1 Ini ya tultulanen sa manga tyugbulan ni Jisu-Kristu: Si Jisus lekat adti buwadbuwad na hariꞌ na si Dabid, aw si Dabid lekat adti buwadbuwad ni Abraham.

2 Na, si Abraham, yan ya ama ni Isa-ak,

aw si Isa-ak, yan ya ama ni Jakub.

Aw si Jakub, yan ya ama ni Juda aw manga inulug nan.*

3 Si Juda, yan ya ama ni Paréz aw si Zéra na pingin na alag eseg. Si Tamar ya ina nilan.

Aw si Paréz, yan ya ama ni Hézron,

aw si Hézron, yan ya ama ni Aram.

4 Si Aram, yan ya ama ni Aminadab,

aw si Aminadab, yan ya ama ni Na-asyon.

Aw si Na-asyon, yan ya ama ni Salmon.

5 Aw si Salmon, yan ya ama ni Boaz. Aw ya ina ni Boaz si Rahab.

Aw si Boaz, yan ya ama ni Obéd. Aw ya ina ni Obéd si Ruth.

Si Obéd, yan ya ama ni Jési,

6 aw si Jési, yan ya ama ni Dabid.

Aw si Dabid nya-imoꞌ hariꞌ na banwa na Isra-él.

Aw si Dabid, yan ya ama ni Solomon magi sa ka͡ubayan ni Uriyas.

7 Si Solomon, yan ya ama ni Robowam,

aw si Robowam, yan ya ama ni Abiyas.

Aw si Abiyas, yan ya ama ni Asa.

8 Aw si Asa, yan ya ama ni Josapat,

aw si Josapat, yan ya ama ni Joram.

Aw si Joram, yan ya ama ni Usiyas,*

9 aw si Usiyas, yan ya ama ni Jotam.

Aw si Jotam, yan ya ama ni Akas,

aw si Akas, yan ya ama ni Hézékiyas.

10 Aw si Hézékiyas, yan ya ama ni Manasés,

aw si Manasés, yan ya ama ni Amon.

Si Amon, yan ya ama ni Josiyas,

11 aw si Josiyas, yan ya ama ni Jékonyas* aw ya manga mangkangud nan. Na, dun ni manga allaw nilan, ya madég na manga utaw na sakup na Juda pigtaban na manga taga Babiloniya.

12 Aw dun ni banwa yan, si Jékonyas ya ama ni Salati-él.

Aw si Salati-él, yan ya ama ni Zérubabél.

13 Aw si Zérubabél, yan ya ama ni Abiyud.

Aw si Abiyud, yan ya ama ni Éliyakim,

aw si Éliyakim, yan ya ama ni Azor.

14 Si Azor, yan ya ama ni Zadok,

aw si Zadok, yan ya ama ni Akim.

Aw si Akim, yan ya ama ni Éliyud,

15 aw si Éliyud, yan ya ama ni Éliyazar.

Si Éliyazar, yan ya ama ni Matan,

aw si Matan, yan ya ama ni Jakub.

16 Aw si Jakub, yan ya ama ni José,

aw si José, yan ya eseg ni Maria.

Aw adti kan Maria ka͡utaw si Jisus.

Aw si Jisus, yan ya pigtawag na Kristu.

17 Yanagaw awun sampuluꞌ tag upat (14) ka alintuwad ya buwadbuwad lekat kan Abraham mendaꞌ adti kan Dabid. Aw awun sampuluꞌ tag upat (14) uman ka alintuwad ya buwadbuwad lekat kan Dabid mendaꞌ sa allaw na pigtaban na manga taga Babiloniya ya manga utaw na Juda. Aw awun sampuluꞌ tag upat (14) ka alintuwad lekat na allaw na pagtaban mendaꞌ sa pagka͡utaw na Kristu.

18 Ini ya nya-imoꞌ dun ni pagka͡utaw ni Jisu-Kristu: Ya ina nan si Maria na tawas ni José. Manang sa walaꞌ pa silan pag-ipid, kya-ede-an da ni Maria na nyabdes sakanan magi sa Ispiritu Santo. 19 Na, si José gayed sakanan dyumalug sa Uldin na manga Judiyu.* Aw diliꞌ sakanan malim na mulamula͡en ya tawas nan adti asdangan na manga utaw. Yanagaw migpalpa sakanan na atagan nan na papilis sa pag-ayaw na walaꞌ ya utaw na maka-edeꞌ. 20 Manang sa gayed pa nan yeiy pig-anenganeng, awun anghil na Tyumanem na migpakitaꞌ kanan magi sa tagaynep aw law nan, "We… José na buwadbuwad ni Dabid. Diliꞌ kaw magduwaduwa magpanga͡ubayan kan Maria. Kay ya pagkabdes nan, magi saba sa Ispiritu Santo. 21 Aw ka͡utawan sakanan sa iseꞌ na eseg. Aw ngalanan mu ya iseꞌ na ‘Jisus’ kay un nan paluwa-en ya kanan manga utaw lekat adti manga salaꞌ nilan."

22 Na, dun ni kadég yeiy na nya-imoꞌ, nyatuman da ya pigpasulat na Tyumanem magi sa propita nan asini muna: 23 "Pakanyegi! Awun sambuk na dalaga na mabdes pangkay walaꞌ pa ka-ilabeti, aw mag-iseꞌ sakanan sa iseꞌ na eseg aw pagtawagen nilan sakanan na Imanwél na ya kakawasan: Ya Tyumanem asini sayid tadun."*

24 Sa pagmata ni José, pigtuman nan ya piglong kanan na anghil, aw pigpanga͡ubayan nan si Maria. 25 Manang walaꞌ pa nan ipidi mendaꞌ na kya͡utawan da si Maria sa iseꞌ nan na eseg. Aw pigngalanan ni José ya iseꞌ yeiy na "Jisus."