1 ଲମୁଏଲ ରାଜାନ୍‌ ଆବର୍ନେ କେନ୍‌ ଏନେଲେ ଆନନନ୍‌ ଆନିନ୍‌ଆଡଙ୍‌ ଇନି ଞଙେନ୍‌ ତି ଆବର୍ନେ କେନ୍‌ । 2 ଏ ଡାଙ୍ଗଡ଼ାଅଞେନ୍‌, ଏ ଆକ୍ରୋଡ୍‌ଲମନ୍‌ ଆ ଡାଙ୍ଗଡ଼ାଅନ୍‌, ଏ ବାସାଲନ୍‌ ଆଞରାଙ୍‌ଲମନ୍‌ ଆ ଡାଙ୍ଗଡ଼ାଅନ୍‌, ଞେନ୍‌ ଆମନ୍‌ଆଡଙ୍‌ ଇନି ବରମ୍‌ ? 3 ଆମନ୍‌ ଆଇବଜଞ୍ଜି ଆମଙ୍‌ ମଗାଡ୍‌ଲନ୍‌ ବୋର୍ସାନମ୍‌ ତିୟ୍‌ଡଙେ, ଅଡ଼େ ରାଜାଞ୍ଜି ଅଙ୍ଗାଲୋଙ୍‌ ଗୁରୁଡ୍ଡେତଜି, ତିତେତ୍ତେ ଜିର୍‌ଡଙେ । 4 ଏ ଲମୁଏଲ, ରାଜାଞ୍ଜି ଦ୍ରାକ୍ୟାଡାନ୍‌ ଆଗନା ମନଙ୍‌ତଡ୍‌, ରାଜାଞ୍ଜି ଦ୍ରାକ୍ୟାଡାନ୍‌ ଗାଡଙେଜିତଡ୍‌, ଅଡ଼େ ରାଜ୍ୟପାଡ଼ଞ୍ଜି ଅଲିନ୍‌ ଅଡ଼େଙ୍ଗା ଗାମ୍‌ଲେ ବର୍ଡଙ୍‌ନେଜିତଡ୍‌ । 5 ଆନିଞ୍ଜି ଅଲିନ୍‌ ଗାଏଞ୍ଜିଡେନ୍‌, ବନାଁୟ୍‌ବରନ୍‌ କରୋଡାତଜି,ଆରି ଅଡ଼୍‌କୋ ଅରିର୍ସୋୟମ୍‌ଡାନ୍‌ ଆମନ୍‌ରାଜି ଆପନ୍‌ସୁଆତି ଅବ୍ବାଡ଼ତଜି । 6 ଆଡୁଲ୍‌ମେଙନ୍‌ ଆମନ୍‌ରାଆଡଙ୍‌ ଅଲିନ୍‌ ତିୟା ଆରି ସିନ୍ତାଲନ୍‌ ଆଡ୍ରକୋତନ୍‌ ଆମନ୍‌ରାଆଡଙ୍‌ ଦ୍ରାକ୍ୟାଡାନ୍‌ ତିୟା । 7 ତି ଆମନ୍‌ରା ଗାଲେ ଆଡୋଲଜନ୍‌ କରୋଡାଏତୋ ଆରି ଆ ପରାନ୍‌ଡଣ୍ତନ୍‌ ମନ୍ନେ ଡଙ୍‌ତଡ୍‌ । 8 ଆଜାଡ୍ଡାମରନ୍‌ ଡ କୋନ୍‌ରାମରଞ୍ଜି ଡନ୍ନେଡାଲେ ବର୍ନେନ୍‌ ବର୍ନା । 9 ଅପୁଡ୍‌ତମ୍‌ଲନ୍‌ ମନଙ୍‌ ପନ୍‌ସୁଆତିଆ,ଆରି ଡୁକ୍କମରନ୍‌ ଡ ଡୋଲେୟ୍‌ମରଞ୍ଜି ଆସନ୍‌ ମନଙ୍‌ ପନ୍‌ସୁଆତିନ୍‌ ଲୁମା ।

