1 Na, pagkatigkas na enemengallaw, pigpa-agad ni Jisus si Pédro aw ya duwa ya maylug na si Santiago aw si Juan. Aw tyumukud silan adti matas na buntud na oloꞌ silan. 2 Aw sa talana nilan sakanan pigtandawan, kyinitaꞌ nilan na nya-uman ya kadakulaꞌ na lawas ni Jisus, aw ya kalalamdag na gya nan kasiling na sega, aw ya kadégkadég nan to-o migkaputiꞌ. 3 Migpakitaꞌ uman dun si Moysis aw si Éliyas, aw migbalawbalaw silan si Jisus. 4 Aw miglong si Pédro kan Jisus, "Kay Magpalna-uway, madyaw kay ini kami! Kun malim kaw, magtulluk aku sa tulu ya layag asini, sambuk ya kanmu, sambuk ya kan Moysis aw sambuk uman ya kan Éliyas." 5 Sa talana pa nan miglong, awun labun na to-o malalamdag na tyumakleb kanilan. Aw awun tingeg na lekat adti labun na miglong, "Yeiy ya kanak Iseꞌ na to-o ku pigginawa͡an aw to-o aku kyatutukan kanan. Pakanyegi mayu sakanan!" 6 Pagdengeg na tulu ya umagakan nan sa tingeg yan, to-o silan nyallek aw nyanlebleb adti lupaꞌ. 7 Manang dyumulud si Jisus kanilan aw pig-awidan nan silan, aw miglong sakanan, "Pagbangun kamu! Diliꞌ kamu magkallek!" 8 Aw sa pag-inunu nilan, dakman oloꞌ si Jisus ya kyinitaꞌ nilan dun.

9 Sa pagtubang da nilan lekat adti buntud, piglongan silan ni Jisus, "Diliꞌ mayu pagpa-edeꞌ ya kyinitaꞌ mayu adti pangkay singalan mendaꞌ sa allaw na mataw aku na Iseꞌ na Utaw lekat adti nyangkamatay." 10 Aw nyusip silan kan Jisus, "Anangaꞌ gayed miglong ya manga magpalna-uway sa Uldin na ka-ilangan maka-una si Éliyas dumateng aw makamoli ya Misiyas?" 11 Tyumubag si Jisus kanilan, "Matinaw saba ya piglong nilan na maka-una si Éliyas na un magtagilan sa kadég. 12 Manang paglongun ta kamu na dyumateng da si Éliyas aw walaꞌ sakanan kilala͡a na manga utaw. Pigpamulayaman nilan baling. Aw maynan uman, aku na Iseꞌ na Utaw un nilan uman pamulayaman aw pati-isen." 13 Aw kyalabetan da na kanan manga umagakan na ya pyalabet ni Jisus na si Éliyas yan si Juan na Magba͡utismuway.Pigpakitaꞌ ya kalalamdag na pagka Tyumanem ni Jisus.

14 Paglikuꞌ da ni Jisus aw manga eped nan adti babaꞌ na pigkatipunan na madég na manga utaw, dyumulud kanan ya sambuk na eseg. Aw lyumuhud sakanan adti asdangan ni Jisus 15 aw miglong, "Kay Magpalna-uway, kallati beg ya iseꞌ ku na eseg! Kay gayed sakanan pagtakigan aw to-o migti-is. Malikit sakanan magkalukad adti atulun aw malikit uman magkolug dun ni tubig. 16 Yanagaw pigpa-agad ku sakanan adti manga umagakan mu manang walaꞌ nilan kabatug guli-a." 17 Aw miglong si Jisus, "Tay sa manga utaw adun na manga allaw yeiy na baluk ya anenganeng aw walaꞌ ya pagpangintu-u! Sangunu kaꞌ ya kadugay na mati-is ku ya pag-iyagad kamayu?" Tigkas yan, miglong uman si Jisus, "Na, pa-agadan adi sayid ku ya iseꞌ." 18 Aw pigsagda nan ya busaw, aw lyumuwaꞌ lekat adti iseꞌ, aw dayaw migkadyaw ya iseꞌ.

19 Sa pagpanaw da na manga utaw, dyumulud kan Jisus ya kanan manga umagakan aw nyusip silan, "Anangaꞌ na walaꞌ nami kabatug alilini ya busaw yan?" 20 Aw tyumubag si Jisus kanilan, "Asuntu na walaꞌ pa to-o pakadalid ya pagpangintu-u mayu. Manang matinaw ya un ku paglongun kamayu: Kun awun tengteng pagpangintu-u mayu pangkay tagbiꞌ kasiling na biniꞌ na mustardo, mabatug mayu paglongun ya buntud ini, ‘Kay Buntud, ka-alin kaw adtu!’ aw ma-alin saba. Walaꞌ ya diliꞌ mayu mabatug. 21 [Aw mabatug mayu saba alilinan ya maynan na punganan na busaw, magi sa pagpuwasa aw pagpanawagtawag adti Tyumanem.]"

22 Sambuk na allaw, migkatipun si Jisus aw ya kanan manga umagakan adti Galiliya. Aw miglong si Jisus kanilan, "Aku na Iseꞌ na Utaw agpet da lubidan aw tumbay adti manga utaw na 23 un magpatay kanak. Manang pagdateng na katlu na allaw, matawun aku lekat adti pagkamatay." Aw sa pagdengeg na manga umagakan nan, to-o migkalat ya ginawa nilan.

24 Aw sa pagdateng nilan adti Kapirna-um, dyumulud adti kan Pédro ya manga mangungubla͡ay sa buwis na Témplo na awun ni Jérusalim. Aw nyusip silan kanan, "Unu, magbayad ya magpalna-uway mayu sa buwis na Témplo?" 25 Tyumubag si Pédro, "E-e."

Pag-uliꞌ da ni Pédro adti balay, nyuna si Jisus miglong kanan, "Kay Simon, adti kanmu anenganeng, singalan galu ya umbaꞌ pabayaden na manga hariꞌ sa manga buwis? Ya kanilan iseꞌ aw kun manga sakup nilan?" 26 Aw tyumubag si Pédro kanan, "Manga sakup nilan." Aw miglong pa si Jisus, "Yanagaw walaꞌ ya labet na tengteng na iseꞌ nilan magbayad. 27 Manang pada diliꞌ kitadun kadamanan na manga mangungubla͡ay sa buwis na Témplo, paminta kaw kanateꞌ adti dulug na danaw. Beklasa ya tagnaꞌ na isdaꞌ na tumubug sa binta mu. Beka-a ya baka nan, aw kita-en mu dun ya kuwalta na bulawan na maputiꞌ. Kamanga ya kuwalta aw bayadi ya buwis ku aw ya kanmu."