1 Pagkatigkas yan, miglong si Jisus adti madég na manga utaw aw adti manga umagakan nan, law nan, 2 "Ya manga magpalna-uway sa Uldin tadun aw ya manga Parisiyo, silan ya awun katundanan mag-ubad sa kakawasan na Uldin na pig-atag na Tyumanem kan Moysis. 3 Yanagaw pakanyegi mayu ya kadég na pigpalna-u nilan aw dayaw mayu daluga. Manang diliꞌ mayu pagsilingan ya kanilan manga pig-imoꞌ. Kay pangkay pigpalna-u nilan ya matinaw manang walaꞌ nilan daluga ya kanilan pigpalna-u. 4 Gayed nilan uman pigdugangan ya manga suguꞌ na Tyumanem, aw piggelgel nilan pigpadalug ya manga utaw. Aw ya syampetan yan, to-o kyabegatan ya manga utaw sa pagdalug. Manang pigpabaya-an baling nilan aw pangkay tagbiꞌ walaꞌ silan tabang pada matuman ya pigsuguꞌ nilan. 5 Ya kadég na pigpan-imoꞌ nilan, oloꞌ yan pagpakita-kitaꞌ adti eped na manga utaw pada sayaꞌ silan. Alimbawaꞌ, to-o nilan pigpakadakulaꞌ ya kanilan betanganan sa papilis na pigsulatan sa tingeg na Tyumanem, pada molas kita-en dun ni kanilan bayuꞌ aw bekten. Aw to-o nilan pigpakalawig ya pangawaykaway na kadégkadég na kanilan pagsutun. 6 Aw dun uman ni manga sinagoga aw manga dakulaꞌ na pista, kaliman nilan ya mingkud adti ingkudanan na manga dengganen. 7 Pagleya͡an to-o nilan ya pagbasa͡an silan na manga utaw dun ni palingki. Aw pagkaliman nilan ya pagtawagen na ‘Magpalna-uway.’ 8 Manang diliꞌ kamu magkalim na tawagen na manga eped na ‘Magpalna-uway’ kay sambuk da oloꞌ ya kamayu Magpalna-uway. Aw ya kadég mayu kasiling da kamu na mangkaylug dun ni pagpangintu-u mayu. 9 Aw diliꞌ mayu pagtawagen na ‘Ama’ ya kamayu manga magpalna-uway asini tas na lupaꞌ, kay sambuk da oloꞌ ya Ama mayu na yan ya awun ni tas na langit. 10 Aw diliꞌ kamu magkalim na tawagen kamu na manga utaw na ‘Amu,’ kay sambuk da oloꞌ ya kamayu Amu na yan ya Misiyas. 11 Kun singalan kamayu ya nya-imoꞌ dakulaꞌ na utaw, ka-ilangan sakanan magpadalem aw ma-imoꞌ sugu-anen dun ni kamayu. 12 Kay pangkay singalan ya magpatastas, un saba sakanan padalemen. Aw ya utaw na magpadalem, un sakanan patasen.Ya kadégkadég na pagsutun na manga Parisiyo aw manga magpalna-uway sa Uldin

13 "Aw kamu na manga magpalna-uway sa Uldin aw manga Parisiyo, malatay ya un mayu datengan! Migtallalingu kamu! Gayed mayu pigbalabagan ya agiyanan pasinan adti Kasakupan na Pighari-an na Tyumanem. Pangkay kamu diliꞌ kamu malim sumeled. Aw pigpigilan mayu uman ya manga eped na malim galu sumeled.

14 ["Kamu na manga magpalna-uway sa Uldin aw manga Parisiyo, malatay ya un mayu datengan! Migtallalingu kamu! Madugay kamu magpanawagtawag pada kita-en na manga utaw, manang pig-agaw baling mayu ya ka-unan na manga balu. Yanagaw asuntu seiy, to-o pa mabegat ya pa-emel-emel na Tyumanem kamayu.]

