1 Sa pagkitaꞌ ni Jisus sa to-o madég na manga utaw na dyumalug kanan, tyumukud sakanan tagbiꞌ dun ni buntud aw nyingkud dun. Aw dyumulud uman ya kanan manga umagakan. 2 Aw pigpalekat nan ya pagpalna-u kanilan, miglong sakanan:

3 "Madyaw ya kana manga utaw na nyaka-edeꞌ na kun walaꞌ ya Tyumanem walaꞌ ya mabatug nilan. Kay nyaka-akup da silan adti Kasakupan na Pighari-an na Tyumanem.

4 "Madyaw ya kana manga utaw na migkalat ya ginawa nilan adun, kay lala͡en saba silan na Tyumanem.

5 "Madyaw ya kana manga utaw na gayed migpadalem, kay matagtun nilan ya kadakulaꞌ na banwa.

6 "Madyaw ya kana manga utaw na migtibagseg dyumalug sa pagkaliman na Tyumanem. Kay tabangan nan saba silan pada matuman ya kanilan pigtibagsegan.

7 "Madyaw ya kana manga utaw na magkallat sa eped, kay kallatan silan uman na Tyumanem.

8 "Madyaw ya kana manga utaw na walaꞌ ya un pagsalaꞌ sa bet nilan asuntu na malinis ya kanilan anenganeng. Kay kita-en saba nilan ya Tyumanem.

9 "Madyaw ya kana manga utaw na gayed migpa-iyuliꞌ sa manga eped. Kay ya manga utaw na migpa-iyuliꞌ, tawagen silan na mangayseꞌ na Tyumanem.

10 "Madyaw ya kana manga utaw na pyamulayaman asuntu na pig-imoꞌ nilan ya pagkaliman na Tyumanem. Kay nyaka-akup da silan adti Kasakupan na Pighari-an nan.

11 "Madyaw ya kamayu kun pigsupla kamu na manga utaw aw pigpamulayaman kamu nilan aw pigtanemtaneman kamu na tingeg asuntu sa pagdalug mayu kanak. 12 Yanagaw pagleya kamu, kay dakulaꞌ saba ya madawat mayu na pigtagilan da adti tas na langit. Pangkay ya manga propita na Tyumanem asini muna, pigpamulayaman uman silan."

13 Migpadeleg si Jisus miglong, "Asini tas na lupaꞌ, kasiling kamu na asin. Kun ya asin kalagakan sa nanam, diliꞌ da makalikuꞌ ya ka͡asin nan, yanagaw salabel da adti luwaꞌ aw gina-gina-an na manga utaw. Maynan uman, kun malagak ya palangad ka͡asin mayu walaꞌ ya ma-untung na manga utaw adti kamayu.

14 "Kasiling kamu uman na saleng na syumiga aw nyatag sa kalalamdag adti kadég na manga utaw. Aw ya syudad na adti tas na buntud, diliꞌ saba kasalibenan. 15 Aw walaꞌ ya utaw na magsuluꞌ sa salengan pada sangkuban nan. Manang betang nan baling adti bantawanan pada ka-ilawan ya kadég na awun ni seled na balay. 16 Maynan uman, pakita-an mayu ya kamayu imo-unun na madyaw kasiling na kalalamdag na pagkita-en na manga utaw. Aw magi sa pigpan-imoꞌ mayu, deyen nilan ya Ama mayu na adti tas na langit.

17 "Ya-i mayu pag-anenganenga na nyadi aku na un sayuwan ya Uldin aw ya pigsulat na manga propita na Tyumanem asini muna, kay bekeꞌ na maynan ya tud ku. Yan saba ya pigkadi ku na un tumanen ya pigsulat nilan. 18 Matinaw ya un ku paglongun kamayu: Talana na ini pa ya langit aw ya lupaꞌ, diliꞌ ma-uman ya pangkay tagbiꞌ na kulis na pigpasulat dun ni Uldin, mendaꞌ na matuman ya kadég. 19 Pangkay singalan ya diliꞌ magbetang sa ginawa sa pangkay sambuk na suguꞌ na awun ni Uldin aw kun palna-u nan uman ya maynan adti manga eped, yan na utaw to-o tagbiꞌ ya kanan dengeg adti Kasakupan na Pighari-an na Tyumanem. Manang ya utaw na dumalug sa manga suguꞌ dun ni Uldin aw palna-u nan adti manga eped, matas ya dengeg nan dun ni Kasakupan na Tyumanem. 20 Yanagaw paglongun ta kamu na dun ni pagdalug mayu sa pagkaliman na Tyumanem, labawan pa mayu ya pagtibagseg na manga Parisiyo aw manga magpalna-uway sa Uldin. Kay kun diliꞌ mayu kalabawan, diliꞌ kamu maka-akup adti Kasakupan na Pighari-an na Tyumanem.

