Mateus 17

Ya pagka-uman na kadakulaꞌ na lawas ni Jisus

1 Na, pagkatigkas na enemengallaw, pigpa-agad ni Jisus si Pédro aw ya duwa ya maylug na si Santiago aw si Juan. Aw tyumukud silan adti matas na buntud na oloꞌ silan. 2 Aw sa talana nilan sakanan pigtandawan, kyinitaꞌ nilan na nya-uman ya kadakulaꞌ na lawas ni Jisus, aw ya kalalamdag na gya nan kasiling na sega, aw ya kadégkadég nan to-o migkaputiꞌ. 3 Migpakitaꞌ uman dun si Moysis aw si Éliyas, aw migbalawbalaw silan si Jisus. 4 Aw miglong si Pédro kan Jisus, "Kay Magpalna-uway, madyaw kay ini kami! Kun malim kaw, magtulluk aku sa tulu ya layag asini, sambuk ya kanmu, sambuk ya kan Moysis aw sambuk uman ya kan Éliyas." 5 Sa talana pa nan miglong, awun labun na to-o malalamdag na tyumakleb kanilan. Aw awun tingeg na lekat adti labun na miglong, "Yeiy ya kanak Iseꞌ na to-o ku pigginawa͡an aw to-o aku kyatutukan kanan. Pakanyegi mayu sakanan!"