Lucas 5

yesuwε yetnabe g etlamδe iglewlen

1 max i mlemδen felles leεbaδ elkul exsen eslen tufleyθ nrebbi, ykan yesuwε ibed g ecceT niylel njenniysaret. 2 unette siyn, yezre sent ettiflak bedneθ g eccafeθ niylel wiSeyyaδen elberre esseraδen g elmeεεuwn nuSθaδi. 3 yerkeb yesuwε g tefluwkθ nsemεan buTrus yennes: «aδef ywemmes niylel.» welbeεδ yeqqiym f elHerf ntefluwkθ yebδe yetseqre g leεbaδdiyn diyn. 4 max i ykemmel s edwiys yennayes ysemεan: «erni aδef yelγriyq niylel. teHδfem eccebkeθewwem bac e θeSθaδem.» 5 yerrayes semεan yennes: «ha imuεellem, rahu δeggiyδ elkul unečin netjaheδ yemenni wenneSθeδ cey f elxaĎer ntufleyθex taye δage max i θenniyδ.» 6 max i δuwγin s erreyes eSθaδen elHuwθ elmi tebδe eccebkeθensen δetemmenkeδ.» 7 elweqθes uman yiSHibnensen g tefluwkθ tissent bac e ddasen usinc entεawnen. esδen εebben tiflak lessentiyn elmi bδaneθ δeγreqneθ. 8 max i yezre semεan buTrus elxiyrdiyn elkul yerkeε f ifednes ezzaθ nyesuwε yennes: «ebεeδ felle ha siydiy, lexaTer eγleĎe egget.» 9 eqqiymen imewnensen miyren nette delli iyδes, 10 zade idrari nzebedi yeεquwb dyuwHenna icriyxen nsemεan lexaTer eSθaδen elHuwθ egget. elweqθes yenne yesuwε ysemεan: «eθukδec, seg ture δeθeδewleδ etteγδeδ leεbaδ yrebbi max i tteγδeδ g elHuwθ s iylel.» 11 max i δiweDneθ tiflak lessentiyn yelber, edjin kul cey δefrensen eθbεen yesuwε.