1 "Na, magpakatadeng kamu pagaw yan oloꞌ ya tud mayu ya magpakita-kitaꞌ adti manga eped sa kadyaw na pig-imoꞌ mayu. Kun maynan ya tud mayu, walaꞌ ya un mayu madawat lekat adti Tyumanem na yan ya Ama mayu na awun ni tas na langit. 2 Yanagaw pangkay kinunu kaw pag-atag adti makalalat, diliꞌ kaw magsiling sa manga migtallalingu. Kun mag-atag silan, una silan magpa-uni sa trumpita adti seled na sinagoga aw adti dalan pada pa-edeꞌ na un silan matag. Kay kaliman nilan na to-o sayaꞌ na manga utaw asuntu sa kadyaw na kanilan pig-imoꞌ. Matinaw ya un ku paglongun kamayu na nyakamang da nilan dun ni pagsayaꞌ na manga utaw ya palangad tandan kanilan. 3 Manang kun matag kaw sa tabang adti manga makalalat, diliꞌ da mu pagpa-edeꞌ adti eped na utaw, pangkay adti kanmu tengteng ubaybay. 4 Madyaw kun diliꞌ ka-ede-an ya kanmu pag-atag. Kay ya Ama mu na awun ni tas na langit, kita-en nan saba ya pig-atag mu aw yanagaw pakadyawun kaw nan.

5 "Aw dun ni pagpanawagtawag mayu adti Tyumanem, diliꞌ kamu magsiling sa manga utaw na migtallalingu. Kay yan ya pagkaliman nilan ya mag-indeg adti seled na sinagoga aw dun ni suwayan na manga dalan, pada kita-en na manga utaw ya pagpanawagtawag nilan. Matinaw ya un ku paglongun kamayu: Kasiling na nyadawat da nilan ya palangad tandan magi dun ni pagsayaꞌ na manga utaw. 6 Manang kun manawagtawag kaw adti Tyumanem, adtu kaw ni tambiꞌ mu aw dayaw takepi ya suwangan pada diliꞌ kaw kita-en na eped na utaw, aw panawagtawag kaw adti Ama. Kay kita-en nan saba ya pig-imoꞌ mu aw pakadyawun kaw nan.

7 "Aw dun ni kamayu pagpanawagtawag adti Tyumanem, ya-i mayu pagsalutsaluta ya manga tingeg kasiling na pig-imoꞌ na manga utaw na Héntil na walaꞌ paka-edeꞌ sa tengteng na Tyumanem. Kay mig-anenganeng silan na kun salutsalutun nilan ya kanilan pagpanawagtawag pakanyegan silan. 8 Aw yanagaw diliꞌ mayu silan pagsilingan. Kay ya Ama mayu na awun ni tas na langit, kya-ede-an da nan saba dadan ya pigkapelek mayu pangkay walaꞌ pa kamu pagsekat adti kanan.

9 "Yanagaw maynini ya pagpanawagtawag mayu adti Tyumanem:

‘Kay Ama nami na awun ni tas na langit,

migsekat kami adti kanmu na basa͡an kaw galu na kadég na utaw,

10 aw dumateng uman adi kanami ya Kasakupan na Pighari-an mu,

aw matuman ya kanmu pagbayaꞌ asini tas na lupaꞌ kasiling na pagkatuman da adti tas na langit.

11 Atagi kami sa kanami kakan kada allaw.

12 Aw lanasa beg ya kanami manga salaꞌ,

kasiling na pigpasinsiya͡an da nami ya salaꞌ na pig-imoꞌ na eped nami.

13 Aw diliꞌ mu kami pagpabaya-an adti pagtandaꞌ na diliꞌ nami mabatug,

manang tabangi kami na diliꞌ kami degen na malatay na lekat adti kan Satanas.’ "

14 Pigpadeleg ni Jisus ya pagpalna-u sa manga utaw, law nan, "Kun pigpasinsiya͡an mayu ya eped na utaw na nyakasalaꞌ kamayu, lanasen uman na Ama mayu na awun ni tas na langit ya kamayu manga salaꞌ. 15 Manang kun diliꞌ mayu silan pasinsiya͡an sa manga pig-imoꞌ nilan kamayu na malatay, diliꞌ uman lanasen na Ama ya kamayu manga salaꞌ.

16 "Aw dun ni pagpuwasa mayu, diliꞌ kamu magtimbegat sa gya mayu kasiling na pig-imoꞌ na manga migtallalingu. Diliꞌ silan magkulamus aw diliꞌ silan magpanuwat, kay kaliman nilan na kita-en silan na manga utaw na migpuwasa silan. Matinaw ya un ku paglongun kamayu: Kasiling na nyadawat da nilan ya palangad tandan magi dun ni pagsayaꞌ na manga utaw. 17 Manang kun magpuwasa kamu, pagkulamus kamu aw dayaw kamu panuwat, 18 pada walaꞌ ya utaw na maka-edeꞌ na migpuwasa kamu. Yan oloꞌ ya maka-edeꞌ ya kamayu Ama na awun ni tas na langit. Pangkay diliꞌ sakanan pagkita-en, manang pigkitaꞌ nan saba ya pig-imoꞌ mu aw pakadyawun kaw nan.

