1 ଗୋଗୋୟ୍‌ ଅନର୍ଜେନ୍‌ ଆପାଲ୍‌ତେଙ୍‌ ମନଙ୍‌ ଅଞୁମନ୍‌ ଆଞନାଙ୍‌ ମନଙ୍‌, ଆରି ରୁପ୍ପାନ୍‌ ଡ ସୁନ୍ନାନ୍‌ ସିଲଡ୍‌ ଡନୁଙ୍‌ୟମନ୍‌ ଆରବ୍‌ତୁୟ୍‌ତେନ୍‌ ଆ ସନାୟୁମ୍‌ ମନଙ୍‌ । 2 ଗମାଙ୍‌ମରନ୍‌ ଡ ଡୋଲୟ୍‌ମରନ୍‌ ଆବରୁକ୍କୁନ୍‌ ଡେତଜି; ପ୍ରବୁନ୍‌ ତି ଅଡ଼୍‌କୋଞ୍ଜି ଆ ଗନଡ଼େମର୍‌ । 3 ସାଲ୍ଲାକିମରନ୍‌ ତନଙଡନ୍‌ ଗିୟ୍‌ଲେ ଆନିନ୍‌ଡମନ୍‌ଆଡଙ୍‌ ସତେ; ବନ୍‌ଡ ଏର୍‌ବୁଡ୍ଡିମରଞ୍ଜି ଆମ୍ମୁଙ୍‌ଲନ୍‌ ଜିର୍ରେ ପନବ୍‌ରଡନ୍‌ ଞାଙ୍‌ତଜି । 4 ଲବଡ୍ଡିନ୍‌ ଡ ସଦାପ୍ରବୁନ୍‌ ଆବିସୟ ଆବନ୍ତଙ୍‌ ଆ ଓଞୋଲ୍‌କୁଜନ୍‌ ଆନର୍ଜେ ଆରି ମନାନ୍ନେନ୍‌ ଡ ଅନମେଙନ୍‌ । 5 ଏର୍ଜୁନ୍ନେମରଞ୍ଜି ଆ ତଙର୍‌ଲୋଙ୍‌ ଅବ୍ବାନ୍‌ ଡ ଅନୋଡ଼େଙନ୍‌ ଡକ୍କୋତନ୍‌; ଆନା ଆପରାନ୍ନାନ୍‌ ଡୋବ୍‌ତେ, ଆନିନ୍‌ ତି ଅଡ଼୍‌କୋନ୍‌ ସିଲଡ୍‌ ସବ୍‌ଙାୟ୍‌ଲନ୍‌ ଡକୋତନ୍‌ । 6 ଆ ସନ୍ନାଇଙନ୍‌ ମା ଆଡିଡ୍‌ ପସିଜନ୍‌ ଆନିନ୍‌ଆଡଙ୍‌ ଞଙ୍‌ଞଙ୍‌ବା; ତିଡେନ୍‌ ଆନିନ୍‌ ବୁଡାଏନ୍‌ ଜନଙ୍‌ଡେନ୍‌ ସେଙ୍‌ମଡ୍‌ଲେ ଆଜିର୍ତେନ୍‌ ଆତଙର୍‌ ସିଲଡ୍‌ ଅଃନାଡ଼ଏ । 7 ଗମାଙ୍‌ମରନ୍‌ ଡୋଲୟ୍‌ମରନ୍‌ ଆତୋଣ୍ତୋ ରାଜାତନ୍‌; ଆରି ସାଉନେମରନ୍‌ ସାଉତିୟ୍‌ମରନ୍‌ ଆକମ୍ୱାରି ଡେତେ । 8 ଆନା ଏର୍‌ଡରମ୍ମନ୍‌ ଆଜମ୍ମଲ୍‌ ବିଡ୍‌ତେ, ଆନିନ୍‌ ତନଙଡନ୍‌ ଅନ୍ତମ୍‌ ଆ ଜନ୍‌ରୋମ୍‌ ଗଡ୍‌ତେ ଆରି ଆନିନ୍‌ ଆବନ୍‌ଡ୍ରାବନ୍‌ ଅନ୍ତମ୍‌ ଆଡାଙ୍ଗୋ ମାୟାତେ । 9 ଅଙ୍ଗା ଆମନ୍‌ରା ଆମଡ୍‌ ଆନ୍ନାମରଞ୍ଜିଆଡଙ୍‌ ସାୟୁମ୍‌ତଜି, ଆନିନ୍‌ ଆସିର୍ବାଦନ୍‌ ଞାଙ୍‌ତେ; ଇନିଆସନ୍‌ଗାମେଣ୍ତେନ୍‌ ଆନିନ୍‌ ଆ ଜନୋମନ୍‌ ସିଲଡ୍‌ ଅରିର୍ସୋୟମ୍‌ଡାନ୍‌ଆଡଙ୍‌ ବାନ୍ତେତେ । 