1 Sambuk na allaw yan, nyanaw si Jisus aw ya kanan manga umagakan dun ni dalan na nyaka-agi adti tengaꞌ na pawaꞌ na awun trigu na agpet da aniyen, aw yeiy uman ya Allaw na Paglagdeng. Aw nyagetem ya manga umagakan nan, yanagaw nyanaplus silan sa trigu aw pigtebteb nilan. 2 Manang pagkitaꞌ na manga Parisiyo sa pig-imoꞌ nilan, piglongan nilan si Jisus, "Inunuwa ya pig-imoꞌ na kanmu manga umagakan! Kyalakadan nilan baling ya Uldin! Walaꞌ saba tumbayan adti Allaw na Paglagdeng ya pag-ani!" Trigu

3 Manang tyumubag si Jisus kanilan, "Unu, walaꞌ pa kaꞌ mayu kabasa ya pigpasulat na Tyumanem asini muna sa pig-imoꞌ ni Dabid? Sa pagkagetem nan aw manga eped nan, 4 syumeled sakanan adti Balay na Tyumanem aw pigkan nan ya pan na pig-atag da adti Tyumanem.* Aw pig-atagan nan uman ya manga eped nan pangkay yan saba oloꞌ ya makakan ya manga magdadugsu-ay. Aw dun da baling nilan kalakadi ya Uldin. 5 Unu, walaꞌ mayu uman kabasa dun ni Uldin na gayed migtalabahu ya manga magdadugsu-ay adti Témplo kada Allaw na Paglagdeng? Dun ni pigpan-imoꞌ nilan, gayed nilan kyalakadan ya Uldin manang walaꞌ silan pakasalaꞌ. 6 Paglongun ta kamu na pangkay awun katundanan na Témplo manang adun asini ni sayid mayu ya to-o pa matas. 7 Aw kun kya-ede-an pa mayu ya tengteng kakawasan na pigpasulat na Tyumanem asini muna, diliꞌ mayu pasala-en ya manga utaw na walaꞌ pag-imoꞌ sa salaꞌ. Kay ini ya pigpasulat nan: ‘Ya kanak tengteng pagkaliman, na awun pagkallat mayu adti eped na manga utaw, aw bekeꞌ na dugsuꞌ mayu na pagsangaben.’* 8 Aw aku na Iseꞌ na Utaw, pig-atag da kanak ya pagbayaꞌ sa unu ya madyaw imo-un sa Allaw na Paglagdeng."

9 Aw nyanaw si Jisus aw syumeled adti kanilan sinagoga. 10 Aw dun uman ni seled na sinagoga awun sambuk na eseg na kimay ya sangkilid na bekten nan. Aw nyusip ya manga Parisiyo kan Jisus, "Unu kaꞌ, pigtumbay na Uldin tadun ya pagpaguliꞌ dun ni Allaw na Paglagdeng?" Kay kaliman nilan na awun puliba nilan maglimanda kanan adti usayanan. 11 Manang tyumubag si Jisus kanilan, "Alimbawaꞌ, kun awun karniro mu na molug adti malalem na gawang dun ni Allaw na Paglagdeng, na, unu ya imo-un mayu? Maksay mayu saba tabangan aw engaten lekat adti gawang. 12 Yanagaw ayin ya dakulaꞌ ya alagaꞌ, ya utaw aw ya karniro? Ya utaw saba! Yeiy ya du-an na pigtumbay na Tyumanem ya madyaw na imo-unun pangkay Allaw na Paglagdeng." 13 Aw tigkas yan, piglongan ni Jisus ya eseg na kimay, "Ulada ya bekten mu." Aw pig-ulad nan ya bekten nan, aw dayaw kyaguli-an. Aw migkadyaw da kasiling na sangkilid na bekten nan. 14 Manang pagkitaꞌ na manga Parisiyo sa pig-imoꞌ ni Jisus, lyumuwaꞌ silan aw migpalekat silan migpalpa sa pagpapatay kanan.

15 Manang nya-edeꞌ si Jisus sa pigpalpa nilan, yanagaw nyanaw sakanan lekat dun. Aw dyumalug kanan ya to-o madég na utaw. Aw pigpangguliꞌ nan ya kadég na awun manga magkedel 16 aw piglongan nan silan na diliꞌ mag-ubat-ubat adti eped kun singalan sakanan. 17 Yanagaw nyatuman da ya pigpasulat na Tyumanem asini muna magi sa propita nan na si Isayas:

18 "Tanawa! Ini la saba ya sugu-anen na kanak pigpadala.

To-o ku sakanan pigginawa͡an aw kyatutukan aku kanan.

