Lucas 24

f webriδ nεemwas

13 esses ellan sen essisen xDemen ytemuwreθ ellesmes εimwas tebεeδ leqrabeθ neHdac nkiylu f uwrceliym, 14 ukanen Hekken f elli ySar. 15 unihnin Hekken ettemfehamen, yeqreb yetwelinsen yesuwε biyδe yuyuwr iyδsen. 16 emme tiTTewinensen emmireDneθ felles. 17 yenceδten: «f mette iθHekkam uxenyum tegguwrem?» bedden δimkecben. 18 yer felles iyjen essisen, ellesmes kelyuwbas: «endre δcex berk elli tuseδeδ yuwrceliym weltessiync elli ySar δiys g liyyame?» 19 yennasen: «δmette iySar?» erren felles: «elli ySar yyesuwε ennaSri elli ykan δenbi yetged belgde ege dedwi elkul ezzaθ nrebbi dleεbaδ elkul, 20 umax i θuwcin imeqqaren nelkuhhan delHukkemenne yelHkum nujafi dweSlab. 21 emme enkan netteεlex elli nette δeyefδe israYiyl. uzade asse δeθθaleθ seg elli ySar wediyn. 22 ellaneθ elwacun essiyne Heyyerntane, exDemneθ ywenil talji bekri, 23 yaxi ellufinc ejjeθeθes, eseδneθ enneneθ elli zriyneθ elmleyxaθ ennan elli elyuwc yedder. 24 exeDmen lebHaD kanen iyδne ywenil efen emmax i nnaneθ elwacundiyn, emme nette eθezriync.» 25 yennasen: «eyiδerwac elli ulewnennum ettemnenc liyhliyh s elli eHkant lenbye! 26 muc ykan lazem eyεane elmesiyH elwjayeεe usiyn eyaδef g elmejδes?» 27 usiyn yebδe yetfehhem δiysen, elli yemmari felles elkul seg muwse dlenbye elkul. 28 max i θiwDen ytemuwreθ elli sennadiyn netlamδe δesexeDmen, yesuwε yege imenes δeyeθεedde lezzaθ, 29 yaxi mellegnes ennanes: «eqqiym γenne, eddunyeθ εuddi tessulles.» yaδef yeqqiym γersen. 30 max i ygeεmez δeyeč iyδsen, yqam eγrum ibarex, usiyn ikesserθ yezlasen. 31 mirneθ tiTTewinensen exzent, usiyn iraH fellasen. 32 yen iyjen essisen ywissen: «elkanenc ulewnenne etmeHraqen g iδmernenne max i ykan yHekkeyane uggebriδ uyetfesrane g elxθabaθ?» 33 ekkeren g elweqtdiyn eδwlen yuwrceliym, efen etlemδadiyn leHdac delli iyδsen emlaymen, 34 unihnin eqqaren: «mbelHeq, erreb yekker, yeffeγ ysemεan.» 35 eHkenasen sennadiyn elli ySar uggebriδ, umax i θuxzen g ukesser nweγrum.