1 Bale, mə wû ə̈bə̈ tafa tshelafɔ də ə̈bə̈ tafa ashɔ, mbrə ə̂në angbʉlî tshelafɔ nə də angbʉlî ashɔ nə rô gâ ye â ə̂ngû əngbrʉ sə sə kwatə̂ye je ne. 2 Â mə wû gala nə ə̂në ə sə kpî mbrə Ndjapä kɔ, tafa Jeruzalamə nə, ə̂në ə tô mâ lafɔ, mâ ngotə̂ Ndjapä nə â ə sə̂ kə jerə nə kɔ, ə gâmba tə̂ ye gâ ye mata yashe ə̂në koshe tô ətshə â tshə mbrə̂ gao ndə kə ka mbrə äkɔ̈ nə kɔ. 3 Mə djî ə̈bə̈ âgbɔ̂ tshema ə̂në ə tô djoko tə̂ mbata ngerə nə ə pâ əpʉ ə pa: «Ə̂sə̂ kə sə Ndjapä sə lə takpa tə̂ azü gâ ye! Ə̂sə̂ kə sə ətshə sə kə sə lə takpa tə̂ əndje â əndje sə kə sə tə azü nə̂ ye. Ətshə də ə̂tə̂ ye sə kə sə lə takpa tə̂ əndje, â tshə sə kə sə tə Ndjapä nə̂ əndje. 4 Tshə sə kə tru ngɔla nɔ̂ lə ala əndje. Kuzu ə sə sə je kwatə̂ye ne, â əpʉ mbadja wala əkɨ wala kə wu əyo ə sə sə je kwatəndje ne, mbrə ə̂në aangbʉlî aərə rô gâ ye.»

5 Â, ətshə nə ə̂në tshə sə̂ gâ tʉ gâ pâ mbata ngerə nə kɔ, tshə pâ əpʉ ə pa: «E wü-a, mə mbrə ərə nɔ̂ tə tafa nə.» Â tshə pâ kwatə̂ye ə pa: «Tä gâ lə fraka, mbrə ə̂në aəpʉ səke sə tə adjatra aəpʉ, ə̂në azü lï ndə kə za lɔsu əndje nɔ̂ gâ pâ nə.» 6 Tshə pâ kwatə̂ye kə əmə ə pa: «Ə kâ gâ ye! Əmə də̂ Alfa də Ɔmega, kə vɔtə̂ ərə də kə nglɔ nə. Əzü ə̂në əgo ə̂ngû mi ətshə, mə sə kə to ə̂ngû yasa ə̂në ə za sorô kɔ kə ətshə tə ambanə. 7 Ərə rə kə sə tə ənə̂ əzü ə̂në tshə sɔ̂ lagbanga gâ ye. Mə sə kə sə tə Ndjapä nə̂ ye â tshə sə kə sə tə ɨrɨ əmə. 8 Bale, ənə̂ alayïawa də azü ə̂në əndje bâta äwä əpʉ lɔsu əndje bâta ne kɔ də aawombrə aərə kene də aawowo azü də aawombrə ə̂trû də alayïəndro də aawovrɔ aamba andjapä gâ ndə alayïəterə nɔ̂, ə̂sə̂ əndje sə kə sə mâ ala âgbɔ̂ kudû əwo abadja ə̂në ə sho ətshe ə sho kɔ: bishi kuzu nə kə sə̂.»

9 Bale mandânə, ə̈bə̈ trawaya nə̂ Ndjapä nə bale lə takpa tə̂ əndje mindû amanə bishi nə ə̂në əndje têgbɔ akopo nə mindû amanə bishi nə kɔ, ə̂në ə tɔ̂ trɔ̂ də abale aəmbrʉ aərə nə mindû amanə bishi nə, lə kəna əndje nə kɔ, nâ ə pâ əpʉ kə əmə ə pa: «Nä gâ əmə, mə sə kə yisə̂ yashe nə ə̂në Aya Ndalimi nə tô ətshə kɔ, əwɔ nə, kə əbə.»

10 Tshə zâ əmə ə rô də əmə tə̂ äwä Yîrə̂ gâ pâ ə̈bə̈ əgerə ə̈ngrʉ̈ kaga, ə yîsə̂ gala nə ə̂në ə sə kpî kɔ, Jeruzalamə nə, ə̂në ə tô mâ lafɔ, mâ ngotə̂ Ndjapä, ə sə kə jêrə kɔ kə əmə. 11 Ə̂yî Ndjapä tshe ə tshe lə nə. Kə tshe nə kô kə tshe ə̈bə̈ əkpʉ âgbɔ̂ ndogɔ, ə kô kə tshe ə̈bə̈ əkpʉ ə̂në əndje ê ə pa jasəpə kɔ, ə̂në ə sə yîrə̂ yîrə̂ mata ərə ə̂në əndje ê ə pa krisətalə kɔ. 12 Ə̈bə̈ əgerə ə̈ngrʉ̈ dati sə̂ dji nə nɔ̂. Amanda nə sə̂ morofo amanə bishi â atrawaya nə̂ Ndjapä morofo amanə bishi kâ gâ pâ amanda nə. Â əndje tâ aəɨrɨ gâ tə̂ amanda nə, aəɨrɨ amarä morofo amanə bishi nə̂ azü əgɔ Isərayalə. 13 Djoko tshepalɔ, amanda sə̂ vəta, vəta djoko tshepagəle, vəta djoko tshepakɔnɔ â vəta djoko lɔtebanga. 14 Dati nə ə̂në ə sə̂ dji tshelə gala nə kɔ, ə kâ gâ pâ əgbro aəkpʉ morofo amanə bishi â aəɨrɨ azü-awla nə̂ Aya Ndalimi nə morofo amanə bishi nə sə̂ pâ aəkpʉ nə.