Ya kanak Ispiritu, yan ya maggagad kanan,

aw ubat-ubat nan adti manga nasud ya kanak pagbayaꞌ na alag matinaw.

19 Diliꞌ sakanan mati-ayil aw diliꞌ uman magpamuligsaꞌ adti asdangan na manga utaw.

20 Pangkay ya tin tigbaw na baluk, diliꞌ nan lepeden,

aw pangkay ya salengan na dakman mag-ulileng, diliꞌ nan saba eyepen.

Manang pagkallatan nan baling ya manga utaw na to-o makalalat.

Padelegen nan ya kanan imo-unun mendaꞌ na matuman da ya kadég na pigpalpa na Tyumanem aw degen nan ya malatay.

21 Aw dun ni kanan ngalan awun imanen na kadég na utaw asini tas na lupaꞌ."*

22 Pagkatigkas yan, pigpa-agad adti kan Jisus ya sambuk na utaw na diliꞌ magkitaꞌ aw nya-umu kay pigseledan na busaw. Aw pig-alilinan ni Jisus ya busaw, aw kyaguli-an ya utaw yan aw dayaw nyakapaglong aw kyumitaꞌ da. 23 Aw to-o nya-enneng-enneng ya kadég na manga utaw dun, aw miglong silan, "Pagaw yeiy da ya buwadbuwad ni Dabid na pigtagadan tadun." 24 Manang pagdengeg na manga Parisiyo sa piglong na manga utaw, miglong silan, "Ya utaw yan, mig-alilin sa manga busaw magi sa katulus ni Bilsibul na pangulu na manga busaw." 25 Manang kya-ede-an ni Jisus ya adti anenganeng nilan, yanagaw piglongan nan silan, "Ya kasakupan na nyatenga-tengaꞌ, diliꞌ yan magpadeleg na madugay. Aw maynan uman ya lunsud na awun pagkatenga-tengaꞌ aw pangkay uman dun ni seled na balay. 26 Aw kun si Satanas ya mig-alilin sa manga sakup nan, na, kasiling na pigtanam nan ya kanan pagka-utawun. Aw magkalat saba ya pagdumala nan, aw dun da sakanan dega. 27 Aw kun kan Bilsibul katulus ya kanak pag-alilin sa manga busaw, na, usipen ta kamu: Ya kamayu uman manga sakup na mag-alilin sa manga busaw, ayin kaꞌ lekat ya katulus na pig-atag kanilan? Silan saba ya magmatinaw na galuꞌ ya piglong mayu! 28 Manang kun magi sa Ispiritu Santo ya pag-alilin ku sa manga busaw, na, dun da mayu ka-ede-i na asini la ni kamayu ya pigpadala na Tyumanem na un mag-imoꞌ sa Kasakupan nan.

29 "Si Satanas kasiling na utaw na to-o mabagseg na tagtun sa balay. Walaꞌ ya pangkay sambuk na makaseled adti balay nan pada takawun ya kanan ka-unan kun diliꞌ una gapusun ya tagtun. Manang kun magapus da ya tagtun, mabatug da kamangen ya manga ka-unan nan.*

30 "Ya utaw na walaꞌ pagpasakup kanak, yan baling ya gayed migbalabag sa kanak manga imo-unun. Aw kun awun diliꞌ tumabang maggagad sa manga utaw adi kanak, yan ya mig-ampang kanilan. 31 Yanagaw paglongun ta kamu: Pangkay unu ya salaꞌ na utaw adti Tyumanem, aw pangkay unu ya paglongun nan na malatay adti eped nan, mabatug na Tyumanem lanasen ya salaꞌ na utaw yan. Manang diliꞌ nan lanasen ya salaꞌ na utaw na maglong sa malatay adti Ispiritu Santo. 32 Pangkay singalan ya maglong sa malatay adi kanak na Iseꞌ na Utaw, mabatug uman na Tyumanem lanasen ya salaꞌ na utaw yan. Manang kun singalan ya maglong sa malatay adti Ispiritu Santo, yan ya salaꞌ na diliꞌ mabatug lanasen. Aw ya sampetan na salaꞌ yeiy, pa-emel-emelen sakanan na Tyumanem na walaꞌ ya tyamanan."

