1 ଅଙ୍ଗା ଆମନ୍ରା ବତରନ୍କି ବତରନ୍ ସାଞେଙ୍ବରନ୍ ଞାଙେନ୍ ଜନଙ୍ଡେନ୍ ଆ ମନ୍ନନ୍ ରବ୍ଡୋତେ, ଆନିନ୍ ଏର୍ସୁକ୍କାନ୍ ଏରବ୍ବୋମଙ୍ ଅସେଡ୍ତେ । 2 ଡରମ୍ମମରଞ୍ଜି ମରଙେଞ୍ଜିଡେନ୍, ମନ୍ରାଞ୍ଜି ସର୍ଡାତଞ୍ଜି; ବନ୍ଡ ପେଲ୍ଲାମରଞ୍ଜି ରାଜାଲଞ୍ଜିଡେନ୍, ମନ୍ରାଞ୍ଜି ଡୁକ୍କନ୍ ବାତ୍ତେ ୟେୟେଡାତଞ୍ଜି । 3 ଅଙ୍ଗା ଆମନ୍ରା ଗିଆନନ୍ଆଡଙ୍ ଡୁଙ୍ୟମ୍ତେ, ଆନିନ୍ ଆପେୟନ୍ଆଡଙ୍ ଅବ୍ସର୍ଡାତେ; ବନ୍ଡ ଆନା ଜୋଣ୍ତଡ଼ିବଜଞ୍ଜି ଆମଙ୍ ଇୟ୍ତେ, ଆନିନ୍ ଆନର୍ଜେନ୍ ଅବ୍ମୋସ୍ସାତେ । 4 ରାଜାନ୍ ମନଙ୍ ପନ୍ସୁଆତିନ୍ ବାତ୍ତେ ଡେସାନ୍ ଗବ୍ରିତେ; ବନ୍ଡ ଆନା ଲାନ୍ସନ୍ ସାୟ୍ସାୟ୍ତନ୍, ଆନିନ୍ ଅବ୍ଗୁରୁଡ୍ଡେତେ । 5 ଅଙ୍ଗା ଆମନ୍ରା ଆ ତୟ୍ଲିସିଙନ୍ ଆମନ୍ରାଆଡଙ୍ ତମୟ୍ବରନ୍ ବର୍ତେ, ଆନିନ୍ ଆତାଲ୍ଜଙନ୍ ଆସନ୍ ଅନୋଡ଼େଙନ୍ ଡାତେ । 6 ପରାନ୍ସାତ୍ତିନ୍ ଆମନ୍ରା ଏର୍ଡରମ୍ମଲୋଙନ୍ ଅନୋଡ଼େଙନ୍ ଡକୋତେ; ବନ୍ଡ ଡରମ୍ମମରନ୍ କନନ୍ତନ୍ ଆରି ସର୍ଡାତନ୍ । 7 ଡରମ୍ମମରନ୍ ଡୋଲେୟ୍ମରନ୍ ଆମନ୍ରାଜି କନାୟ୍କାୟ୍ବର୍ ଆବର୍ନେଜି ଜନାତେ; ବନ୍ଡ ତି ଆତେ ଆଜନନା ଆସନ୍ ପେଲ୍ଲାମରନ୍ ଆମଙ୍ ବୁଡ୍ଡିନ୍ ଅବୟ୍ତଡ୍ । 8 ନିଣ୍ତୟ୍ମରଞ୍ଜି ଗଡ଼ାନ୍ ଆମନ୍ରାଜିଆଡଙ୍ ସୁୟ୍କାୟ୍ତଜି; ବନ୍ଡ ଗିଆନମରଞ୍ଜି ବନ୍ଡ୍ରାବନ୍ ସବ୍ୟୁତଜି । 9 ଏର୍ଗିଆନନ୍ ସରିନ୍ ଗିଆନଡମନ୍ ଆମନ୍ରା ବାତ୍ତେ ଅଲ୍କେସୁଏଞ୍ଜି ଡେନ୍, ଆନିନ୍ ବରାବେନ୍ ଡେନ୍ ଅଡ଼େ କିଜେନ୍ଡେନ୍, ଇନ୍ନିଙ୍ ଲାବତଡ୍ । 