1 Na, sa malapit da silan adti Jérusalim, dyumateng silan adti baranggay na Bétpagi dun ni kilid na Buntud na Manga Olibo. Aw pigsuguꞌ ni Jisus ya duwa ya umagakan nan, 2 aw piglongan nan silan, "Kadtu kamu dun ni baranggay adti dipag, aw sa pagseled mayu dun, kumitaꞌ kamu sa asnu na pig-eket eped ya kanan nati. Ubada mayu ya eket nilan aw guyuda mayu adi kanak. 3 Kun awun musip kamayu, paglonga mayu sakanan: ‘Ya Magpalna-uway awun ka-ilangan nan sa asnu aw sa nati ini.’ Aw tumbay saba na tagtun aw maksay nan padala kamayu."

4 Na, ya kadég yeiy na nya-imoꞌ, nyatuman ya pigsulat na propita asini muna:

5 "Paglonga ya manga utaw dun ni Jérusalim:

‘Tanawa! Dyumateng da ya hariꞌ mayu!

Migpadalem sakanan aw dyumateng na syumakay sa nati na asnu!’ "*

6 Aw nyanaw ya duwa ya umagakan nan aw pigtuman nilan ya kadég na pigsuguꞌ ni Jisus kanilan. 7 Pigguyud nilan ya asnu aw nati nan adti kan Jisus, aw pig-apidan nilan na kanilan kadégkadég aw pigsakayan ni Jisus. 8 Sa talana nilan migpasinan adti Jérusalim, awun madég to-o na manga utaw na migma-una kanilan na migpansiladlad dun ni dalan sa kadégkadég na yan ya palangad pagpamasa nilan kan Jisus. Aw ya eped na manga utaw migladlad uman silan adti dalan sa manga mangkayantek na manga sanga na kawuy na bagu nilan pigpan-utud. 9 Aw ya manga utaw na nyuna kan Jisus aw ya manga nyakamoli kanan, alag silan migpansideyen na maglong, "Hosana! Deyen tadun ya Buwadbuwad ni Dabid! Ini la ya pigpadala na Tyumanem dun ni kanan ngalan, aw umbaꞌ sakanan deyen! Hosana! Aw deyen ya Tyumanem na awun ni tas na langit!"*

10 Pagseled da ni Jisus adti Jérusalim, walaꞌ katingen ya anenganeng na madég na manga utaw dun ni syudad, aw nyangusip silan, "Singalan ya utaw yeiy?" 11 Aw tyumubag kanilan ya madég na manga utaw na nyagad kan Jisus, "Yeiy saba ya propita na si Jisus na taga Nazarit, sakup na Galiliya."

12 Aw syumeled si Jisus adti dakulaꞌ na pamanag na Témplo na Tyumanem. Aw sa pagkitaꞌ nan sa manga utaw na nyampamaligyaꞌ aw nyampamayad, pigpalekat nan ya pag-alilin kanilan. Pigpantuwad nan ya manga lamisa na manga maglaliwanay sa kuwalta aw ya manga ingkudanan na manga mamaligya-ay sa kalupati.* 13 Aw miglong si Jisus kanilan, "Yeiy ya pigpasulat na Tyumanem asini muna: ‘Ya kanak balay, pagtawagen na panawagtawaganan.’* Manang pig-imoꞌ mayu baling tagu-anan sa manga mangkatakaw."*Pig-alilinan ni Jisus adti Témplo ya manga magbalikwatay.

14 Aw dyumulud adti kan Jisus ya manga buta, aw ya manga kapig. Aw pigpangguliꞌ nan silan dun ni pamanag na Témplo. 15 Manang sa pagkitaꞌ na manga mangkatas na magdadugsu-ay aw manga magpalna-uway sa Uldin sa pigpan-imoꞌ ni Jisus, aw sa pagdengeg nilan sa tatawag na manga mangayseꞌ dun ni pamanag na Témplo, to-o silan nyangkadaman. Kay miglong ya manga mangayseꞌ, "Hosana! Deyen tadun ya buwadbuwad ni Dabid!" 16 Yanagaw nyusip silan kan Jisus, "Unu, dyengeg mu ya piglong na manga mangayseꞌ iyan?" Aw tyumubag si Jisus, "E-e, dyengeg ku. Anangaꞌ, walaꞌ mayu kabasa ya pigpasulat na Tyumanem asini muna? Nyakasulat saba na pangkay ya mangayseꞌ dala ya manga magsusu pa, pigpalna-uwan silan na Tyumanem na magdeyen kanan." * 17 Pagkatigkas yan, pig-indegan silan ni Jisus adti pamanag na Témplo aw lyumuwaꞌ sakanan adti syudad aw migpasinan adti baranggay na Bétaniya. Aw dun da sakanan kulang na gabi yan.

