1 Pagkatigkas na pig-imoꞌ ni Jisus dun ni Gadara, syumakay sakanan sa balangay aw lyumikuꞌ adti lunsud na Kapirna-um na pig-eya-an nan. 2 Sa pagdateng da nan, piglagbet sakanan na manga utaw na migtingga sa pulid. Sa pagkitaꞌ ni Jisus sa pagpangintu-u nilan na mabatug nan guli-en ya utaw yan, piglongan nan ya pulid, "Kay Lew, pakabagsega ya kanmu ginawa, kay ya manga salaꞌ mu adti Tyumanem piglanas da." 3 Aw dun uman ya manga eped na magpalna-uway sa Uldin, aw dyengeg nilan ya piglong ni Jisus. Yanagaw mig-anenganeng silan, "Ya utaw yeiy, migpa-unawa sakanan sa Tyumanem!" 4 Manang kya-ede-an ni Jisus ya kanilan anenganeng, yanagaw piglongan nan silan, "Anangaꞌ kamu mag-anenganeng sa malatay? 5 Ayin kaꞌ ya molas paglongun adti eseg na pulid, ‘Ya manga salaꞌ mu nyalanas da,’ aw kun paglongun sakanan, ‘Pagbangun kaw aw panaw da kaw’? 6 Manang matinawun ku adti kamayu na aku na Iseꞌ na Utaw awun katundanan ku asini tas na lupaꞌ maglanas sa manga salaꞌ na manga utaw." Tigkas yan, miglong si Jisus adti eseg na pulid, "Pagbangun kaw! Dala͡a ya pigtingga͡an nilan kanmu aw uliꞌ da kaw!" 7 Aw maksay nyindeg ya pulid aw nyuliꞌ sakanan adti balay. 8 Sa pagkitaꞌ da na madég na manga utaw sa pig-imoꞌ ni Jisus, to-o silan nya-enneng-enneng. Yanagaw pigdeyen nilan ya Tyumanem na nyatag sa katulus adti utaw na maka-imoꞌ sa maynan.

9 Na, nyindeg si Jisus lekat dun, aw kyinitaꞌ nan ya sambuk na utaw na nyingkud adti bayadanan sa buwis kay mangungubla͡ay sakanan. Aw ya ngalan nan si Matiyo. Aw miglong si Jisus kanan, "Agad kaw kanak!" Aw nyindeg si Matiyo aw nyagad kan Jisus.

10 Walaꞌ kadugay, migpa-imoꞌ si Matiyo sa dakulaꞌ na kakan adti balay nan. Kyuman dun si Jisus aw ya kanan manga umagakan. Aw madég uman ya dyumateng dun na manga mangungubla͡ay sa buwis aw ya eped pa na manga makasasalaꞌ. 11 Pagkitaꞌ na manga Parisiyo seiy, piglongan nilan ya umagakan ni Jisus, "Anangaꞌ sumambuk kuman ya magpalna-uway mayu sa manga mangungubla͡ay sa buwis aw manga eped pa uman na makasasalaꞌ?" 12 Manang dyengeg ni Jisus ya piglong nilan, yanagaw pigtubag nan silan magi sa pundinganan, law nan, "Ya manga utaw na mangkadyaw ya lawas, diliꞌ nilan ka-ilangan ya doktor. Manang ya manga utaw na awun magkedel, silan ya awun ka-ilangan sa doktor. 13 Sadsadi mayu ya kakawasan na ini: ‘Ya kanak tengteng pagkaliman, na awun pagkallat mayu adti eped na utaw, aw bekeꞌ na dugsuꞌ mayu na pagsangaben.’* Ya pigkadi ku asini tas na lupaꞌ, yan ya pagtawag sa manga utaw na nyaka-edeꞌ sa manga salaꞌ nilan, pada magselsel silan aw dumalug silan kanak. Manang ya manga utaw na iman nilan aw walaꞌ ya kanilan salaꞌ adti Tyumanem, bekeꞌ nilan saba ya pigtawag ku."

14 Aw pagkatigkas yan, dyumulud kan Jisus ya manga umagakan ni Juan na Magba͡utismuway, aw nyusip silan kanan, "Anangaꞌ gayed kami migpuwasa aw ya manga Parisiyo, manang ya kanmu manga umagakan, walaꞌ silan pagpuwasa?"* 15 Aw tyumubag si Jisus kanilan magi sa pundinganan, "Endaꞌ, kun awun kasal, diliꞌ magkalat ya ginawa na manga tyumambung talana na kenneꞌ pa dun ni sayid nilan ya eseg na nyangugnan?* Manang dumateng ya allaw na kamangen sakanan adti kanilan. Aw lekat dun ni allaw yan, magpuwasa la silan.

