1 ମନଙ୍‌ତଡନ୍‌ ଆ ବିସାଡାଙ୍* ପ୍ରବୁନ୍‌ ଏଡ଼ୁର୍‌ମଡ୍‌ତେ । ବନ୍‌ଡ ମନଙ୍‌ ଗୁଣ୍ତୁନ୍‌ ଆସନ୍‌ ଆନିନ୍‌ ମଅଁୟ୍‌ତେ ।

2 କଙ୍କ୍ରିନ୍‌ ଜିର୍ରାୟ୍‌ଡେନ୍‌ ଗନ୍‌ଡ୍ରୟ୍‌ଜନ୍‌ ଅଡ଼ୋତାୟ୍‌ । ବନ୍‌ଡ ଲବଡ୍ଡିମରନ୍‌ ଆମଙ୍‌ବା ଗିଆନନ୍‌ ଡକୋତେ ।

3 ଲଗଡ୍‌ ବୁଡ୍ଡିମରଞ୍ଜି ଆଲନଗଡ୍‌ ଆନିଞ୍ଜିଆଡଙ୍‌ ତଙରନ୍‌ ଅବ୍‌ତୁୟ୍‌ତେ । ବନ୍‌ଡ ବାଁୟ୍‌ସିମରଞ୍ଜି ଆସଙ୍ଗତା ଆନିଞ୍ଜିଆଡଙ୍‌ ଅବ୍‌ଗୁରୁଡ୍ଡେତେ ।

4 ବନ୍‌ଡ୍ରାବନ୍‌ ଆଡିଡ୍‌ ଆରନ୍ନା କାଜ୍ଜାନ୍‌, ବନ୍‌ଡ ଡରମ୍ମଗଡନ୍‌ ଆ ରନବୁ ସିଲଡ୍‌ ଡୋବ୍‌ତେ ।

5 ବୟ୍‌ଲେମରନ୍‌ ଆ ଡରମ୍ମଗଡନ୍‌ ଆ ତଙରନ୍‌ ଅବ୍‌ତୁୟ୍‌ତେ, ବନ୍‌ଡ ପେଲ୍ଲାନ୍‌ ଆ ପନେଲ୍ଲାନ୍‌ ଆସନ୍‌ ରବୁତେ ।

6 ଲଗଡ୍‌ ବୁଡ୍ଡିମରଞ୍ଜି ଆ ଡରମ୍ମଗଡନ୍‌ ଆସନ୍‌ ଆନିଞ୍ଜିଆଡଙ୍‌ ଡୋବ୍‌ତେ, ବନ୍‌ଡ ବାଁୟ୍‌ସିମରଞ୍ଜି ତର୍ଡମ୍‌ ତର୍ଡମ୍‌ ପରାନ୍‌ସାତ୍ତିନ୍‌ ଆକାବ୍ବାଡ଼ାଲୋଙ୍‌ ଞନମନ୍‌ ଡେତେ ।

7 ପେଲ୍ଲାମରନ୍‌ ରବୁଏଣ୍ଡେନ୍‌, ଆରାସାନେନ୍‌ ଗୁରୁଡ୍ଡେତେ ଆରି ଏର୍‌ଡରମ୍ମମରନ୍‌ ଆନାସା ମୋସ୍ସାତେ ।

8 ଡରମ୍ମମରନ୍‌ ଡୁକ୍କନ୍‌ ସିଲଡ୍‌ ତନାଣ୍ତେନ୍‌ ଡେତେ,ଆରି ପେଲ୍ଲାମରନ୍‌ ଆପାଲ୍‌ତେଙନ୍‌ ତେତ୍ତେ ଜିର୍ତାୟ୍‌ ।