33 Migpadeleg si Jisus miglong adti manga Parisiyo, "Kun madyaw ya kawuy, madyaw uman ya bunga nan. Manang kun diliꞌ madyaw ya kawuy, diliꞌ uman madyaw ya bunga nan. Yanagaw ya kawuy na madyaw, ka-ede-an saba magi dun ni bunga nan. 34 Manang kamu, kasiling na kamangayse-anan na kamugung! Unun mayu ya paglong sa madyaw kun malatay ya adti anenganeng mayu? Kay pangkay unu ya awun ni anenganeng na utaw, yan uman ya paglongun nan. 35 Kun gayed madyaw ya pig-anenganeng na utaw, madyaw uman ya imo-unun aw paglongun nan. Manang kun malatay ya pig-anenganeng nan, malatay uman ya imo-unun aw paglongun nan. 36 Aw miglong aku kamayu na dun ni allaw na pag-ukum, awun saba tubagenen na tagsambuksambuk kamayu sa piglong mayu na walaꞌ ya ma-untung. 37 Kay magi sa kanmu paglong, yan ya magmatinaw kun umbaꞌ kaw pa-emel-emelen aw ya diliꞌ."

38 Na, awun manga magpalna-uway sa Uldin aw manga Parisiyo dun, aw piglongan nilan si Jisus, "Kay Sir, kaliman nami kumitaꞌ sa pangilala na yan ya magmatinaw na pigpadala kaw na Tyumanem." 39 Manang miglong si Jisus kanilan, "Tay sa kalatay na manga utaw adun na manga allaw yeiy. Pigtalikudan nilan ya Tyumanem, aw kasiling silan na ka͡ubayan na miglakadenen. Gayed silan migsekat sa pangilala, manang ya pangilala na un ku atag kanilan, yan oloꞌ ya kasiling na nya-imoꞌ kan Jonas na propita na Tyumanem. 40 Kay seled na tulungallaw aw tulunggabi ni Jonas dun ni buntit na dakulaꞌ na isdaꞌ, aw maynan uman ya ma-imoꞌ kanak na Iseꞌ na Utaw na seled na tulungallaw aw tulunggabi adti dalem na lupaꞌ. 41 Pagdateng na allaw na pag-ukum, ya manga utaw dun ni syudad na Ninibé selselen nilan ya kadég mayu. Kay sa pagpakanyeg nilan sa pag-ubat-ubat ni Jonas, migselsel silan sa kanilan manga salaꞌ.* Manang kamu, pangkay ini tampid mayu ya to-o pa matas kan Jonas, manang walaꞌ mayu baling pangintu-uwi aw walaꞌ kamu uman pagselsel! 42 Aw dun ni allaw na pag-ukum, ya rayna na migdumala asini muna sa banwa na Syiba, selselen nan uman ya kadég mayu. Kay nyanaw sakanan lekat adti mawat na banwa pada magpakanyeg sa katadeng na hariꞌ na si Solomon.* Manang paglongun ta kamu na pangkay ini tampid mayu ya to-o pa matas kan Solomon, manang walaꞌ mayu sakanan pakanyegi.

43 "Na, kun awun busaw na lumuwaꞌ adti utaw, maglegeblegeb yan adti kaligbinan na walaꞌ ya tubig aw maninaw sa un nan ka-eya-an manang walaꞌ ya kita-en nan dun. 44 Yanagaw maglong adti anenganeng nan, ‘Un ku baling liku-an ya muna pig-eya-an ku.’ Aw sa paglikuꞌ nan, kita-en nan na walaꞌ pa ya mig-eyaꞌ dun aw malinis da ya pig-indegan da nan idtu muna, kasiling na balay na dayaw pyamunasan aw nyatigpes da. 45 Aw tigkas yan, mangay sakanan sa pitu ya eped nan na to-o pa baling malatay. Aw sumeled silan adti utaw yan, aw dun da silan pag-eyaꞌ. Aw to-o pa malatay ya kabetangan na utaw yan kay sa idtu muna. Aw kasiling uman na maynan ya un kagamakan na manga utaw na malatay adun na manga allaw yeiy."

46 Aw talana pa ni Jisus miglong adti madég na manga utaw dun, dyumateng ya ina nan aw manga inulug nan. Aw nyan-indeg silan adti luwaꞌ na balay kay kaliman nilan magbalawbalaw kanan. 47 Aw awun utaw na miglong kan Jisus, "Awun ni luwaꞌ ya ina mu aw manga inulug mu, aw kaliman nilan magbalawbalaw kanmu." 48 Aw tyumubag si Jisus kanan, "Awun pa saba uman pigsiling ku na kanak ina aw kanak manga inulug." 49 Aw pigtulliꞌ ni Jisus ya manga umagakan nan, aw miglong sakanan, "Inunuwa mayu! Ya manga utaw ini, silan uman ya kasiling na ina ku aw kanak manga inulug! 50 Pangkay singalan ya mag-imoꞌ sa pagkaliman na kanak Ama na awun ni tas na langit, silan uman ya kanak manga inulug aw manga bubay aw ina ku."