10 ନିଣ୍ତୟ୍‌ମରନ୍‌ଆଡଙ୍‌ ଅମ୍‌ଡୁଙ୍‌ବା, ସିଲଡ୍‌ତ୍ତେ ଗୋଡ଼େନ୍‌ ଅଞିଡ୍‌ତେ; ଆରି, ବିରୁଡନ୍‌ ଡ ଗନବ୍‌ରଜନ୍‌ ଅଡ୍‌କୋଏ । 11 ଅଙ୍ଗା ଆମନ୍‌ରା ଉଗ୍ଗରନ୍‌ ଆ ମଡ଼ିର୍‌ ଲଡୟ୍‌ତେ; ଆନା ଆ ଉସାଲ୍‌ତମ୍‌ ସନାୟୁମ୍‌ଡମ୍‌, ରାଜାନ୍‌ ଆ କୁଲମନ୍‌ ଡେତେ । 12 ସଦାପ୍ରବୁନ୍‌ ଆମଡ୍‌ ଗିଆନନ୍‌ ଆଞରାଙ୍‌ତେନ୍‌ ଆମନ୍‌ରାଆଡଙ୍‌ ଡୋବ୍‌ତେ; ବନ୍‌ଡ ବାଁୟ୍‌ସିମରନ୍‌ ଆବର୍ନେ ଆନିନ୍‌ ସବ୍‌ଡିଡ୍‌ତେ । 13 ଆଡ଼ସାମରନ୍‌ ବର୍ତନ୍‌, ଡାଣ୍ତଲୋଙନ୍‌ ସିଅଁକିଡନ୍‌ ଡକୋ; ଞେନ୍‌ ରୋତ୍ତଲୋଙନ୍‌ ରବୁତିଁୟ୍‌ । 14 ଡାରିବଜନ୍‌ ଆତଅଡ୍‌ ଜରୁ ଲୋଓଙ୍‌, ସଦାପ୍ରବୁନ୍‌ ଆ ଏଡ଼ୁର୍‌ମଡ୍‌ତେନ୍‌ ଆମନ୍‌ରା ତିତେତ୍ତେ ଗଲୋତେ । 15 ପସିଜନ୍‌ ଆମନଲୋଙ୍‌ ଏର୍‌ଗିଆନନ୍‌ ଆଡଙ୍‌ଡଙ୍‌ ଡକୋତନ୍‌, ବନ୍‌ଡ ସାସନଡାଙନ୍‌ ବାତ୍ତେ ଏର୍‌ଗିଆନନ୍‌ ତବ୍‌ଲେ ଆମଙନ୍‌ ସିଲଡ୍‌ ସବ୍‌ଙାୟ୍‌ତେ । 16 ଅଙ୍ଗା ଆମନ୍‌ରା ଆନର୍ଜେନ୍‌ ଆନବ୍‌ଗୋଗୋୟ୍‌ ଆସନ୍‌ ଡୋଲେୟ୍‌ମରନ୍‌ ଆଡଅଙ୍‌ ବବ୍‌ତଙ୍‌ତେ; ଆରି, ଅଙ୍ଗା ଆମନ୍‌ରା ଗମାଙ୍‌ମରନ୍‌ଆଡଙ୍‌ ତନିୟ୍‌ତିୟନ୍‌ ତିୟ୍‌ତେ ଆଜାଡ଼ିଡମ୍‌ ଆନିନ୍‌ ଅବାବ ଡେତେ ।

17 ଆମନ୍‌ ଡାଲୁଡ୍‌ଲେ ଗିଆନମରଞ୍ଜି ଆବର୍ନେ ଅମ୍‌ଡଙା; ଆରି ପଡ଼େନେଲୋଙ୍‌ଞେନ୍‌ ମନ୍ନନମ୍‌ ତିୟା । 18 ଇନିଆସନ୍‌ଗାମେଣ୍ତେନ୍‌ ଆମନ୍‌ ତିଆତେ ଉଗର୍‌ଲୋଙ୍‌ନମ୍‌ ଡକୋଏନ୍‌ଡେନ୍‌ ଆରି ଉସାଲ୍‌ତମ୍‌ନମ୍‌ ସରିନ୍‌ ତିଆତେ ମାୟ୍‌ଲନ୍‌ଡେନ୍‌, ମନଅଁୟ୍‌ଡାନ୍‌ ଡେତେ । 19 ଏଙ୍ଗାଲେ ଆମନ୍‌ ପ୍ରବୁନ୍‌ ଆମଙ୍‌ଲୋଙ୍‌ ଇଙ୍‌ଡର୍‌ଲନ୍‌ ଡକୋତନ୍‌, ତିଆସନ୍‌ ଲଙେ ଞେନ୍‌ ଆମନ୍‌ଆଡଙ୍‌ କେନ୍‌ ଅଡ଼୍‌କୋନ୍‌ ଆବର୍ନେ ଅବ୍‌ଜନାଲମ୍‌ । 20 ଞେନ୍‌ ଆମନ୍‌ ଆସନ୍‌ ତିରିସ୍‌ଟା ଗିଆନବରଞ୍ଜି ଇଡ୍‌ଲାୟ୍‌, କେନ୍‌ତେନ୍ନେ ମନଙ୍‌ ବୁଡ୍ଡିନ୍‌ ଡ ଗିଆନନ୍‌ ଆବରିୟ୍‌ ଡକୋ । 