9 ଏର୍‌ଡରମ୍ମମରନ୍‌ ଆ ତଅଡନ୍‌ ବାତ୍ତେ ଆ ତୟ୍‌ଲିସିଙନ୍‌ ଆମନ୍‌ରାଆଡଙ୍‌ ଅବ୍‌ସେଡ୍‌ତେ, ବନ୍‌ଡ ଡରମ୍ମମରନ୍‌ ଗିଆନଲୋଙନ୍‌ ତନାଣ୍ତେନ୍‌ ଞାଙ୍‌ତେ ।

10 ଡରମ୍ମମରନ୍‌ ସୁକ୍କା ଡକୋଲଣ୍ଡେନ୍‌, ଗଡ଼ାନ୍‌ ସର୍ଡାତନ୍‌, ଆରି ପେଲ୍ଲାମରନ୍‌ ମୋସ୍ସାଏନ୍‌ ଡେନ୍‌ ସର୍ଡାକନନ୍‌ ସଡ୍ଡାତେ ।

11 ଲଗଡ୍‌ମରନ୍‌ ଆସିର୍ବାଦ ବାତ୍ତେ ଗଡ଼ାନ୍‌ ମରଙ୍‌ତେ, ବନ୍‌ଡ ପେଲ୍ଲାମରନ୍‌ ଆତଅଡ୍‌ ଆନିନ୍‌ ଗୁରୁଡ୍ଡେତେ ।

12 ଅଙ୍ଗା ଆମନ୍‌ରା ଆ ତୟ୍‌ଲିସିଙ୍‌ମରନ୍‌ଆଡଙ୍‌ ଏଡ଼ୁର୍‌ମଡ୍‌ତେ ଆନିନ୍‌ ଏର୍‌ବୁଡ୍ଡି । ବନ୍‌ଡ ବୁଡ୍ଡିମରନ୍‌ କଡ଼ିଙ୍‌ଲେ ଡକୋତନ୍‌ ।

13 ତୋର୍ବିଲାଙ୍‌ମରନ୍‌ ବୁଲ୍ଲେତେ, ଆନିନ୍‌ ଆସସ ବରନ୍‌ ବର୍ରେଙ୍‌ଲେ ପାଙ୍‌ତେ, ବନ୍‌ଡ ଡର୍ନେମରନ୍‌ ଆନିନ୍‌ ଆସସ ବରନ୍‌ ଅଃବର୍ନେ ।

14 ମନଙ୍‌ ଞନଙ୍‌ଞଙ୍‌ବରନ୍‌ ଅଃଞାଙ୍‌ଲଜିଡେନ୍‌ ମନ୍‌ରାଞ୍ଜି ଅସେଡ୍‌ତଜି,ଆରି ଗୋଗୋୟ୍‌ ମନ୍ତ୍ରିଞ୍ଜି ଆ ଞନଙ୍‌ଞଙ୍‌ ବାତ୍ତେ ମନ୍‌ରାଞ୍ଜି ଅଃନସେଡେଜି ।

15 ଏର୍‌ନମ୍ମଡନ୍‌ ଆମନ୍‌ରା ଆସନ୍‌ ଆନା ଜାମନିତନ୍‌ ଆନିନ୍‌ ଆଜାଡ଼ିନ୍‌ ପନରଡନ୍‌ ଞାଙ୍‌ତେ, ବନ୍‌ଡ ଜାମନିନ୍‌ ଆସନ୍‌ ଆନା ଏଡ଼ୁର୍‌ମଡ୍‌ତେ, ଆନିନ୍‌ ଉଗୁରିୟ୍‌ ଡକୋତନ୍‌ ।

16 ସନାୟୁମ୍‌ବଜନ୍‌ ପନେମେଙନ୍‌ ଞାଙ୍‌ତେ,ଆରି ଜୁରୁମରନ୍‌ ଅନର୍ଜେନ୍‌ ଞମ୍‌ଲେ ଡକୋତଜି ।

17 ସନାୟୁମ୍‌ମରନ୍‌ ଆ ପରାନ୍ନାନ୍‌ ଡୁଙ୍‌ୟମ୍‌ତେ ବନ୍‌ଡ ଆନା କାନ୍‌କାରମ୍‌ ଅଗାମେନ୍‌ ଆମନ୍‌ରା ଆନିନ୍‌ ଆନିନ୍‌ଡମନ୍‌ ଆଡଅଙ୍‌ ଅବ୍‌ଡଣ୍ଡାୟ୍‌ତେ ।