16 "Aw kasiling uman na kadégkadég, ya bagu na téla diliꞌ pagleneb adti dadan na téla na malungu la. Kay kun maleneb da aw gayed bugsakan, diliꞌ madugay kumeteng ya bagu aw to-o la baling magkadakulaꞌ ya kakisayan. 17 Aw maynan uman, diliꞌ pag-asag ya bagu na bino adti dadan na betanganan na pig-imoꞌ lekat adti kindal na ayep. Kay kun asag ya bino dun aw sumubuk, mutu baling ya betanganan, aw masapad ya bino, aw magkalat ya betanganan. Manang ya bagu na bino, pag-asag adti bagu na betanganan na kindal na ayep. Aw yanagaw diliꞌ magkalat ya betanganan aw diliꞌ uman masapad ya bino."*

18 Na, talana pa ni Jisus miglong adti manga umagakan ni Juan, dyumulud kanan ya sambuk na magdadumala͡ay sa sinagoga. Aw lyumuhud sakanan adti asdangan ni Jisus, aw to-o nyanginayuꞌ, law nan, "Ya iseꞌ ku na dalagita, bayaꞌ pa beg nyapalus ya ginawa nan. Manang kya-ede-an ku na kun magad kaw kanak adti balay aw pandungan mu sakanan na kanmu palad, mataw saba sakanan." 19 Yanagaw nyagad si Jisus sa utaw yan, aw nyagad uman ya manga umagakan nan. 20 Talana nilan nyanaw, awun ka͡ubayan na dyumulud kan Jisus apit adti bagakwang nan. Na, ya ka͡ubayan yeiy, gayed pigdugu-duguꞌ seled na sampuluꞌ tag duwa (12) ya umay. Aw yanagaw pig-awidan nan ya pangaway na pigsut ni Jisus, 21 kay mig-anenganeng sakanan, "Kun ka-awidan ku oloꞌ ya pangaway na pigsut nan, kaguli-an da aku." 22 Aw maksay nyatubang si Jisus aw kyinitaꞌ nan ya ka͡ubayan, aw piglongan nan, "Kay Déꞌ, pakabagsega ya kanmu ginawa. Asuntu sa pagpangintu-u mu kanak, yan ya nyakaguliꞌ kanmu." Aw dayaw kyaguli-an ya ka͡ubayan.

23 Na, pagdateng ni Jisus dun ni balay na utaw na magdadumala͡ay sa sinagoga, kyinitaꞌ nan ya madég na utaw adti luwaꞌ na migpanmatay aw ya manga utaw na migpansi-eyep sa sileli. * 24 Yanagaw piglongan nan silan, "Luwaꞌ pa kamu! Walaꞌ saba kamatay ya iseꞌ. Oloꞌ sakanan nyakatulug!" Manang nyaka-ikel baling silan sa piglong nan. 25 Aw sa pagpakaluwaꞌ da na manga utaw, syumeled sakanan adti pigpakulangan sa iseꞌ aw pig-awidan nan ya bekten na iseꞌ, aw dayaw migbangun sakanan. 26 Aw ya ubat-ubat sa pig-imoꞌ ni Jisus nyabekkal adti palibed na banwa yan.

27 Sa pag-indeg da ni Jisus adti balay yan, awun duwa ya eseg na buta na gayed dyumalug kanan. Aw pigtatawag nilan si Jisus, "We…Buwadbuwad ni Dabid, kallati beg kami!" 28 Sa pagdateng ni Jisus adti pigbantukan nan, dyumulud kanan ya duwa ya buta. Aw nyusip si Jisus kanilan, "Unu, nyangintu-u kamu na mabatug ta kamu guli-en?" Aw tyumubag silan kanan, "E-e kay Sir. Nyangintu-u kami." 29 Aw pig-awidan ni Jisus ya manga mata na tagsambuksambuk kanilan, aw piglongan nan silan, "Asuntu sa pagpangintu-u mayu kanak, kaguli-an da kamu!" 30 Aw dayaw silan kyumitaꞌ. Aw miglong si Jisus kanilan, "Diliꞌ mayu yeiy pag-ubat-ubat adti pangkay singalan." 31 Manang sa pagpanaw da nilan, pig-ubat-ubat baling nilan ya pagpaguliꞌ ni Jisus kanilan. Aw nyabekkal ya ubat-ubat yeiy adti manga banwa na nyakapalibed dun.

32 Sa pagpanaw da na duwa ya eseg na bayaꞌ kyumitaꞌ, walaꞌ kadugay awun da uman manga utaw na dyumateng dun na migpa-agad sa sambuk na utaw na nya-umu kay pigseledan na busaw. 33 Aw sa pagkatigkas da ni Jisus alilinan ya busaw na syumeled adti utaw yan, dayaw nyakapaglong ya umu. Aw nya-enneng-enneng ya kadég na utaw dun, aw miglong silan, "Walaꞌ pa tadun kita-a ya maynini asini kadakulaꞌ na Isra-él!" 34 Manang miglong ya manga Parisiyo, "Magi saba sa katulus na pangulu na manga busaw kya-alilinan nan ya manga busaw!"

35 Piglegeb ni Jisus ya kadég na lunsud aw manga baranggay na banwa yan, aw migpalna-u sakanan adti manga sinagoga, aw pigpa-edeꞌ nan ya Madyaw na Ubat-ubat sa Kasakupan na Pighari-an na Tyumanem. Aw pigpangguliꞌ nan uman ya kadég na manga magkedel na manga utaw. 36 Aw sa pagkitaꞌ nan sa madég na manga utaw, to-o nyallat si Jisus kanilan kay madég ya nyakalinggal sa anenganeng nilan aw walaꞌ ya un makatabang kanilan. Kasiling silan na manga karniro na walaꞌ ya magdadiyaga͡ay. 37 Tigkas yan, miglong si Jisus adti kanan manga umagakan, "Dakulaꞌ to-o ya aniyenen, manang tabay ya mag-aniyay. 38 Yanagaw panawagtawag kamu adti Tyumanem na yan ya tagtun sa palangad aniyenen, na magpadala sakanan sa manga mag-aniyay."