Juan 20

Ya pagpakitaꞌ ni Jisus kan Maria na taga Magdala

11 Manang si Maria, kenneꞌ nan nyinindeg adti luwaꞌ na ilib na gayed migsugaw. Talana nan migsugaw, gyumukung sakanan aw syumilib adti piglebengan. 12 Aw kyinitaꞌ nan na awun duwa ya anghil na syumut sa maputiꞌ. Aw dun silan ingkud ni kyabetangan sa lawas ni Jisus, sambuk apit adti ulunan aw ya sambuk apit adti tuwadan. 13 Aw nyusip silan kan Maria, "Anangaꞌ kaw magsugaw?" Aw tyumubag si Maria, "Pigkamang du-an nilan ya lawas na kanaken Matas na Pangulu, aw walaꞌ ku ka-ede-i kun ayin nilan betangan." 14 Pagkatigkas ni Maria maglong, lyumingiꞌ sakanan aw pigkitaꞌ nan si Jisus na nyinindeg adti luwaꞌ manang walaꞌ nan kilala͡a na si Jisus kadiꞌ ya pigkitaꞌ nan. 15 Aw nyusip si Jisus kanan, "Anangaꞌ kaw magsugaw? Singalan ya pigpaninaw mu?" Na, iman ni Maria aw yeiy ya utaw na migsanggilaꞌ sa tanemanan, yanagaw miglong sakanan, "Kay Sir, kun ikaw ya migkamang sa lawas nan, ubatan beg kanak kun ayin mu betangan kay kamangen ku ya lawas nan." 16 Aw miglong si Jisus kanan, "Kay Maria." Aw nyatubang si Maria kan Jisus aw law nan, "Rabboni!" Na, ya kakawasan na Rabboni adti tingeg na Hibriyu: Magpalna-uway. 17 Aw miglong si Jisus kanan, "Diliꞌ aku mu pag-awidan, kay walaꞌ pa aku ka-engat adti tampid na Ama. Manang kadtuwi baling ya manga inulug ku aw ubat-ubati silan na ma-engat aku adti kanaken Ama na kamayu uman Ama. Yan ya kanaken Tyumanem aw ya kamayu uman Tyumanem." 18 Yanagaw nyadtu si Maria na taga Magdala adti manga umagakan ni Jisus, aw piglongan nan silan, "Pigkitaꞌ ku ya kanaten Matas na Pangulu!" Aw pig-ubat nan uman kanilan ya piglong ni Jisus kanan.