1 Dun ni manga allaw yan, si Hérodés Antipas ya migdumala sa banwa na Galiliya. Aw pigdengeg nan ya manga pig-imoꞌ ni Jisus, 2 yanagaw miglong sakanan adti manga pigsaligan nan, "Yeiy saba si Juan na Magba͡utismuway! Nyataw da kadiꞌ lekat adti pagkamatay! Yan ya du-an na nyaka-imoꞌ sakanan sa manga milagru."

3,4 Nyakapaglong si Hérodés sa maynan asuntu sa pig-imoꞌ nan kan Juan idtu muna. Kay pigpadakep nan si Juan, aw pigpagapus aw pigpakalabusu nan, asuntu na gayed sakanan pigsagda ni Juan na miglong, "Pigpigil saba adti Uldin na manga Judiyu ya pagpanga͡ubayan sa ka͡ubayan na inulug mu." Kay kyamang ni Hérodés si Hérodiyas na ka͡ubayan na inulug nan na si Pilipi. 5 Aw pangkay kaliman galu ni Hérodés patayen si Juan, manang nyallek kun unu ya imo-un na manga utaw kanan. Kay kya-ede-an nilan na si Juan ya sambuk na propita na Tyumanem.

6 Na, pagdateng da na allaw ni Hérodés, syumayaw ya dalaga ni Hérodiyas adti asdangan na kadég na pyamilit dun ni katipun, aw to-o migleya si Hérodés kanan. 7 Aw pigpakangan nan ya dalaga magi sa sapaꞌ na atag nan ya pangkay unu ya sekaten nan. 8 Yanagaw pigpalna-uwan na ina nan, na yeiy ya paglongun na dalaga adti kan Hérodés, "Atagan kanak adun ya ulu ni Juan na Magba͡utismuway na dayaw betang adti dakulaꞌ na palatu!"

9 Pagdengeg ni Hérodés sa tubag na dalaga, migkalat to-o ya ginawa nan. Manang asuntu na nyakasapaꞌ da sakanan dun ni asdangan na kadég na pyamilit nan, syumuguꞌ na atag adti dalaga ya pigsekat nan. 10 Yanagaw pigpa-utudan nan sa ulu si Juan adti kalabusuwanan. 11 Aw pigbetang ya ulu adti dakulaꞌ na palatu, aw pig-atag adti dalaga, aw dyala uman na dalaga adti ina nan. 12 Aw pig-angay na manga umagakan ni Juan ya lawas nan aw piglebeng nilan. Tigkas yan, kyadtuwan nilan si Jisus aw pig-ubat-ubatan nilan sa kadég na nya-imoꞌ.

13 Na, pagdengeg ni Jisus sa nya-imoꞌ kan Juan, pig-indegan nan ya banwa yan, aw syumakay sakanan sa balangay pasinan adti kaligbinan. Manang pagdengeg na madég to-o na utaw kun ayin ya un nan kadtuwan, pig-indegan nilan uman ya manga lunsud nilan aw nyanaw silan migpadulug sa danaw pasinan adti pigkadtuwan ni Jisus. 14 Sa pagpanog ni Jisus lekat adti balangay, kyinitaꞌ nan ya madég to-o na utaw na migkatipun dun. Aw to-o nan silan kyallatan, aw pigpangguliꞌ nan ya kadég na awun magkedel.