19 "Diliꞌ kamu magluduk sa manga ka-unan asini tas na lupaꞌ. Pagkalalingen aw pagkalaten saba na manga anay, aw pagtakawun na mangkatakaw. 20 Pagluduk kamu baling sa ka-unan adti tas na langit. Walaꞌ saba ya manga mannanap na un kuman, aw diliꞌ pagkalalingen aw diliꞌ madala na mangkatakaw. 21 Kay kun ayin ya kanmu ka-unan, adtu uman ya kanmu anenganeng.

22 "Ya mata na utaw yan ya kalalamdag na lawas nan. Yanagaw, kun madyaw ya pag-inunu mu,* awun kalalamdag na maka-ilaw sa kanmu anenganeng. 23 Manang kun diliꞌ madyaw ya pag-inunu na mata mu, dakulaꞌ ya kangitngit na awun ni kanmu. Yanagaw kun diliꞌ sumiga ya kalalamdag na awun ni kanmu, kasiling kaw na awun ni kangitngitan.

24 "Walaꞌ ya allang na makadalug sa duwa ya tagtun, kay pakalaten nan ya sambuk aw ginawa͡an nan ya sambuk. Dalugun nan ya sambuk aw palipaslipasan nan baling ya sambuk. Diliꞌ saba mabatug na utaw pagdenganen ya pagginawa sa kuwalta aw ya pagdalug sa Tyumanem.

25 "Yanagaw paglongun ta kamu: Diliꞌ magkakamang ya kamayu ginawa sa kadég na kamayu kapelekan asini tas na lupaꞌ, kun unu ya un mayu kanen aw inemen, aw kun unu uman ya un mayu sutun. Kay ya pag-eyaꞌ na utaw asini tas na lupaꞌ, bekeꞌ oloꞌ na makan aw bekeꞌ oloꞌ na kadégkadég. 26 Inunuwa mayu ya manga langgam. Walaꞌ silan pananem, aw walaꞌ silan uman pag-ani. Aw walaꞌ ya pul na un nilan pagludukan sa kanilan makan. Manang pigpakan silan saba na Ama mayu na awun ni tas na langit. Aw asuntu na to-o pa saba dakulaꞌ ya alagaꞌ mayu kay sa kanilan, yanagaw atagan kamu nan sa kadég na kamayu kapelekan! 27 Aw singalan kaꞌ kamayu ya makasugpat sa kamayu ginawa asini tas na lupaꞌ magi sa pagkaypeng mayu? Walaꞌ saba! 28 Aw anangaꞌ uman magkakamang ya ginawa mayu sa un mayu sutun? Inunuwa mayu ya manga sagbet na magpamulak na tyumulin adti magalet. Walaꞌ silan pagtalabahu aw walaꞌ silan uman pagtéꞌ. 29 Manang paglongun ta kamu: Si Solomon, to-o dengganen ya pagkahariꞌ nan asini muna aw syumut sakanan sa kadégkadég na to-o manenggeya, manang to-o pa dun manenggeya ya manga bulak yeiy. 30 Ya manga sagbet adti magalet mamulak adun, aw pagkakunallaw malanes aw tigkas yan sangaben. Aw pangkay tagbiꞌ ya alagaꞌ nilan, manang pigpakanenggeya silan na Tyumanem. Aw to-o pa kamu saba nan atagan sa un mayu sutun. Tay, sa katagbiꞌ na pagpangintu-u mayu! 31 Yanagaw diliꞌ magkakamang ya ginawa mayu aw diliꞌ kamu gayed maglong, ‘Unu ya un tadun kanen aw unu uman ya un tadun inemen? Aw unu uman ya un tadun sutun?’ 32 Ya kadég yeiy, gayed pigtibagsegan na matagtun na manga utaw na walaꞌ pangintu-u sa tengteng Tyumanem. Manang kamu, walaꞌ ya du-an na makamang ya ginawa mayu, kay kya-ede-an da saba na Ama mayu na awun ni tas na langit kun unu ya kamayu kapelekan. 33 Tibulluka mayu baling ya kamayu anenganeng adti kadég na awun ni Kasakupan na Pighari-an na Tyumanem, aw imo-a mayu ya kanan pagkaliman. Kun maynan ya imo-un mayu, sambaten nan ya kadég na kamayu kapelekan. 34 Yanagaw diliꞌ gayed magkakamang ya kamayu ginawa sa unu ya un dumateng kunallaw, kay umbaꞌ da oloꞌ ya manga kalugan adun na allaw yeiy. Saligan da mayu baling ya kadég yeiy adti Tyumanem.