1 Aw sa pagka͡utaw da ni Jisus adti Bétléhém na sakup na Judiya, si Hérodés ya hariꞌ dun ni manga allaw yan. Aw awun manga utaw na lekat adti silatan na dyumateng dun ni syudad na Jérusalim, aw to-o dakulaꞌ ya kya-ede-an nilan sa manga bitun. 2 Aw nyusip silan, "Ayin ya iseꞌ na nya͡utaw na un ma-imoꞌ hariꞌ na manga Judiyu? Kay kyinitaꞌ nami ya kanan bitun adti silatan na yan ya pangilala sa pagka͡utaw nan. Yanagaw nyadi kami kay un nami sakanan simba͡en."

3 Sa pagdengeg ni Hérodés sa piglong nilan, walaꞌ katingen ya anenganeng nan, aw maynan uman ya manga utaw dun ni Jérusalim. 4 Yanagaw pigpatawag nan ya kadég na manga mangkatas na magdadugsu-ay dun ni Témplo na Tyumanem, aw ya manga magpalna-uway uman sa Uldin na manga Judiyu. Aw pig-usip nan silan kun ayin ka͡utaw ya Misiyas.* 5 Aw tyumubag silan kanan, "Adti Bétléhém, sakup na Judiya. Yeiy ya pigpasulat na Tyumanem magi sa propita nan:Bétléhém

6 ‘Ikaw kay Bétléhém na sakup na Juda,

pangkay tagbiꞌ ya dengeg mu adun asuntu na tagbiꞌ kaw na baranggay,

manang kagaya moli na allaw, to-o magkatas ya dengeg mu adti manga migdumala sa manga utaw na Juda.

Kay dun ni kanmu ka͡utaw ya sambuk na un ma-imoꞌ magdumala na dayaw magdiyaga sa kanak manga utaw na Isra-él kasiling na magdadiyaga͡ay sa manga karniro.’ " *

7 Sa pagdengeg ni Hérodés sa tubag nilan, pigpatawag nan ya manga utaw na lyumekat adti silatan na walaꞌ ya nyaka-edeꞌ, aw pig-usip nan silan kun kanu nilan tagnaꞌ kita-a ya bitun yan. 8 Pagkatigkas yan, pigpakadtu silan ni Hérodés adti Bétléhém aw piglongan nan silan, "Kadtu la kamu aw paninawa mayu ya iseꞌ. Kun kita-en da mayu, likuꞌ kamu adi aw ubati aku mayu pada madtu aku uman aw magsimba kanan."

9 Na, sa pagdengeg nilan sa piglong ni Hérodés, nyanaw da silan. Aw sa talana nilan nyanaw, kyinitaꞌ da nilan uman ya bitun na migma-una kanilan, mendaꞌ na tyumeneng dun ni tas na pig-eya-an na iseꞌ. 10 Aw sa pagkitaꞌ nilan sa bitun yan, to-o silan migleya. 11 Aw sa pagseled nilan adti balay, kyinitaꞌ nilan ya iseꞌ eped ni Maria na ina nan. Aw lyumuhud silan adti asdangan na iseꞌ aw pigsimba nilan sakanan. Aw pagkatigkas yan, pig-uwangan nilan ya kanilan manga kaban aw pigkamang nilan ya kanilan dala͡enen sa iseꞌ: bulawan, aw manga lana na mangkanimboꞌ na pigngalanan na insénso aw mirra na alag to-o dakulaꞌ ya alagaꞌ. 12 Aw pigpa-edeꞌ silan na Tyumanem magi sa tagaynep na diliꞌ silan lumikuꞌ adti kan Hérodés. Yanagaw dun ni pag-uliꞌ nilan, walaꞌ da silan agi adti Jérusalim.

13 Na, sa walaꞌ da dun ya manga utaw na lekat adti silatan, awun anghil na Tyumanem na migpakitaꞌ kan José magi sa tagaynep, aw miglong ya anghil, "Kay José, pagbangun kaw aw pa-agadan ya iseꞌ aw ya ina nan aw palaguy kamu adti banwa na Ihiptu! Aw pag-eyaꞌ pa kamu dun mendaꞌ na paglongun ta kaw. Kay un ni Hérodés papaninaw ya iseꞌ pada patayen." 14 Aw maksay migbangun si José, aw pigpa-agad nan ya iseꞌ aw ina aw nyalaguy silan na gabi yan adti Ihiptu. 15 Aw nyatingen pa silan dun mendaꞌ na nyatay da si Hérodés. Aw nyatuman ya pigpasulat na Tyumanem magi sa sambuk na propita nan asini muna na miglong, "Pigpatawag ku ya kanak Iseꞌ lekat dun ni Ihiptu."*

16 Na, pagka-edeꞌ ni Hérodés na pig-akalan sakanan na manga utaw na lekat adti silatan, to-o sakanan nyadaman. Manang kya-ede-an nan lekat adti kanilan kun kanu ya tagnaꞌ na pagkitaꞌ nilan sa bitun. Yanagaw pigsuguꞌ nan ya kanan manga sundalu adti Bétléhém na un pamatayen ya kadég na iseꞌ na eseg na walaꞌ pa dateng adti duwangka͡umay dun ni Bétléhém aw banwa na nyakapalibed dun. 17 Aw yanagaw nyatuman ya pigpasulat na Tyumanem asini muna magi sa propita nan na si Jérémiyas:

18 "Dyengeg ya pagsasugaway dun ni banwa na Ramah.

Madég ya manga migpansimatay,

kay to-o pigsugawan na buwadbuwad ni Rakél ya manga mangayseꞌ nilan.

Aw diliꞌ silan malim lala͡en kay pyangkamatayan beg silan sa mangayseꞌ nilan." *

19 Na, dyumateng ya allaw na nyatay da si Hérodés, aw migtagaynep da uman si José adti banwa na Ihiptu aw migpakitaꞌ kanan ya anghil na Tyumanem, 20 aw miglong ya anghil kanan, "Kay José, pagbangun kaw aw pa-agadan ya iseꞌ aw ya ina nan, aw uliꞌ kamu adti banwa na Isra-él. Kay nyatay da ya utaw na un galu magpatay sa iseꞌ." 21 Yanagaw nyindeg si José aw pya-agad nan ya iseꞌ aw si Maria, aw nyuliꞌ silan adti banwa na Isra-él. 22 Manang pagpakadateng da nilan dun ni Isra-él, walaꞌ da silan dun pag-eyaꞌ adti probinsiya na Judiya. Kay dyengeg ni José na si Arkilaw ya nyakasayu sa ama nan na si Hérodés sa pagdumala sa Judiya, yanagaw nyallek si José meyaꞌ dun. Aw awun pigpa-edeꞌ kanan na Tyumanem magi sa tagaynep. Yanagaw lyumikuꞌ silan baling adti probinsiya na Galiliya 23 aw dun da silan pag-eyaꞌ ni lunsud na Nazarit. Aw nyatuman ya pigpa-edeꞌ na manga propita na si Jisus pagtawagen na Nazaritiyanen.