15 "Kamu na manga magpalna-uway sa Uldin aw manga Parisiyo, malatay ya un mayu datengan! Migtallalingu kamu! Kay pigbetang mayu sa ginawa ya paglegeb sa kadakulaꞌ na banwa, aw ya dagat pigtalipag mayu pada maninaw sa pangkay sambuk na utaw na gagaden mayu adti kamayu pagpangintu-u. Aw sa nyagagad da mayu sakanan, pig-imoꞌ mayu baling sakanan na to-o pa malatay kamayu na umbaꞌ agbel adti atulun na diliꞌ pagkapatayan. 16 Malatay ya un mayu datengan! Kasiling kamu saba na buta na miggagad sa manga eped. Pigpalna-u mayu na ‘walaꞌ ya guna kun magsapaꞌ ya utaw magi sa Témplo, manang kun singalan ya magsapaꞌ magi sa bulawan na awun ni Témplo, na, tengteng nan saba imo-un ya sapaꞌ nan aw tumanen ya kanan pigpakang.’ 17 Buta kamu! Aw walaꞌ ya kya-ede-an mayu! Ayin kaꞌ ya to-o matas: ya bulawan aw ya Témplo? Ya bulawan migkalinis saba oloꞌ asuntu na awun ni seled na Témplo. 18 Aw migpalna-u kamu uman, ‘Kun magsapaꞌ ya utaw magi sa dugsu-anan na awun ni Témplo, walaꞌ ya guna na pagsapaꞌ nan, manang kun magsapaꞌ sakanan magi dun ni dugsuꞌ na pig-ayawan nan dun ni dugsu-anan, na, to-o ma-iganget ya pakang nan.’ 19 Buta kamu! Ayin kaꞌ ya matas: ya pigdugsuꞌ nan aw ya dugsu-anan? Ya dugsuꞌ migkalinis saba oloꞌ asuntu na awun ni dugsu-anan. 20 Yanagaw pangkay singalan utawa ya magsapaꞌ magi sa dugsu-anan dun ni Témplo, bekeꞌ oloꞌ na dugsu-anan ya pigsapa-an nan manang dala uman ya kadég na pigdugsuꞌ dun. 21 Aw kun magsapaꞌ ya utaw magi sa Témplo, na, bekeꞌ oloꞌ na Témplo ya pigsapa-an nan, manang dala uman ya Tyumanem na nyeyaꞌ adti seled. 22 Aw ya utaw na migsapaꞌ magi sa adti tas na langit, bekeꞌ oloꞌ na adti tas na langit ya pigsapa-an nan, manang dala uman ya trunu aw ya Tyumanem na nyingkud dun.

23 "Kamu na manga magpalna-uway sa Uldin aw manga Parisiyo, malatay ya un mayu datengan! Migtallalingu kamu! Dayaw mayu pigdalug ya suguꞌ dun ni Uldin na atag adti Tyumanem ya kasampuluꞌ, pangkay ya mangkayantek na anagay na pigtanem mayu alag mayu pigkamangan. Manang pigpalipaslipasan mayu baling ya to-o matas na manga palna-u na awun ni Uldin, dala ya pag-usay na matulid aw ya pagtabang sa manga makalalat aw pagtuman sa manga pakang. Madyaw saba na nyatag kamu sa kasampuluꞌ adti Tyumanem, manang diliꞌ mayu pagkalingawan ya manga matas na imo-unun na madyaw. 24 Buta saba kamu na gayed miggagad sa eped! Pagsala͡en mayu ya mangkayantek na mannanap na awun ni inemenen mayu, manang piglamun mayu baling ya dakulaꞌ na ayep na kamilyo!

25 "Kamu na manga magpalna-uway sa Uldin aw manga Parisiyo, malatay ya un mayu datengan. Migtallalingu kamu! Kasiling na pag-ugasan mayu ya lawas na tabuꞌ aw ya salad na palatu manang kenneꞌ pa baling na kalipaꞌ na adti seled! Nyatmuꞌ ya kamayu anenganeng na malatay. Aw pigtibagsegan mayu na matagtun pa ya pangkay unu na pagkaliman mayu. 26 Buta kamu na manga Parisiyo! Una͡a mayu linisi ya kamayu anenganeng pada magkadyaw uman ya manga imo-unun mayu.

