wi Itunda.

"Kolwi, nɨkaɨka igwe kʉ Sayuni

nɨlakʉsasha antʉ agwe,

kɨntʉ ka kʉatenda antʉ atende mʉlandʉ.

Ingɨ kʉ mʉntʉ nʉkʉ mʉhʉɨɨla shanga ʉkʉhumigwa mɨnyala."