1 Sambuk na allaw yan, awun dyumateng lekat adti Jérusalim na manga Parisiyo aw manga magpalna-uway sa Uldin na manga Judiyu. Aw dyumulud silan adti kan Jisus, 2 aw nyusip silan, "Anangaꞌ na manga umagakan mu lakadan ya manga katanem na mangkabaklegay tadun?* Kay ya kanmu manga umagakan, kyuman silan na walaꞌ una pag-unaw kasiling na pa-agi na pigdalug na kanaten mangkabaklegay!" 3 Manang nyusip si Jisus kanilan, "Kamu uman, anangaꞌ mayu lakadan ya suguꞌ na Tyumanem magi sa pagdalug mayu sa kamayu katanem? 4 Kay yan saba ya suguꞌ na Tyumanem asini muna dun ni Uldin, ‘Pagbasa͡an mayu ya kamayu ama aw ina’* aw ‘Pangkay singalan ya maglong sa malatay adti kanan ama aw ina, patayen ya utaw yan.’* 5 Manang sangkamuluꞌ ya pigpalna-u mayu. Kay pigpalna-uwan mayu ya manga utaw na maglong silan adti kanilan ama aw ina, ‘Pasinsiyayi beg aku, kay walaꞌ da ya kabatug ku magtabang kamayu, kay pigtani la ku adti Tyumanem ya un ku galu atag adti kamayu.’ 6 Yanagaw dun ni kamayu pigpalna-u aw pigpan-imoꞌ, kasiling na pigtumbay mayu baling adti utaw na pabaya-an nilan ya kanilan mangkatikadeng. Pigpalipaslipasan mayu ya suguꞌ na Tyumanem, asuntu oloꞌ sa manga katanem mayu. 7 Migtallalingu kamu! Matinaw saba ya pigpasulat dadan kan Isayas sa bet mayu, law na Tyumanem:

8 ‘Ya manga utaw ini, pigbasa͡an aku nilan magi oloꞌ dun ni paglong nilan,

manang ya kanilan anenganeng mawat adi kanak.

9 Walaꞌ ya guna na pagsimba nilan kanak,

kay pigsayuwan nilan baling ya kanak manga suguꞌ sa palna-u na pig-imo-imoꞌ oloꞌ na manga utaw.’ "*

10 Tigkas yan, pigtawag ni Jisus ya madég na utaw, aw piglongan nan silan, "Pakanyegi aw anenganenga mayu ya un ku paglongun: 11 Bekeꞌ na pagkanen na utaw ya makapalipaꞌ kanan, manang ya tingeg nan na malatay na lyumekat adti kanan anenganeng, yan saba ya makapalipaꞌ kanan."

12 Tigkas yan, nyusip kan Jisus ya kanan manga umagakan, "Unu, kya-ede-an mu na nyadaman ya manga Parisiyo asuntu sa piglong mu?" 13 Manang tyumubag si Jisus kanilan, "Ya kanak Ama na awun ni tas na langit, un nan saba panggabutun ya kadég na tanem na walaꞌ nan tanema. 14 Pabaya-i la ya manga utaw yan! Buta silan na gayed miggagad sa eped nilan na buta. Aw kun ya buta gagaden na sambuk na buta, na, alag silan molug adti gawang." 15 Pagkatigkas yan, miglong si Pédro kan Jisus, "Ubatan beg kanami ya kakawasan na pundinganan mu kakayna kun unu ya makapalipaꞌ sa utaw." 16 Aw miglong si Jisus kanilan, "Pangkay kamu uman walaꞌ pa pakalabet sa kakawasan na piglong ku? 17 Walaꞌ kaꞌ mayu ka-ede-i na pangkay unu ya kanen na utaw, alag lumos adti buntit nan aw diliꞌ madugay lumuwaꞌ adti lawas nan? 18 Manang ya paglongun na utaw, yan ya lyumekat adti anenganeng nan. Aw yeiy saba ya makapalipaꞌ sa utaw adti Tyumanem. 19 Kay ya anenganeng na utaw, yan ya lyekatan sa kadég na malatay kasiling na pagpatay sa eped na utaw, aw ya paglakadenen, aw ya pagkasala-enen, aw ya pagpanakaw, aw ya pagmatinaw sa galuꞌ adti asdangan na mag-usayay, aw ya paglong sa makapagkalat sa dengeg na eped na utaw. 20 Yeiy alag ya makapalipaꞌ sa utaw. Manang kun kuman ya utaw na diliꞌ mag-unaw, diliꞌ yan makapalipaꞌ kanan."

