1 Na, pagkamaselem da, migkasambuk ya ginawa na kadég na mangkatas na magdadugsu-ay aw manga magdadumala͡ay sa manga Judiyu kun unu ya un nilan imo-un kan Jisus. 2 Yanagaw pigpagapus nilan, aw pigpa-agad nilan adti kan Pilato na yan ya gubirnador na taga Roma.

3 Na, si Judas na maglubiday, sa pagka-edeꞌ nan na pig-ukuman da si Jisus na patayen, to-o nan pigselsel ya kanan pagka-utawun. Aw pig-uliꞌ nan ya katluwan (30) ya kuwalta na pig-atag kanan na manga mangkatas na magdadugsu-ay aw magdadumala͡ay sa manga Judiyu. 4 Aw miglong sakanan kanilan, "Nyakasalaꞌ aku, kay piglubidan ku ya utaw na walaꞌ ya salaꞌ!" Manang tyumubag silan, "Unu ya kanami labet? Kanmu la yan tubagenen!" 5 Yanagaw pigsabug ni Judas ya kuwalta dun ni Témplo, aw nyanaw sakanan. Aw tigkas yan, tyumuyuꞌ sakanan na pig-eketan ya liyeg adti tas na kawuy.

6 Na, pyamulut na manga mangkatas na magdadugsu-ay ya kuwalta aw miglong silan, "Kun uliꞌ tadun ya kuwalta ini adti tipunanan sa kuwalta na Témplo, kalakadan tadun ya Uldin kay yeiy ya pigbayad pada papatay ya sambuk na utaw." 7 Yanagaw pigbalawbalawan nilan kun unu ya madyaw imo-un sa kuwalta yan, aw tyumandeꞌ silan na bayad sa lupaꞌ na sambuk na utaw na mag-imo-ay sa manga kulun. Aw pig-imoꞌ nilan lebenganan sa manga utaw na dumadayu. 8 Yeiy ya du-an na taman adun pigngalanan na manga utaw ya lupaꞌ yeiy na "Lupaꞌ na Pigbayadan na Duguꞌ."

9 Aw dun ni pig-imoꞌ nilan, nyatuman da ya pigsulat na propita na si Jérémiyas asini muna na miglong:

"Pigkamang nilan ya katluwan (30) ya kuwalta,

kay yan ya alagaꞌ na pigkapakangan da na manga buwadbuwad ni Isra-él na umbaꞌ pagbayad kanan.

10 Aw ya kuwalta yan pigbayad sa lupaꞌ na utaw na mag-imo-ay sa kulun,

kay yeiy ya pigsuguꞌ na Tyumanem kanak."*

11 Na, nyindeg si Jisus adti asdangan na gubirnador aw pig-usip nan, "Unu, ikaw ya hariꞌ sa manga Judiyu?" Aw tyumubag si Jisus, "Piglong da mu." 12 Manang walaꞌ nan tubaga ya diklamu na manga mangkatas na magdadugsu-ay aw manga magdadumala͡ay sa manga Judiyu. 13 Pagkatigkas yan, nyusip pa si Pilato kanan, "Unu, walaꞌ mu dengega ya kadég na manga diklamu nilan kanmu?" 14 Manang pangkay sambuk na diklamu nilan, walaꞌ ya pigtubag ni Jisus kanan. Aw nyabelengbeleng to-o kanan si Pilato.

15 Na, kada umay dun ni Pista na Paglabay na Anghil na Tyumanem, awun katanem na gubirnador magpaluwaꞌ sa sambuk na nyakalabusu na kaliman na manga utaw paluwa-en. 16 Aw dun ni kalabusuwanan awun sambuk na utaw na pigngalanan na Barabas. Aw to-o malatay ya dengeg nan. 17 Yanagaw sa pagkatipun da na manga utaw, pig-usip silan ni Pilato, "Singalan ya kaliman mayu na paluwa-en ku, si Barabas, aw kun si Jisus na pagtawagen na Kristu?" 18 Kay kya-ede-an ni Pilato na to-o nyingaꞌ kan Jisus ya manga magdadumala͡ay sa manga Judiyu, aw yan ya du-an na pigtumbay nilan si Jisus adti kanan.

19 Sa kenneꞌ pa ni Pilato nyingkud adti ingkudanan na pag-ukum, migpadala ya ka͡ubayan nan sa tingeg na miglong, "Pabaya-i la ya utaw yan. Kay walaꞌ ya salaꞌ nan. Kumanggabi to-o nyalinggal ya anenganeng ku asuntu sa tagaynep ku kanan."