10 ଗୁନଡମନ୍‌ ଆଇବୟ୍‌ ଆନା ଞାଙ୍‌ଲେ ରପ୍ତିଏ ? ତିଆତେ ମୁକ୍ତାନ୍‌ ସିଲଡ୍‌ ଗୋଗୋୟ୍‌ ମଡ଼ାଗା । 11 ଆଅୟ୍‌ତବନ୍‌ ଆ ଉଗ୍ଗର୍‌ ଆମଙ୍‌ଲୋଙନ୍‌ ଆସାଲନ୍‌ ଡର୍ତନେ,ଆରି ଆ ଲାବନ୍‌ ଆଙିଁୟ୍‌ଜା ଅଃନସୋଜେ । 12 ଆନିନ୍‌ ଆମେଙ୍‌ମଡ୍‌ତାନ୍‌ ଜାୟ୍‌ ଆଅୟ୍‌ତବନ୍‌ଆଡଙ୍‌ ଅବ୍‌ସୁକ୍କାତେ । 13 ଆନିନ୍‌ ମେଣ୍ତାନ୍‌ ଆଉପୁର୍‌ ଡ ଲମନ୍‌କାବ୍‌* ସାୟ୍‌ଲେ ଆସିଡମନ୍‌ ବାତ୍ତେ ସପାନ୍‌ ପଡ୍‌ତେ । 14 ଆନିନ୍‌ ବେପାର ଜାଜନ୍‌ ଅନ୍ତମ୍‌; ଆନିନ୍‌ ସଙାୟ୍‌ ସିଲଡ୍‌ ଆଜନୋମନ୍‌ ପାଙ୍‌ତାୟ୍‌ । 15 ଆରି ଆନିନ୍‌ ଅନ୍‌ରଙ୍‌ତଗାଡେନ୍‌ ଆମ୍ମୁଙ୍‌ ଆସିଙ୍‌ମରଞ୍ଜି ଆସନ୍‌ ଡିଁୟ୍‌ଡିଁୟ୍‌ତନ୍‌ ଆରି ଡିଲେ କମ୍ୱାରିବଜଞ୍ଜିଆଡଙ୍‌ ରମ୍ମଙ୍‌ ରମ୍ମଙ୍‌ ଆକାବ୍ବାଡ଼ା ବାଁୟ୍‌ତଜି । 16 ଆନିନ୍‌ ବସେଙନ୍‌ ସେକୁଲେ ଞିତେ,ଆରି ଆନିନ୍‌ ଦ୍ରାକ୍ୟାନୁବନ୍‌ ଗୁତେ । 17 ଆନିନ୍‌ ଆ ବପ୍ପୁଡମନ୍‌ ବାତ୍ତେ ରେବ୍‌ଡୁବ୍‌ତନ୍‌ ଆରି ଆନିନ୍‌ଡମନ୍‌ ଆଡେନ୍ନା ଅବୋର୍ସାତେ । 18 ଆନିନ୍‌ ଆବେପାରନ୍‌ ଲାବତେ ଗାମ୍‌ଲେ ଜନାତେ ଆରି ଆନିନ୍‌ ତଗଲନ୍‌ ଆ ପିଙ୍କତୋଡନ୍‌ ଅପଞିଡେ । 19 ଆନିନ୍‌ ଆରଞେଡାଙ୍‌ ଞମ୍‌ଲେ ତାଡ଼େରନ୍‌ ତୁବ୍‌ତେ,ଆରି ଆନିନ୍‌ ଆସିନ୍‌ ବାତ୍ତେ ସିନ୍‌ରିନ୍‌ ପଡ୍‌ତେ । 20 ଆନିନ୍‌ ଡୁକ୍କମରଞ୍ଜି ଡ ଡୋଲେୟ୍‌ମରଞ୍ଜି ଆଡଅଙ୍‌ ଗିୟ୍‌ଲେ ଉର୍ପାଡ୍‌ସିଲନ୍‌ ତନିୟ୍‌ତିୟନ୍‌ ତିୟ୍‌ତେ । 21 ଆନିନ୍‌ ରଙାନ୍‌ ଆସନ୍‌ ଆସିଙ୍‌ମରଞ୍ଜି ଆ ବିସୟଲୋଙ୍‌ ଅବତଙେ; ଇନିଆସନ୍‌ଗାମେଣ୍ତେନ୍‌ ଅଡ଼୍‌କୋନ୍‌ ଆସିଙ୍‌ମରଞ୍ଜି ପଞୁମ୍‌କାବ୍‌ ଜିଜିତଞ୍ଜି । 