21 Pagkatigkas yan, pig-indegan ni Jisus ya banwa na Galiliya, aw nyadtu sakanan ni banwa na sakup na manga syudad na Tiro aw Sidon. 22 Aw awun nyeyaꞌ dun na ka͡ubayan na Héntil na lekat adti buwadbuwad ni Canaan. Aw sa pagdengeg nan na dyumateng si Jisus, nyadtu sakanan ni sayid nan aw gayed nyanginayuꞌ, law nan, "Kay Sir na buwadbuwad ni Dabid, kallati beg aku! Ya iseꞌ ku na bubay, pigpati-is sakanan to-o na busaw na syumeled kanan." 23 Manang walaꞌ ni Jisus tubaga ya ka͡ubayan. Aw dyumulud uman dun ya kanan manga umagakan aw miglong silan kan Jisus, "Ayin ya madyaw aw papanawun da ya ka͡ubayan yeiy, kay gayed sakanan mig-agad-agad kanaten aw gyumelgel nyangilalat." 24 Pagkatigkas yan, miglong si Jisus adti ka͡ubayan, "Pigpadala aku adti buwadbuwad ni Isra-él kay kasiling silan na manga karniro na nyakasuway asuntu na walaꞌ ya migdiyaga kanilan. Walaꞌ pa saba dateng ya allaw na tabangan ta kamu na manga Héntil." 25 Manang migpalapit kanan ya ka͡ubayan aw lyumuhud adti asdangan nan, aw to-o nyangilalat, law nan, "Kay Sir, tabangi aku beg!" 26 Aw tyumubag si Jisus magi sa pundinganan, "Diliꞌ madyaw kun kamangen ya pan na mangayseꞌ aw agbel adti manga iduꞌ." 27 Manang miglong ya ka͡ubayan, "Kay Sir, matinaw ya piglong mu, manang pangkay ya manga iduꞌ makakan saba sa manga mumuꞌ na mangkataktak lekat adti lamisa na tagtun kanilan." 28 Sa pagdengeg ni Jisus sa tubag na ka͡ubayan, piglongan nan sakanan, "Kay Déꞌ, tay sa kadakulaꞌ na pagpangintu-u mu kanak! Matuman saba ya pigsekat mu." Aw dun ni udas yan, dayaw kyaguli-an ya iseꞌ na ka͡ubayan.

29 Pagkatigkas yan, pig-indegan ni Jisus ya banwa yan, aw nyadtu sakanan adti ligad na Danaw na Galiliya. Aw tyumukud sakanan adti buntud aw nyingkud dun. 30 Aw dyumulud kanan ya madég to-o na utaw, aw pyandala nilan ya manga kapig aw ya manga kimay. Pigpa-agad nilan uman ya manga buta aw manga umu, aw eped pa na manga pyangkedelan. Aw dayaw nilan pigpaligenaꞌ dun ni asdangan ni Jisus. Aw pigguliꞌ nan ya manga magkedel nilan. 31 Aw sa pagkitaꞌ na manga utaw sa nyangka-imoꞌ, to-o silan nya-enneng-enneng. Kay ya manga umu, nyakapaglong da. Aw ya manga kimay, migpangkadyaw da. Aw ya manga kapig, nyampakapanaw da. Aw ya manga buta, kyumitaꞌ da. Aw pigdeyen nilan ya Tyumanem na Isra-él.

32 Paglabay da na tulungallaw, pigtawag ni Jisus ya kanan manga umagakan aw piglongan nan silan, "Nyallat aku sa manga utaw ini, kay seled da na tulungallaw gayed silan ini sayid tadun, aw walaꞌ da ya un nilan makan asini. Diliꞌ aku malim na muliꞌ silan na walaꞌ pa silan pakakan pagaw to-o magkalumay silan dun ni dalan." 33 Yanagaw nyusip ya manga umagakan nan, "Ayin kitadun kamang sa makan asini kaligbinan ini na maka-umbaꞌ sa kadég na manga utaw yeiy?" 34 Aw nyusip si Jisus kanilan, "Pilallapid ya pan mayu awun?" Aw tyumubag silan, "Oloꞌ da pitullapid ya pan, aw tabay ya isdaꞌ asini." 35 Aw piglongan ni Jisus ya manga utaw na mingkud silan dun ni sakati. 36 Aw pigkamang nan ya pitullapid ya pan aw ya manga isdaꞌ, aw pigpasalamatan nan adti Tyumanem. Pagkatigkas yan, pigtenga-tengaꞌ nan adti kanan manga umagakan na un nilan uman atped-atped adti manga utaw. 37 Aw kyuman ya kadég nilan aw alag silan nyangkabiyag. Aw pigpan-imun na manga umagakan nan ya nyasamaꞌ aw pitungka be-en na mabaklaꞌ ya dayaw nyangkatmuꞌ. 38 Na, ya kadég na kyuman dun, manga upatemmalalan (4,000) ya eseg aw walaꞌ pa ya labet na manga ka͡ubayan aw mangayseꞌ nilan. 39 Pagkatigkas yan, pigpapanaw ni Jisus ya manga utaw, aw syumakay sakanan sa balangay aw migpasinan adti sakup na lunsud na Magdala.