20 Manang ya manga mangkatas na magdadugsu-ay aw manga magdadumala͡ay sa manga Judiyu, pigpalna-uwan nilan ya manga utaw na sekaten nilan na paluwa-en si Barabas aw papatay si Jisus. 21 Aw nyusip salut si Pilato kanilan, "Singalan kanilan duwa ya kaliman mayu na paluwa-en ku?" Tyumubag silan, "Si Barabas!" 22 Aw nyusip pa si Pilato kanilan, "Kun paluwa-en ku si Barabas, unun ku ya utaw yeiy na pagtawagen na Kristu?" Aw tyumubag ya kadég nilan, "Pakalabuwan sakanan adti krus!" 23 Aw miglong pa si Pilato, "Anangaꞌ? Unu ya nya-imoꞌ nan na malatay?" Manang to-o la baling silan nyamansag, "Pakalabuwan sakanan adti krus!" 24 Kyinitaꞌ da ni Pilato na walaꞌ ya un nan mabatug kay migpalekat da miggubut ya manga utaw. Yanagaw migpakamang sakanan sa tubig aw mig-unaw dun ni asdangan na kadég na utaw, aw miglong sakanan, "Na! Kun patayen mayu ya utaw yeiy, bekeꞌ da yan na kanak salaꞌ. Kamayu la yan tubagenen!" 25 Aw alag silan nyamansag, "Kami aw ya kanami manga buwadbuwad ya manubag sa kamatayen nan!" 26 Yanagaw pigpaluwaꞌ ni Pilato si Barabas. Manang si Jisus pigpalabet nan* aw pigtumbay nan adti kanilan pada kalabuwan adti krus.

27 Aw pigdala si Jisus na manga sundalu na Romanen adti pamanag na palasyo na gubirnador. Aw pigtawag nilan ya kadég na sundalu aw kalimpungi nilan si Jisus. 28 Aw pigluwasan nilan sakanan aw pigpasut nilan sa malawig na sa-ul na tapel ya batek kasiling na pagsutun na hariꞌ. 29 Pagkatigkas yan, mig-imoꞌ silan sa korona na suksukun aw pigsangkub nilan adti ulu ni Jisus. Aw pigpa-awid nilan sakanan sa bangkaꞌ adti kalintu na tulluꞌ nan. Aw lyumuhud silan adti asdangan nan, aw pig-odoy-odoy nilan na sallong kunu syumaludu silan kanan, aw miglong silan, "Kay Hariꞌ na manga Judiyu, magkadugay pa galu ya pag-eyaꞌ mu asini tas na lupaꞌ!" 30 Pigpan-eleban nilan si Jisus aw pigkamang nilan adti kanan ya bangkaꞌ aw gayed nilan pigbunalan ya ulu nan. 31 Pagkatigkas nilan sakanan odoy-odoyun, pigluwasan nilan sa malawig na sa-ul aw piglikuꞌ nilan pigpasut ya kanan kadégkadég. Aw tigkas yan, pigdala na manga sundalu si Jisus adti luwaꞌ na syudad na un nilan kalabuwan adti krus.

32 Sa pagdala na manga sundalu kan Jisus adti luwaꞌ na syudad na Jérusalim, pig-isungun nilan ya sambuk na eseg na si Simon na taga syudad na Ciréné, aw pigleges pigpapisan kanan na manga sundalu ya krus ni Jisus. 33 Aw dyumateng da silan adti banwa na pigngalanan na Golgota na ya kakawasan: Banwa na Pesaꞌ na Ulu. 34 Pigdimilan nilan si Jisus na bino na pigdali-an na to-o mapayit. Manang sa pagtémtém nan, walaꞌ nan inema.

35 Aw tigkas yan, pigkalabuwan nilan si Jisus adti krus. Aw migbunutbunut ya manga sundalu kun singalan kanilan ya makatagtun sa tagsambuksambuk na kadégkadég ni Jisus. 36 Pagkatigkas yan, nyingkud silan adti dalem na krus, aw pigtunggu-an nilan sakanan. 37 Aw apit adti tas na ulu nan awun pigtapliꞌ na tabla na pigsulatan sa limanda kanan: "Yeiy si Jisus, ya Hariꞌ na manga Judiyu." 38 Na, dun ni tampid ni Jisus awun uman duwa ya ribildi na pigkalabuwan adti manga krus nilan, ya sambuk apit adti kalintu aw ya sambuk uman apit adti kawala.*

39 Ya manga utaw na lyumabay dun, mig-odoy-odoy silan kan Jisus aw mig-eleng-eleng silan, 40 aw law nilan, "Miglong kaw na kalaten mu ya Témplo aw seled na tulungallaw pa-indegen mu uman salut ya bagu. Na! Tabangi ya kanmu pagka-utawun! Kun tengteng matinaw na ikaw ya tengteng Iseꞌ na Tyumanem, panog kaw dun ni krus!" 41 Maynan uman, mig-odoy-odoy kanan ya manga mangkatas na magdadugsu-ay aw manga magpalna-uway sa Uldin, aw ya manga magdadumala͡ay sa manga Judiyu, 42 aw miglong silan, "Mabatug nan tabangan ya manga eped manang diliꞌ nan mabatug tabangan ya kanan pagka-utawun. Hariꞌ kunu sakanan sa manga utaw na Isra-él! Kun manog sakanan dun ni krus, mangintu-u kami kanan! 43 Piglong nan na syumalig sakanan sa Tyumanem. Na, pakatanawan tadun kun kaliman na Tyumanem paluwa-en sakanan. Kay gayed nan piglong kunu na ‘Aku ya Iseꞌ na Tyumanem.’ " 44 Aw pangkay uman ya duwa ya ribildi na pigkalabu eped nan, mig-odoy-odoy uman kanan.