15 Pagka͡ambung da, dyumulud kan Jisus ya kanan manga umagakan aw miglong silan, "Ambung da to-o aw walaꞌ ya makan asini banwa ini. Ayin ya madyaw kun papanawun da ya manga utaw pada makabayad silan sa makan nilan dun ni manga baranggay." 16 Manang tyumubag si Jisus kanilan, "Diliꞌ ka-ilangan na manaw silan. Kamu baling ya matag kanilan sa un nilan makan." 17 Aw miglong silan kanan, "Oloꞌ da limallapid ya pan aw duwambulus ya isdaꞌ ini." 18 Yanagaw miglong si Jisus kanilan, "Dala͡a mayu adi kanak." 19 Tigkas yan, piglongan nan ya manga utaw na dayaw silan mingkud dun ni sakati. Aw pigkamang nan ya limallapid ya pan aw ya duwambulus ya isdaꞌ, aw lyumangad sakanan adti langit aw pigpasalamatan nan adti Tyumanem. Aw tigkas yan, pigtenga-tengaꞌ nan ya pan aw pig-atag nan adti kanan manga umagakan aw pyan-atped-atped nilan adti manga utaw. 20 Aw kyuman ya kadég nilan, aw alag silan nyangkabiyag. Aw pigpan-imun na kanan manga umagakan ya nyangkasamaꞌ, aw nyangkatmuꞌ ya sampuluꞌ tag duwa (12) ya be-en. 21 Na, ya kadég na kyuman dun, manga limammalalan (5,000) ya eseg aw walaꞌ pa ya labet na manga ka͡ubayan aw mangayseꞌ.

22 Sa abus da pakakan ya manga utaw, maksay pigsuguꞌ ni Jisus ya kanan manga umagakan na lumikuꞌ sumakay adti balangay, aw muna la silan adti dipag na danaw, kay un pa nan papanawun ya kadég na manga utaw. 23 Aw pagkatigkas da ni Jisus papanawun ya manga utaw, tyumukud sakanan adti buntud na oloꞌ nan sayda na un manawagtawag adti Tyumanem. Aw kyagabiyanan sakanan. 24 Aw ya balangay na pigsakayan na manga umagakan nan, mawat da lekat adti ligad na danaw, aw pigsalumpak nilan ya samet aw ya baled. 25 Na, sa pagpakallawunun da, nyanaw si Jisus adti tas na tubig aw migpasinan adti kanilan. 26 Manang pagkitaꞌ nilan na awun nyanaw adti tas na tubig, to-o silan nyallek. Aw mig-ulangag silan na miglong, "Iyan da ya ma-allekay!" 27 Manang maksay si Jisus migtawag kanilan, "Diliꞌ kamu magkallek! Aku saba ya ini! Pakabagsega ya kamayu ginawa." 28 Aw pigtatawag ni Pédro si Jisus, "Kay Magpalna-uway, kun tengteng na ikaw ya iyan, na, pakadtuwa aku ni sayid mu dun ni tas na tubig."Nyanaw si Pédro adti tas na tubig aw pigtabangan ni Jisus pada diliꞌ malemes. 29 Aw miglong si Jisus kanan, "Adi kaw!" Yanagaw nyanog si Pédro adti balangay aw nyanaw dun ni tas na tubig pasinan adti kan Jisus. 30 Manang pagbatiꞌ nan sa samet, to-o sakanan nyallek, aw un da galu malemes. Yanagaw mig-ulangag sakanan, "Kay Magpalna-uway! Tabangi aku beg!" 31 Aw maksay ni Jisus pig-awidan ya bekten nan aw engata lekat adti tubig, aw piglongan nan, "Tay sa katagbiꞌ na pagsalig mu kanak! Anangaꞌ kaw magduwaduwa?" 32 Sa pagsakay da nilan adti balangay, dayaw uman tyumangkeꞌ ya samet. 33 Aw ya kadég nilan dun ni balangay, pigdeyen nilan si Jisus, aw miglong silan, "Matinaw saba na ikaw ya Iseꞌ na Tyumanem!"

34 Pagpakatalipag da nilan, dyumungguꞌ silan adti banwa na Génésarét. 35 Aw sa pagka-edeꞌ na manga utaw na si Jisus ya dyumateng adti kanilan banwa, maksay nilan uman pigpa-edeꞌ adti kadég na banwa na nyakapalibed dun. Yanagaw pyandala nilan adti kan Jisus ya manga pyangkedelan. 36 Aw nyanginayuꞌ ya manga utaw kan Jisus na pa-awiden nan ya manga pyangkedelan sa pangaway na pigsut nan. Aw ya kadég na nyaka-awid, alag silan kyaguli-an.