18 ପେଲ୍ଲାମରନ୍‌ ପାତ୍ୟାନ୍‌ ତର୍ତୁମ୍‌ତେ ବନ୍‌ଡ ଆନା ଡରମ୍ମବରନ୍‌ ବର୍ତନେ ଆନିନ୍‌ ଓଞୋଲ୍‌କୁଜନ୍‌ ଆଜାଡ଼ିଡମ୍‌ ଞାଙ୍‌ତେ ।

19 ଅଙ୍ଗା ଆମନ୍‌ରା ଡରମ୍ମଗଡନ୍‌ ଏର୍‌କିକ୍କିଡ୍‌ନେନ୍‌ ଡକୋ ଆନିନ୍‌ ଅନମେଙନ୍‌ ଞାଙ୍‌ତେ,ଆରି ଆନା ଇର୍ସେ କାବ୍ବାଡ଼ାନ୍‌ ଆସନ୍‌ ଇର୍ତେ ଆନିନ୍‌ ରବୁତେ ।

20 ସଙ୍ଗତାମରନ୍‌ ଆମନ୍ନ ପ୍ରବୁନ୍‌ ଏଡ଼ୁର୍‌ମଡ୍‌ତେ ବନ୍‌ଡ ଲଗଡ୍‌ ବୁଡ୍ଡିମରଞ୍ଜି ଆସନ୍‌ ଆନିନ୍‌ ସର୍ଡାତେ ।

21 ଇର୍ସେମରଞ୍ଜି ଅଲ୍‌ଞମ୍‌ସିଏଞ୍ଜିଡେନ୍‌ ପନବ୍‌ରଡନ୍‌ ଏର୍‌ଞନାଙନ୍‌ ଅଃଡକୋନେଜି, ବନ୍‌ଡ ଡରମ୍ମମରନ୍‌ ଆକେଜ୍ଜା ଅଡ଼ୁର୍‌ତଜି ।

22 କିମ୍ବୋନନ୍‌ ଆମୁଲୋଙ୍‌ ସୁନ୍ନାନ୍‌ ଜୋଡ଼ୋର୍‌ମୁଜନ୍‌ ଏଙ୍ଗାଲେ ତିଅନ୍ତମ୍‌ ମନଙ୍‌ ପନ୍‌ସୁଆତିନ୍‌ ଆନୁମ୍‌ରେଙ୍‌ ଆମୁକ୍କାନ୍‌ ଆ ମନଙ୍‌ବୟ୍‌ ଅନ୍ତମ୍‌ ।

23 ଡରମ୍ମମରନ୍‌ ଆ ଇସ୍ସୁମ୍‌ ଆଜଅ ମନଙ୍‌ ବନ୍‌ଡ ପେଲ୍ଲାମରଞ୍ଜି ଆରାସାନେ ଆଜଅ ବରାବନ୍‌ ।

24 ଲାଙ୍‌ଲେନ୍ନେ ବାନ୍ତେଡାଲେ ଆରି ଗୋଗୋୟ୍‌ ରନ୍ନାନ୍‌ ଞାଙ୍‌ତଜି, ଆରି ଲାଙ୍‌ଲେନ୍ନେ ତନିୟ୍‌ତିୟନ୍‌ ଅଃସାଏଞ୍ଜି ଜନଙ୍‌ଡେନ୍‌ ତେତ୍ତେଲୋଙ୍‌ ଡୋଲେଜନ୍‌ ତୁମ୍‌ ଡକୋତେ ।