45 Na, pagka-alas dosi la, migkangitngit ya banwa seled na tulungka udas. 46 Pagka-alas trés na ambung, mig-ulangag si Jisus, aw mableg to-o ya tingeg nan, miglong sakanan, "Éli, Éli, lama sabaktani?" Ya kakawasan na piglong nan: "We…Tyumanem ku! We…Tyumanem ku! Anangaꞌ aku mu ayawan?"* 47 Sa pagdengeg na manga utaw na malapit dun, miglong ya eped kanilan, "Pigtawag nan ya propita na si Éliyas." 48 Aw sambuk kanilan maksay nyangay sa ispongha aw pig-elem nan adti bino na malagsing. Aw pigbetang nan adti tuktuk na layiꞌ aw pigsungit nan kan Jisus na un pasepsep kanan. 49 Manang miglong ya manga eped nilan, "Tagadan pa tadun! Tanawun tadun kun madi si Éliyas aw magtabang kanan." 50 Aw mig-ulangag to-o si Jisus, aw tigkas yan nyabugtuꞌ ya ginawa nan.

51 Aw nyakisay ya to-o madakmel na téla na pigsaliben na awun ni seled na Témplo, aw dayaw nyatengaꞌ lekat adti tas taman adti dalem.* Aw nyangka-eyeng ya lupaꞌ, aw nyangkabetak ya manga batu. 52 Aw pyangka-uwangan ya manga lebeng, aw madég ya nyangkataw na manga nyangintu-u sa Tyumanem, 53 aw lyumuwaꞌ silan adti kanilan manga lebeng. Pagkataw da ni Jisus lekat adti pagkamatay, syumeled silan adti Jérusalim, aw dun da silan kita-a na madég na utaw.

54 Na, migtungguꞌ dun kan Jisus ya sambuk na kapitan aw manga eped nan na sundalu. Aw sa pagbatiꞌ nilan sa linug aw sa pagkitaꞌ nilan sa kadég na nyangka-imoꞌ dun, to-o silan nyangkallek aw nyakapaglong silan, "Matinaw kadiꞌ! Ya utaw ini, tengteng saba Iseꞌ na Tyumanem!"

55 Awun uman madég na ka͡ubayan na migtandaw adti mawatawat. Silan ya taga Galiliya na gayed migsanggilaꞌ aw tyumabang kan Jisus. 56 Eped dun ni kanilan si Maria na taga lunsud na Magdala, aw si Maria na ina ni Santiago aw ni José, aw dun uman ya ka͡ubayan ni Zibidiyo.

57 Sa un da sumallep ya sega, dyumateng dun ya sambuk na utaw na mayaman na si José na taga Arimatiya. Aw nyangintu-u uman sakanan kan Jisus. 58 Aw nyadtu si José ni kan Pilato aw pigsekat nan ya lawas ni Jisus pada lebeng nan. Aw migsuguꞌ si Pilato na atag ya lawas ni Jisus adti kan José. 59 Yanagaw pigdala ni José ya lawas aw pigbedbedan nan na bagu na téla na linum. 60 Na, awun pig-imoꞌ da ni José na lebeng dun ni kilid na pangpang na yan ya pigtagilan nan galu sa paglebengan kanan. Aw dun nan betangan ya lawas ni Jisus. Aw tigkas yan, miglilid si José sa dakulaꞌ na batu adti bakaꞌ na ilib aw nyanaw sakanan. 61 Aw nyingkud si Maria na taga Magdala aw ya sambuk pa uman na Maria malapit dun ni piglebengan kan Jisus.

62 Na, pagkasalut na allaw, yan ya Allaw na Paglagdeng. Aw migkatipun adti asdangan ni Pilato ya manga mangkatas na magdadugsu-ay aw manga Parisiyo 63 aw miglong silan, "Kay Gubirnador, kya-anenganengan nami ya piglong na maggawayay yan idtu na walaꞌ pa sakanan kamatay. Miglong sakanan, ‘Paglabay na tulungallaw, matawun aku lekat adti pagkamatay.’ 64 Yanagaw migsekat kami kanmu na magsuguꞌ kaw sa manga sundalu na tunggu-an nilan ya piglebengan kanan taman adti katlu na allaw, pagaw takawun na manga umagakan nan ya kanan lawas aw gayed silan mag-ubat-ubat adti manga utaw na nyataw da sakanan lekat adti pagkamatay. Aw ya sampetan yan, to-o pa ya paggaluꞌ nilan kay sa idtu muna." 65 Yanagaw miglong si Pilato kanilan, "Pagtawag kamu sa manga sundalu aw pakadyawa mayu ya pagpatungguꞌ sa piglebengan kanan!" 66 Aw nyadtu silan adti piglebengan kan Jisus. Aw pigpangilala͡an nilan ya dakulaꞌ na batu na pigtampeng adti bakaꞌ na ilib pada ka-ede-an nilan kun awun utaw na mag-anggin sa batu. Aw pigpatunggu-an nilan sa manga sundalu ya lebeng.