Yîsə̂ Aərə 14

Ətshi nə̂ azü ə̂në Aya Ndalimi nə shê əndje lə kuzu gâ ye kɔ

1 Mə lîshi kwatə̂mə ə wû Aya Ndalimi nə, tshə kâ gâ lafɔ pâ kaga Siɔ, də azü sake ngbangbo bale də zazü bishi amanə vəna (144 000), ə̂në əndje tâ əɨrɨ ye də əɨrɨ Abä nə gâ tə̂ matshi əndje gâ ye kɔ. 2 Mə djî ə̈bə̈ tshema ə̂në ə tô mâ lafɔ, ə̂në ə kɨ̂ mata əsərɨ âgbɔ̂ ədjuru ə̂ngû, mata kə lea yavrɨ tə âgbɔ̂ kɔ; â əkɨ ərə nə ə̂në mə djî kɔ, ə sə̂ mata kundi ə̂në aawonɔ nə sə kə nɔ nə kɔ. 3 Azü səkɔ sə̂ kə vi ə̈bə̈ tafa ətshi, gâ ətshi mbata ngerə nə, ndje gâ ətshi asorô nə vəna nə də aâgbɔ̂ azü nə. Ə̈bə̈ əzü bale lï lï ndə kə pa tshə manda ətshi səkɔ ne, kʉtə̂ azü nə sake ngbangbo bale də zazü bishi amanə vəna (144 000) nə, ə̂në əndje yɔ̂ əndje pâ ashɔ kɔ kə lï ndə kə vi nə.

4 Azü ə̂në əndje djâ djâ tə̂ əndje də ayashe bale ne, ə̂në əndje wusə̂ ayashe wu ne kɔ kə sə̂. Əndje sə kə za äwä Aya Ndalimi nə na na ye tə̂ ətshe nɔ̂ ə̂në tshə sə kə na tə̂ nə kɔ. Əndje yɔ̂ əndje lə takpa tə̂ azü mata angbʉlî kumu ərə mbrə Ndjapä gâ ndə Aya Ndalimi nə gâ ye. 5 Â əndje sɔ̂tə̂ ə̈bə̈ əpʉ əterə bale sɔ̂ lə ama əndje ne. Ə̈bə̈ əpʉ bale sə sə lə kumu əndje ne.