22 ଆନିନ୍‌ଡମନ୍‌ ଆସନ୍‌ ଆରିଗେରିଗେନ୍‌ ଆୟନୁମ୍‌କାବ୍‌ ଅବ୍‌ଜାଡାତେ,ଆରି ଆନିନ୍‌ ଲମନ୍‌ ସିଲ୍‌କୁକାବନ୍‌ ଡ କୋର୍ଗଡ୍‌ଗୁର୍‌ଗୋନ୍‌ ଆସିନ୍‌ରି ଜିଜିତନ୍‌ । 23 ଆଅୟ୍‌ତବନ୍‌ ପାପୁର୍‌ମରଞ୍ଜି ସରିନ୍‌ ଗଡ଼ାନ୍‌ ଆଡୁଆରାଲୋଙ୍‌ ତଙ୍କୁମେନ୍‌ ଆଡିଡ୍‌ଡେନ୍‌ ଅନବ୍‌ମଡନ୍‌ ଡେତେ । 24 ଆନିନ୍‌ ଲମନ୍‌କାବନ୍‌ ତୁବ୍‌ଲେ ତମ୍‌ତେ,ଆରି ବେପାରମରଞ୍ଜି ଆସିଲୋଙ୍‌ ରନେଡ୍ଡୁବନ୍‌ ତମ୍‌ତେ । 25 ବପ୍ପୁନ୍‌ ଡ ପନେମେଙନ୍‌ ସିନ୍‌ରିନ୍‌ ଅନ୍ତମ୍‌ ଜିଜିତନ୍‌; ଆରି, ତିକ୍କି ଆଓୟୋଙ୍‌ ଆସନ୍‌ ଆନିନ୍‌ ଅବତଙେ । 26 ଆନିନ୍‌ ଗିଆନନ୍‌ ବାତ୍ତେ ଜାଲଙ୍‌ତେ; ଆଲାଙ୍‌ଲୋଙନ୍‌ ସନାୟୁମ୍‌ ବନାଁୟ୍‌ବରନ୍‌ ଡକୋତେ । 27 ଆନିନ୍‌ ଆସିଙ୍‌ମରଞ୍ଜି ଞଣ୍ତ୍ରମ୍‌ନେଲୋଙ୍‌ ଡାଲୁଡ୍‌ତେ; ଆରି, ଆଡ଼ସାଲନ୍‌ ଜନୋମ୍‌ଜୋମଞ୍ଜି ଅଃଜୋମେ । 28 ଆଅନଞ୍ଜି ଡୋଲନ୍‌ ଆନିନ୍‌ଆଡଙ୍‌ ସେଙ୍କେତଜି ଆରି ଆଅୟ୍‌ତବନ୍‌ ନିୟ୍‌ ତିଅନ୍ତମ୍‌ ଆନିନ୍‌ଆଡଙ୍‌ ସେଙ୍କେତେ । 29 "ଜବ୍ର ଆଇବଜଞ୍ଜି ଆମଙ୍‌ ଗୁନନ୍‌ ଡକୋ ବନ୍‌ଡ ଆନିଞ୍ଜିଲୋଙ୍‌ ସିଲଡ୍‌ ଆମନ୍‌ ଗୁନଡମ୍‌ ।" 30 ମନନଙନ୍‌ ବୁର୍ଡଗୋ ଆରି ଅନସେଲନ୍‌ କାଜ୍ଜାନ୍‌; ବନ୍‌ଡ ଅଙ୍ଗା ଆଇବୟ୍‌ ସଦାପ୍ରବୁନ୍‌ଆଡଙ୍‌ ବତଙ୍‌ତେ, ଆନିନ୍‌ ସନେଙ୍କେନ୍‌ ଡେତେ । 31 ଆଲନୁମ୍‌କୁଜନ୍‌ ଆନିନ୍‌ଆଡଙ୍‌ ତିୟ୍‌ବା; ଆରି, ଗଡ଼ାନ୍‌ ଆଡୁଆରାଲୋଙ୍‌ ମନ୍‌ରାଞ୍ଜି ଆନିନ୍‌ଆଡଙ୍‌ ସେଙ୍କେଏତଜି ।