18 Pagkamaselem yan, talana ni Jisus lyumikuꞌ adti syudad na Jérusalim, nyagetem sakanan. 19 Aw sa pagkitaꞌ nan sa kawuy na igira adti kilid na dalan, migpalapit sakanan adti kawuy, manang walaꞌ ya pigkitaꞌ nan na bunga. Tumalag baling dawun. Yanagaw piglongan ni Jisus ya kawuy, "Lekat adun na allaw yeiy, diliꞌ da kaw makapamunga!" Aw tigkan nyalanes ya kawuy. 20 Pagkitaꞌ na manga umagakan nan sa nya-imoꞌ sa kawuy, to-o silan nya-enneng-enneng aw miglong silan, "Anangaꞌ maksay nyalanes ya kawuy na igira iyan?" 21 Aw tyumubag si Jisus kanilan, "Matinaw ya un ku paglongun kamayu: Kun mangintu-u kamu sa Tyumanem aw diliꞌ magduwaduwa, mabatug mayu uman ya pig-imoꞌ ku adti kawuy na igira. Manang bekeꞌ oloꞌ na maynan, mabatug mayu uman paglongan ya buntud ini, ‘Kay Buntud, kawas kaw adti dagat!’ Aw ma-imoꞌ saba ya piglong mayu. 22 Kun to-o kamu sumalig sa Tyumanem, madawat saba mayu ya pigsekat mayu magi sa kamayu pagpanawagtawag."

23 Na, lyumikuꞌ si Jisus adti pamanag na Témplo. Aw talana nan migpalna-u dun, dyumulud kanan ya manga mangkatas na magdadugsu-ay aw ya manga magdadumala͡ay sa manga Judiyu. Aw nyusip silan kanan, "Unu ya katundanan mu na du-an pig-alilinan mu ya manga utaw asini Témplo kagabi? Aw singalan kaꞌ ya nyatag kanmu sa katundanan na imo-un mu ya maynan?" 24 Tyumubag si Jisus kanilan, "Musip aku uman kamayu, aw kun matubag mayu ya usip ku, na, ubat ku uman kamayu kun ayin lekat ya katundanan ku sa pag-imoꞌ sa kadég yeiy. 25 Na, ini ya kanak usip kamayu: Ayin lekat ya katundanan ni Juan sa pagba͡utismu nan sa manga utaw? Unu, lekat adti Tyumanem aw oloꞌ lekat adti utaw?" Aw mig-usip-usipay silan, "Unu ya un tadun tubag kanan? Kun tubagen tadun na ‘lekat adti Tyumanem,’ maglong sakanan kanaten, ‘Anangaꞌ walaꞌ kamu pangintu-u kanan?’ 26 Aw kun tubagen tadun uman na ‘lekat adti utaw,’ pagaw madaman ya manga utaw ini. Kay pyangintu-uwan na kadég nilan na si Juan propita sakanan na Tyumanem." 27 Yanagaw tyumubag silan kan Jisus, "Enday, walaꞌ nami ka-ede-i." Aw miglong si Jisus kanilan, "Diliꞌ ta kamu uman ubatan kun singalan ya nyatag kanak sa katundanan na ma-imoꞌ ku ya maynan."

28 Na, pig-ubatan da uman silan ni Jisus sa pundinganan, law nan, "Unu ya anenganeng mayu sa ini? Awun sambuk na utaw na awun duwa ya iseꞌ nan na eseg. Sambuk na allaw, pigsuguꞌ nan ya iseꞌ nan na magulang, ‘Kay Toꞌ, kadtu kaw adun ni kanaten parasan aw pagtalabahu kaw dun.’ 29 Aw tyumubag ya iseꞌ nan, ‘Diliꞌ aku malim madtu!’ Manang walaꞌ kadugay nya-uman ya anenganeng nan aw nyadtu baling sakanan ni parasan. 30 Aw pigkadtuwan uman na ama nilan ya iseꞌ nan na mangud aw maynan uman ya pigsuguꞌ nan adti kanan. Aw miglong ya iseꞌ nan, ‘E-e, kay Ama. Madtu aku.’ Manang walaꞌ baling sakanan kadtu." 31 Aw nyusip si Jisus, "Na, ayin sa duwa ya mig-imoꞌ sa pagkaliman na ama nilan?" Aw tyumubag silan, "Ya magulang." Aw miglong si Jisus kanilan, "Matinaw ya paglongun ku kamayu: Nyaka-una pa kamayu nyaka-akup adti Kasakupan na Pighari-an na Tyumanem ya manga mangungubla͡ay sa buwis aw manga ka͡ubayan na miggalin sa pagkaka͡ubayan nilan. 32 Kay nyadi si Juan na Magba͡utismuway na un pakitaꞌ kamayu ya pa-agi sa pag-imoꞌ sa pagkaliman na Tyumanem, manang walaꞌ kamu pangintu-u sa piglong nan. Manang ya manga mangungubla͡ay sa buwis aw manga ka͡ubayan na miggalin sa pagkaka͡ubayan nilan, migpakanyeg silan kanan aw migselsel silan. Aw pangkay kya-ede-an da mayu yeiy manang kenneꞌ baling na walaꞌ kamu pagselsel aw walaꞌ kamu uman pangintu-u kanan.