27 "Kamu na magpalna-uway sa Uldin aw manga Parisiyo, malatay ya un mayu datengan! Migtallalingu kamu! Kasiling kamu na manga ilib na paglebengan sa lawas na manga nyangkamatay. Pigpaputiꞌ na manga utaw ya apit adti luwaꞌ na ilib na paglebengan pada to-o manenggeya tandawan, manang ya adti seled nyatmuꞌ baling na manga pesaꞌ aw kadég na mangkalipaꞌ. 28 Kasiling kamu saba uman na maynan. Adti mata na manga utaw, iman nilan aw pigdalug mayu ya Uldin na Tyumanem, manang ya tengteng matinaw, dun ni pigpan-imoꞌ mayu, walaꞌ mayu daluga ya kanan manga suguꞌ kay migtallalingu kamu.

29 "Kamu na manga magpalna-uway sa Uldin aw manga Parisiyo, malatay ya un mayu datengan. Migtallalingu kamu! Kay migpa-indeg kamu sa manenggeya na batu aw pigpakanenggeya͡an mayu ya manga lebeng na manga propita aw manga eped na utaw na dayaw uman dyumalug sa pagkaliman na Tyumanem. 30 Aw miglong kamu, ‘Kun dun pa kami ni manga allaw na manga tyugbulan tadun, diliꞌ galu kami magad sa pagpatay nilan sa manga propita.’ 31 Yanagaw dun ni paglong mayu seiy, pigmatinaw da mayu na kamu ya manga buwadbuwad na manga migpatay sa manga propita! 32 Na, tigkasa la ya malatay na pigpalekat da na manga tyugbulan mayu! 33 Ya bet mayu kasiling na ulud. Alag kamu saba kasiling na kamangayse-anan na kamugung! Unun mayu ya pagpakaluwaꞌ sa pa-emel-emel na Tyumanem adti atulun na diliꞌ pagkapatayan? 34 Yeiy ya du-an na magpadala aku adti kamayu sa manga propita, aw manga utaw na matadeng mag-ubad sa tingeg na Tyumanem, aw manga magpalna-uway. Manang ya eped kanilan pamatayen mayu aw ya eped pakalabu mayu adti krus. Aw ya eped kanilan badasan mayu na lalabet adti seled na manga sinagoga mayu. Aw awun manga eped kanilan na pandalugun mayu lekat adti sambuk na lunsud pasinan adti sambuk uman na lunsud pada pamulayaman mayu silan. 35 Yanagaw dumateng adti kamayu ya pagpa-emel-emel na Tyumanem asuntu sa pagpatay mayu sa manga utaw na dyumalug sa pagkaliman nan, lekat pa kan Abél asini muna, aw mendaꞌ adti pagpatay kan Zakariyas* na iseꞌ ni Barakiyas. Kay ya manga tyugbulan mayu, yan ya migpatay kan Zakariyas adti Témplo, dun ni tengaꞌ na Balay na Tyumanem aw dugsu-anan. 36 Matinaw ya un ku paglongun kamayu: Un saba asag adti manga utaw adun ya kadakulaꞌ na pa-emel-emel na Tyumanem asuntu sa pagpatay aw pagpamulayam sa kanan manga utaw."

37 Aw miglong pa si Jisus, "We…manga utaw na Jérusalim, pigpamatay mayu ya manga propita na Tyumanem, aw pigpamintu mayu na batu ya manga pigpansuguꞌ nan adti kamayu. Malikit da aku galu magtameng kamayu, kasiling na minsaꞌ na migtatawag sa manga unsuy nan na un nan tipunun adti dalem na manga panid nan, manang walaꞌ kamu kalim! 38 Na, un da kamu na Tyumanem pabaya-an. 39 Aw paglongun ta kamu: Kun mindeg da aku, diliꞌ da aku mayu kita-en mendaꞌ na dumateng ya allaw na maglong kamu, ‘Ini la ya pigpadala na Tyumanem dun ni kanan ngalan, aw umbaꞌ sakanan deyen!’ "*