15 Ətshə nə ə̂në tshə sə̂ kə pa əpʉ nə kə əmə kɔ, tshə sə̂ də ə̈bə̈ ərə kə lï gâ tə̂ aərə lə kəna ye, tə ə̈bə̈ wara lɔrə, ndə kə pa tshə lï tshelə gala nə də tshelə amanda nə gâ ndə dati nə ə̂në ə sə̂ dji tshelə gala nə kɔ də nə. 16 Gala nə sə̂ kərâ, kə gu nə lï ə lï də kə ndo nə. Tshə lî tshelə gala nə də wara nə: ə mâ mata kə dɨ tshelə ə̈nü ngbangbo bishi (200) äwä sake morofo amanə bishi (12 000); kə gu nə də kə ndo nə gâ ndə kə gu nə gâ lafɔ lï ə lï. 17 Tshə lî gâ tə̂ dati nə: ə mâ tshelə də̂ngʉ̂ ngbangbo bale də zazü bishi amanə vəna (144)*, lïndə̂ kə lï ərə nə̂ azü ə̂në trawaya nə̂ Ndjapä nə lî kɔ. 18 Əndje mbrə̂ dati tshepa gala nə də marä əkpʉ ə̂në əndje ê ə pa jasəpə kɔ, â tshelə gala nə sə kʉ də lɔrə â sə yîrə̂ yîrə̂ mata ərə ə̂në əndje ê tə̂ nə krisətalə kɔ. 19 Əndje kô adongo aəkpʉ ndogɔ nɔ̂ ə mbrə̂ də aərə gao gâ tə̂ aəkpʉ ə̈nü dati nə ə̂në ə sə̂ dji gala nə kɔ; angbʉlî əkpʉ ə̈nü nə sə̂ də ərə ə̂në əndje ê tə̂ nə jasəpə kɔ, bishi nə sə̂ də ərə ə̂në əndje ê tə̂ nə safirə kɔ, vəta nə sə̂ də ərə ə̂në əndje ê tə̂ nə ə pa kaləsedwanə kɔ, vəna nə sə̂ də ərə ə̂në əndje ê tə̂ nə ə pa emerɔdə kɔ, 20 mindû nə sə̂ də ərə ə̂në əndje ê tə̂ nə ə pa sardonikəsə kɔ, mindû amanə bale nə sə̂ də ərə ə̂në əndje ê ə pa sarədwanə kɔ, mindû amanə bishi nə sə̂ də ərə ə̂në əndje ê ə pa krizɔlitə kɔ, mindû amanə vəta nə sə̂ də ərə ə̂në əndje ê ə pa berilə kɔ, mindû amanə vəna nə sə̂ də ərə ə̂në əndje ê ə pa topazə kɔ, morofo nə sə̂ də ərə ə̂në əndje ê ə pa krizɔprazə kɔ, morofo amanə bale nə sə̂ də ərə ə̂në əndje ê ə pa yasatə kɔ â morofo amanə bishi nə sə̂ də ərə ə̂në əndje ê ə pa ametisətə kɔ. 21 Amanda nə morofo amanə bishi nə sə̂ tə alenge morofo amanə bishi â əndje mbrə̂ manda bale bale də lenge kʉ bale. Âgbɔ̂ äwä tshelə gala nə sə kʉ də lɔrə tshî, ə̂në ə sə yîrə̂ yîrə̂ mata ərə ə̂në əndje ê tə̂ nə krisətalə kɔ.

22 Bale, mə wû Anda Ndjapä wû lə gala nə ne, mbrə ə̂në Əyïlingû tə Ndjapä nə, Âgbɔ̂ Əyïworɔgbɔ nə, gâ ndə Aya Ndalimi nə sə tə Anda Ndjapä tshelə gala nə. 23 Tshelə gala nə yu yu tshuku alɔ wala yipʉ ndə kə pa ə tshe lə nə ne, mbrə ə̂në ə̂yî Ndjapä nə sə kə tshe lə nə, â lamba tshelə nə kə də̂ Aya Ndalimi nə. 24 Azü aəgɔ ə na ana ndə ə̂yî nə je, â alayïngerə tshepashɔ ə na də arishi nə̂ əndje gâ lə nə je. 25 Amanda nə sə sə kə tshu gâ tə̂ nə alɔ bale də alɔ ne, mbrə ə̂në tsheləbu sə sə kə sə je ne. 26 Əndje sə kə na də arishi nɔ̂ gâ ndə aə̂rɔ̂ aərə gao nə̂ azü aəgɔ gâ lə nə. 27 Ə̈bə̈ əmbrʉ ərə wala ə̈bə̈ awombrə aərə kene wala əyïəterə ə li li gâ lə nə alɔ bale ne, bale kʉtə̂ əndje nə ə̂në əndje tâ əndje əɨrɨ əndje gâ lə fraka sorô nə̂ Aya Ndalimi nə kɔ kə li.