10 ସମ୍ବବ୍ମରନ୍ ଆର୍ଲଡୟ୍ତେଞ୍ଜି ଆମନ୍ରାଜି ସତଙ୍ମରନ୍ ଏଡ଼ୁର୍ମଡ୍ତଜି; ଆରି ଆନିଞ୍ଜି ଲବଡ୍ଡିମରନ୍ ରନବ୍ବୁନ୍ ଆସନ୍ ଏର୍ତଜିଗୋୟ୍ତଜି । 11 ଉଲ୍ଲୁନ୍ ଆବନ୍ଡ୍ରାବନ୍ ଅଡ଼୍କୋନ୍ ଅବ୍ଗିୟ୍ତେ; ବନ୍ଡ ଗିଆନମରନ୍ ତିଆତେ ଲଡ୍ଲଡ୍ଲେ ଡକୋତେ । 12 ରାଜ୍ୟପାଡ଼ନ୍ ପାତ୍ୟାବର୍ଲୋଙନ୍ ଡାଲୁଡେନ୍ ଡେନ୍, ତିଡେନ୍ ଆ ସର୍ସି କାବ୍ବାଡ଼ାମରଞ୍ଜି ଅଡ଼୍କୋନ୍ ପେଲ୍ଲାତଞ୍ଜି । 13 ଡୋଲୟ୍ମରନ୍ ଡ ଅନିଆୟ୍ମରନ୍ ରୁକ୍କୁତଞ୍ଜି, ସଦାପ୍ରବୁନ୍ ବାଗୁଞ୍ଜି ଆମଡ୍ ସାଆର୍ଡମ୍ ଅବ୍ମେତେ । 14 ଅଙ୍ଗା ଆ ରାଜା ଡର୍ନେଡମନ୍ ଅନ୍ତମ୍ ଅରିର୍ସୋୟମ୍ଡାନ୍ ଆମନ୍ରାଜିଆଡଙ୍ ପନ୍ସୁଆତିତେ, ଆକୁର୍ସି ଆଏଡ଼ର୍ ଗରି ଡକୋତେ । 15 ଡାଙ୍ଗୋନ୍ ଡ ସାଞେଙ୍ବରନ୍ ଗିଆନନ୍ ତିୟ୍ତେ; ବନ୍ଡ ପସିଜନ୍ଆଡଙ୍ ଆଇସୁମ୍ଡମନ୍ ବାତ୍ତେ ଅମ୍ରେଙେନ୍ଡେନ୍, ଆନିନ୍ ଆୟୋଙନ୍ଆଡଙ୍ ଗବ୍ରୟ୍ମଡ୍ତେ । 16 ପେଲ୍ଲାମରଞ୍ଜି ମରଙେଞ୍ଜିଡେନ୍, ଏର୍ଡରମ୍ମନ୍ ଗୋଗୋୟ୍ତେ; ବନ୍ଡ ଡରମ୍ମମରନ୍ ଆଗୁରୁଡ୍ଡେଞ୍ଜି ଗିୟ୍ତଜି । 17 ଆମନ୍ଡମନ୍ ଆ ଡାଙ୍ଗଡ଼ାଅନ୍ଆଡଙ୍ ପବ୍ରଡେଡେନ୍, ଆନିନ୍ ଆମନ୍ଆଡଙ୍ ସୟୁନ୍ ତିୟ୍ତମ୍; ଆରି ଆନିନ୍ ପରାନ୍ନାନମ୍ଆଡଙ୍ ସୁକ୍କାନ୍ ତିୟ୍ତମ୍ । 18 ଇସ୍ୱରନ୍ ଆବନାଁୟ୍ ଆନଡ଼ୟ୍ଲୋଙ୍ ମନ୍ରାନ୍ ମୋସ୍ସାତେ; ବନ୍ଡ ଅଙ୍ଗା ଆମନ୍ରା ବନାଁୟ୍ବରନ୍ ମାନ୍ନେତେ, ଆନିନ୍ ସନେନ୍ସେନ୍ଡମ୍ । 