33 "Pakanyegi pa mayu ya sambuk na pundinganan: Awun sambuk na tagtun sa lupaꞌ na migpatanem sa madég na balagen na paras, aw dayaw nan pigpalibedan na alad. Aw migpa-imoꞌ sakanan sa pigisanan sa manga bunga na paras. Aw migpatulluk uman sa matas na tunggu-anan. Pagkatigkas yan, pigpasa-up nan ya kanan parasan. Aw nyanaw sakanan adti sambuk na banwa. 34 Pagdateng na allaw na migpa-ipuꞌ da sa manga bunga na paras, migsuguꞌ ya tagtun sa manga sugu-anen nan adti manga pigpasa-up nan pada kamangen ya kanan bagiꞌ. 35 Manang pagdateng na manga sugu-anen nan dun, pigdulus baling silan na manga sa-up, aw ya sambuk byadasan nilan pyanumbag, aw ya sambuk pigpatay nilan, aw ya sambuk pyamintu nilan na batu. 36 Aw migsuguꞌ da uman ya tagtun sa madég pa na manga sugu-anen, manang byadasan nilan uman pyamulayaman kasiling na pig-imoꞌ nilan adti manga sugu-anen na nyaka-una. 37 Pagkatigkas yan, pigsuguꞌ da nan adti kanilan ya iseꞌ nan na eseg, aw miglong sakanan, ‘Kun iseꞌ ku ya madtu, un nilan yeiy basa͡an.’ 38 Manang sa pagkitaꞌ na manga sa-up kanan, migbalawbalaw silan na maglong, ‘Ini ya iseꞌ na tagtun! Na! Naten sakanan patayen aw matagtun tadun ya parasan na un ayawan kanan.’ 39 Yanagaw pigdulus nilan aw pigdala adti luwaꞌ na parasan aw pigpatay nilan."

40 Pagkatigkas yan, nyusip si Jisus, "Na, sa paglikuꞌ na tagtun, unu ya imo-un nan adti manga sa-up?" 41 Aw tyumubag silan kanan, "Alag nan saba patayen ya manga malatay na sa-up yan! Aw tigkas yan, pasa-up nan ya parasan adti eped na manga utaw na maka-atag kanan sa bagiꞌ na manga bunga dun ni allaw na pagpa-ipuꞌ." 42 Aw miglong si Jisus kanilan, "Unu, walaꞌ kaꞌ mayu kabasa ya pigpasulat na Tyumanem asini muna?

‘Ya dakulaꞌ na batu na iman na manga panday aw walaꞌ ya guna,

yan baling ya batu na sumalem na nya-imoꞌ tullukanan sa dakulaꞌ na balay.

Ya pig-imoꞌ yeiy na Tyumanem to-o madyaw aw nyakapa-enneng-enneng kanaten.’*

43 Yeiy ya du-an na paglongun ta kamu: Diliꞌ da atag na Tyumanem adti kamayu ya manga kadyawan na awun ni Kasakupan na kanan Pighari-an, manang yan baling ya atagan nan ya manga utaw na gayed dyumalug sa kanan pagkaliman. 44 [Ya utaw na pagsungkul adti batu yan aw pakadakdak, madugdug sakanan. Aw kun singalan ya kolugan na batu yan, madupuk saba.]"

45 Pagdengeg da na manga mangkatas na magdadugsu-ay aw manga Parisiyo sa pundinganan ni Jisus, kya-ede-an nilan na silan ya pigpalabet nan. 46 Yanagaw kaliman da galu nilan dakepen si Jisus, manang nyallek silan sa manga utaw dun. Kay adti anenganeng na manga utaw na migkatipun dun, propita si Jisus.