21 "Na, kya-ede-an da mayu saba ya pigpalna-u adti manga mangkabaklegay tadun lekat pa idtu muna: ‘Diliꞌ kamu magpatay sa eped na utaw,’ * aw ‘Pangkay singalan ya magpatay, yan ya pasala-en adti pag-usay.’

22 "Manang ini ya kanak paglongun kamayu: Pangkay singalan ya to-o madaman adti eped nan na walaꞌ ya tengteng indeganan, yan uman ya pasala-en adti pag-usay. Aw pangkay singalan ya maglong sa malatay adti eped nan, pasala-en uman sakanan adti matas na usayanan. Aw pangkay singalan ya maglong adti eped nan na ‘Walaꞌ ya utuk mu,’ yan ya datengan na utaw yan, ya atulun na diliꞌ pagkapatayan.* 23 Yanagaw pangkay kinunu kaw pagdugsuꞌ dun ni Témplo na Tyumanem aw ka-anenganengi mu na awun kadiꞌ eped na migdiklamu kanmu, 24 diliꞌ pa mu pagdugsuꞌ adti Tyumanem ya pigdala mu. Ayawan pa mu malapit dun ni dugsu-anan, aw kadtuwi ya utaw na awun diklamu kanmu, aw una kamu pag-uli-uli-ay. Tigkas yan, likuꞌ kaw aw dugsu-an da adti Tyumanem ya pigdala mu.

25 "Aw kun limanda kaw na sambuk na utaw aw dala͡en kaw nan adti usayanan, madyaw pa na maksay kamu magkakadyaway talana na walaꞌ pa kamu dateng adti usayanan. Pagaw kun dumateng kamu dun, padakep kaw baling na mag-usayay aw pakalabusu kaw nan. 26 Matinaw saba ya paglongun ku: Kun makalabusu la kaw, diliꞌ pa kaw paluwa-en kun diliꞌ mu kabayadan ya kadakulaꞌ na salaꞌ na nya-imoꞌ mu.

27 "Aw kya-ede-an da mayu saba ya pigpalna-u lekat pa idtu muna: ‘Diliꞌ kamu maglakadenen.’*

28 "Manang ini ya kanak paglongun kamayu: Pangkay singalan esega ya minunu sa eped na ka͡ubayan na awun pagkaybeg, na, miglakadenen da sakanan adti anenganeng nan. 29,30 Yanagaw kun ya pag-inunu mu aw ya pag-awid mu, yan ya du-an na maka-imoꞌ kaw sa salaꞌ, madyaw pa baling na magpakawat kaw sa pangkay unu ya makapabuyu kanmu adti pag-imoꞌ sa salaꞌ. Pangkay pa kun lugiten mu ya kanmu mata aw pangkay pa kun utudun mu ya kanmu taklayan, madyaw pa na awun malagak dun ni kanmu lawas kay sa pa-emel-emelen ya kadakulaꞌ na lawas mu adti atulun na diliꞌ pagkapatayan.

31 "Aw kya-ede-an da mayu ya pigpalna-u lekat pa idtu muna: ‘Pangkay singalan esega ya mayaw sa ka͡ubayan nan, matag sakanan una sa sulat na yan ya magmatinaw na mag-ayaw silan.’*

32 "Manang ini ya kanak paglongun kamayu: "Kun awun eseg na ayawan nan ya kanan ka͡ubayan na walaꞌ pagkasala-enen adti sambuk na eseg, aw kun mangugnan ya ka͡ubayan nan salut, liwan na yan ya migtulud sa ka͡ubayan nan adti paglakadenen. Aw ya eseg na nyangugnan sa ka͡ubayan na pig-ayawan miglakadenen uman sakanan.