25 ତନିୟ୍‌ତିୟନ୍‌ ଆତରିୟ୍‌ତେନ୍‌ ଆପରାନ୍ନା ସର୍ଡାତେ ଆରି ରୁଡାଡିଁୟ୍‌ମରନ୍‌ ନିୟ୍‌ ଆନିନ୍‌ଡମ୍‌ ଡାଆନ୍‌ ବାତ୍ତେ ରୁଡାତନ୍‌ ।

26 ଜନ୍‌ରୋମନ୍‌ ଆନା ଡଙ୍‌ଡଙ୍‌ତେ, ଆନିନ୍‌ଆଡଙ୍‌ ମନ୍‌ରାଞ୍ଜି ସୟ୍‌ପତଜି, ବନ୍‌ଡ ଅଙ୍ଗା ଆମନ୍‌ରା ତିଆତେ ତମ୍‌ତେ, ଆବବ୍‌ଲୋଙନ୍‌ ଆସିର୍ବାଦନ୍‌ ଞାଙ୍‌ତେ ।

27 ଅଙ୍ଗା ଆମନ୍‌ରା ଜୁବାୟ୍‌ଲେ ମନଙ୍‌ କାବ୍ବାଡ଼ାନ୍‌ ଆଲନୁମ୍‌ ଆସନ୍‌ ଏର୍ତେଗୋୟ୍‌ତେ, ଆନିନ୍‌ ସନାୟୁମନ୍‌ ଞାଙ୍‌ତେ,ଆରି ଆନା ଅବୟ୍‌ନେନ୍‌ଆଡଙ୍‌ ଅନବ୍‌ସେଡନ୍‌ ସାୟ୍‌ତେ, ଆନିନ୍‌ଆଡଙ୍‌ ତିଆତେ ମା ଗଟେତେ ।

28 ଆନିନ୍‌ଡମନ୍‌ ଆନର୍ଜେଲୋଙ୍‌ ଆନା ଆସାଲନ୍‌ ଡକୋତନ୍‌, ଆନିନ୍‌ ଅସେଡ୍‌ତେ; ବନ୍‌ଡ ଡରମ୍ମମରନ୍‌ ଲେଡେଙ୍‌ ଅଲାନ୍‌ ଅନ୍ତମ୍‌ ଡେତେ ।

29 ଅଙ୍ଗା ଆମନ୍‌ରା ଆସିଙ୍‌ମରନ୍‌ଆଡଙ୍‌ ଡଣ୍ତାୟ୍‌ତେ ଆନିନ୍‌ ରିଙ୍ଗେନ୍‌ ଆଡନେ ଅନ୍ତମ୍‌ ଞାଙ୍‌ତେ । ଆରି ଏର୍‌ଗିଆନମରନ୍‌ ଗିଆନମରନ୍‌ ଆକମ୍ୱାରି ଡେତେ ।

30 ଡରମ୍ମମରନ୍‌ ଆ ଜଅ ଅନମେଙନ୍‌ ଆତରିୟ୍‌ତେନ୍‌ ଆନୁବ୍‌ ଅନ୍ତମ୍‌, ଆରି ଆନା ଗିଆନମରନ୍‌ ଆନିନ୍‌ ଆନ୍ନାମରନ୍‌ ଆପୁରାଡ଼ା ଞାଙ୍‌ତେ ।

31 ଗିୟ୍‌ବା, ପୁର୍ତିଲୋଙନ୍‌ ଡରମ୍ମମରନ୍‌ ଆକାବ୍ବାଡ଼ା ଆ ଜଅ ଞାଙ୍‌ତଜି, ଏତ୍ତେଲ୍‌ଡେନ୍‌ ପେଲ୍ଲାମରନ୍‌ ଡ ଇର୍ସେମରଞ୍ଜି ଆକାବ୍ବାଡ଼ା ଜଅ ଗୋଗୋୟ୍‌ ଅରଡ୍‌ଞାଙେଞ୍ଜି ?