21 ଆମନ୍‌ଆଡଙ୍‌ ଆରାପ୍ପାୟ୍‌ଲମଞ୍ଜି ଆମନ୍‌ରାଜିଆଡଙ୍‌ ଏଙ୍ଗାଲେ ଆମନ୍‌ ଆଜାଡ଼ିନ୍‌ ବାତ୍ତେ ଜାଲଙ୍‌ଲେ ରପ୍ତିତେ, ତିଆସନ୍‌ ଞେନ୍‌ ଆମନ୍‌ଆଡଙ୍‌ ତି ଆଜାଡ଼ିବରନ୍‌ ଅଃନିଡ୍‌ଲାୟ୍‌ ପଙ୍‌ ? 22 ଅରିର୍ସୋୟମ୍‌ଡାନ୍‌ଆଡଙ୍‌ ଅରିର୍ସୋୟମ୍‌ଡାନ୍‌ ଜନାଲେ ଆ ଜନବନ୍‌ ରୁୟ୍‌ଲେ ଏପାଙ୍‌ଡଙ୍‌, ଆରି ଗଡ଼ାନ୍‌ ଆଡୁଆରାଲୋଙ୍‌ ଡୁକ୍କମରନ୍‌ ଆଡଅଙ୍‌ ଏବବ୍‌ତଙ୍‌ଡଙ୍‌ । 23 ଇନିଆସନ୍‌ଗାମେଣ୍ତେନ୍‌ ସଦାପ୍ରବୁନ୍‌ ଆନିଞ୍ଜି ଡନେଲେ ଡୁଲ୍‌ତିଡ୍‌ତନେ,ଆରି ଅଙ୍ଗା ଆମନ୍‌ରାଜି ଆ ଜନବଞ୍ଜି ରୁୟ୍‌ଲେ ପାଙ୍‌ତଜି, ଆନିନ୍‌ ଆ ପରାନ୍ନାଞ୍ଜି ରୁୟ୍‌ଲେ ପାଙ୍‌ତଜି । 24 ବରାବ୍‌ମରନ୍‌ ସରିନ୍‌ ଏସାଙ୍ଗଡଙ୍‌ନେ,ଆରି ବନ୍‌ଡ୍ରାବ୍‌ମରନ୍‌ ସରିନ୍‌ ଏତଙିୟ୍‌ଡଙ୍‌ନେ; 25 ଅସମଁୟ୍‌ ଏଗଡ଼ିଲନ୍‌ଡେନ୍‌, ଆମନ୍‌ ଆ ଞଣ୍ତ୍ରମ୍‌ ତଙରନ୍‌ ଞଙ୍‌ତନ୍‌, ଆରି ପରାନ୍ନାନମ୍‌ ଆସନ୍‌ ଅନୋଡ଼େଙନ୍‌ ତୁବ୍‌ତେ । 26 ଅଙ୍ଗା ଆମନ୍‌ରାଜି ଅଲ୍‌ତାସିତଜି ଅଡ଼େ ସାଉନ୍‌ ଆସନ୍‌ ତନଙ୍‌ତଜି ଅଡ଼େ ଜାମନିତଞ୍ଜି, ଆନିଞ୍ଜି ଆମଙ୍‌ଲୋଙ୍‌ ଆମନ୍‌ ଆନିଞ୍ଜି ଅନ୍ତମ୍‌ ଡେଡଙମ୍‌ । 27 ଅସମଁୟ୍‌ ଅନାବ୍‌ଡିଡନ୍‌ ଆସନ୍‌ ଅମଙ୍‌ନମ୍‌ ଇନ୍ନିଙ୍‌ ଅଃଡକୋଲୋଡେନ୍‌, ଆନିନ୍‌ ଇନିଆସନ୍‌ ବରେଲ୍‌ନେକାବ୍‌ନମ୍‌ ପାଙେ ? 28 ପୁର୍ବା ଜୋଜୋବେଞ୍ଜି ଅଙ୍ଗା ଆ ପାପୁର୍‌ ସଣ୍ତିନ୍‌ ତୁବେଞ୍ଜି, ତିଆତେ ଏଡେଡ୍‌ଡଙ୍‌ । 29 ଅନ୍ନିଙ୍‌ ଆମନ୍‌ରା ଆନିନ୍‌ଡମନ୍‌ ଆବେବାରଲୋଙ୍‌ ତନ୍ଦ୍ରାଉତ୍ରା ଆମନ୍‌ ଗିଜେନ୍‌ ପଙ୍‌ ? ଆନିନ୍‌ ରାଜାଞ୍ଜି ଆତେମଡ୍‌ଲୋଙ୍‌ ତନଙ୍‌ତେ । ଆନିନ୍‌ ସନ୍ନାମରଞ୍ଜି ଆମୁକ୍କାବା ଅଃତନଙେ ।