33 "Aw kya-ede-an da mayu ya pigpalna-u lekat pa idtu muna: ‘Kun magsapaꞌ kaw adti Tyumanem, ya-i pagkalata ya pigsapaꞌ mu, manang tumana baling ya pigsapaꞌ mu.’*

34 "Manang ini ya kanak paglongun kamayu: Diliꞌ da kamu magsapaꞌ. Aw diliꞌ mayu pagpamatinawun ya adti tas na langit kay yan ya trunu na Tyumanem. 35 Aw diliꞌ mayu uman pagpamatinawun ya kadakulaꞌ na banwa kay yan ya gina-anan na siki nan. Aw diliꞌ mayu uman pagpamatinawun ya syudad na Jérusalim kay yan ya syudad na matas na Hariꞌ. 36 Aw diliꞌ kamu magsapaꞌ magi sa kamayu pagka-utawun, kay bekeꞌ mayu ya magbayaꞌ sa kamayu ginawa asini tas na lupaꞌ. Pangkay ya sambulus na batang na kamayu lugay, diliꞌ mayu saba mabatug paputi-en aw pakaytemen. 37 Yanagaw adti paglong mayu, ya e-e imo-a na ‘E-e.’ Manang ya diliꞌ, imo-a na ‘Diliꞌ.’ Kay kun dugangan mu na sapaꞌ ya piglong mu, kan Satanas da yan.

38 "Kya-ede-an mayu uman ya pigpalna-u lekat pa idtu muna: ‘Kun makabuta ya utaw sa eped nan, buta͡en uman sakanan. Kun maka-ipuꞌ ya utaw sa untu na eped nan, ipu-un uman ya kanan.’*

39 "Manang ini ya kanak paglongun kamayu: Diliꞌ kamu magmalit sa utaw na migpakalat kamayu. Kun sampalen nan ya gya mu, pasampalan uman kanan ya sangkilid. 40 Maynan uman, kun awun maglimanda kanmu adti usayanan aw kaliman nan kamangen ya sambuk na kadégkadég mu na palangad multa, na, atagan kanan ya pigkaliman nan aw atagi pa uman na sambuk. 41 Aw kun awun sundalu na leges nan pababa kanmu ya kabil nan na sangka kilomitro, dala͡en mu adti duwangka kilomitro. 42 Yanagaw, kun awun utaw na magsekat adti kanmu, diliꞌ mu pagdemetan. Aw kun awun utaw na meles adti kanmu, diliꞌ mu uman pagtalikudan.*

43 "Kya-ede-an mayu uman ya paglongun na eped na utaw: ‘Ginawayi ya kanmu manga ubaybay aw dumutan mu ya kanmu manga po-on.’

44 "Manang ini ya kanak paglongun kamayu: Ginawayi mayu baling ya kamayu manga po-on, aw panawagtawagi mayu adti Tyumanem ya manga nyamulayam kamayu. 45 Kun maynan ya imo-un mayu, dun da ka-ede-i na kamu ya tengteng na mangayseꞌ na Tyumanem na yan ya Ama tadun na awun ni tas na langit. Kay pyasilatan nan ya kadég na manga utaw, pangkay ya mangkalatay ya bet aw pangkay ya mangkadyaw ya bet. Aw pya-ulanan nan uman ya kadég na manga utaw pangkay ya dyumalug sa pagkaliman nan aw pangkay uman ya walaꞌ dalug. 46 Kun yan oloꞌ ya ginawa͡an mu ya gyuminawa kanmu, ayin da ya kadyaw na pig-imoꞌ mu? Pangkay ya manga mangungubla͡ay sa buwis,* pigginawa͡an nilan saba ya kanilan manga ubaybay. 47 Aw kun yan oloꞌ ya pakadyawun mu ya gyuminawa kanmu, na unu kaꞌ, awun kadyaw na pig-imoꞌ mu? Pangkay ya manga utaw na walaꞌ pangintu-u sa Tyumanem, pigpakadyaw nilan ya kanilan manga ubaybay.

48 "Yanagaw, dun ni kadég na imo-unun mayu, dayaw silingi ya bet na Ama mayu na awun ni tas na langit, kay walaꞌ ya salaꞌ dun ni kanan.