19 କମ୍ୱାରିମରନ୍ ବର୍ନେନ୍ ବାତ୍ତେ ଅଗନ୍ଲୁଡେ; ଇନିଆସନ୍ଗାମେଣ୍ତେନ୍ ଆନିନ୍ ଗନ୍ଲୁଡେନ୍ ଜନଙ୍ଡେନ୍ ବର୍ନେନ୍ ଅଃନମ୍ଡଙେ । 20 ଆମ୍ୱେନ୍ ପଙ୍ ବର୍ନେଲୋଙନ୍ ଅପ୍ପୁଡ୍ ମରନ୍ଆଡଙ୍ ଏଗିଜେନ୍ ପଙ୍ ? ଆନିନ୍ ପାଲ୍ତେଙନ୍ ଉଲ୍ଲୁନ୍ ଆ ବିସୟଲୋଙ୍ ଗୋଗୋୟ୍ ଆରାସାନେନ୍ ଡକୋ । 21 ଆନା ପସିଜନ୍ ସିଲଡ୍ ଆକମ୍ୱାରିନ୍ଆଡଙ୍ ଡୁଙ୍ୟମ୍ଲେ ବନ୍ତେ, ତିକ୍କି ଆଡିଡ୍ ତି ଆକମ୍ୱାରି ଆ ଡାଙ୍ଗଡ଼ାଅନନ୍ ଅନ୍ତମ୍ ଡୋତନ୍ । 22 ଗୋଗୋୟ୍ ବନ୍ଡ୍ରାବ୍ମରନ୍ ଅଲ୍ବାଡ୍ଡେନ୍ ଡ ଜବ୍ର ଏର୍ଡରମ୍ମନ୍ ଅମ୍ଡୁଙ୍ତାୟ୍, 23 ମନ୍ରାନ୍ ଆ କଙ୍କ୍ରି ଆନିନ୍ଆଡଙ୍ ଅବ୍ସନ୍ନାତେ; ବନ୍ଡ ଅଙ୍ଗା ଆମନ୍ରା ଆ ପୁରାଡ଼ା ଲବ୍ଗଃଡମ୍ନେନ୍ ଡକୋ; ଆନିନ୍ ମନାନ୍ନେନ୍ ଞାଙ୍ତେ । 24 ରାଉମରନ୍ ଆଗଡ଼ିନ୍ ଆ ପରାନ୍ନାନ୍ଆଡଙ୍ ଏଡ଼ୁର୍ମଡ୍ତେ, ଆନିନ୍ ପର୍ମାଡ଼ାବରନ୍ ଅମ୍ଡଙ୍ତେ, ବନ୍ଡ ଇନ୍ନିଙ୍ ଆବର୍ନେ ଅବର୍ନେ । 25 ମନ୍ରାନ୍ ଆବନ୍ତଙ୍ ଅନୋଡ଼େଙ୍ଗୋ; ବନ୍ଡ ସଦାପ୍ରବୁନ୍ ଆମଙ୍ଲୋଙ୍ ଆନା ଇଙ୍ଡର୍ତନେ, ଆନିନ୍ ଡନୋବନ୍ ଞାଙ୍ତେ । 26 ଜବ୍ର ମନ୍ରାଜି ରାଜ୍ୟପାଡ଼ନ୍ ଆମଙ୍ ସିଲଡ୍ ଆସନାୟୁମ୍ ସାୟ୍ତଜି, ବନ୍ଡ ମନ୍ରାନ୍ ଆ ପନ୍ସୁଆତି ସଦାପ୍ରବୁନ୍ ଆମଙ୍ସିଲଡ୍ ଡେତେ । 27 ଏର୍ଡରମ୍ମମରନ୍ ଡରମ୍ମମରନ୍ ଏଡ଼ୁର୍ମଡ୍ତେ,ଆରି ଲବଡ୍ଡିମରନ୍ଆଡଙ୍ ପେଲ୍ଲାମରନ୍ ଏଡ଼ୁର୍ମଡ୍ତେ ।
Publicidade
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)