1 Ndə ə̈bə̈ alɔ, Jezu sə̂ kə yu Ndjapä tə̂ ə̈bə̈ ətshe. Alɔ ə̂në tshə yû Ndjapä nə ə kâ gâ ye kɔ, ə̈bə̈ trawaya nə̂ ye bale pâ kə ətshə ə pa: «Âgbɔ̂ Əyïngerə, yïsə̂ äwä kə yu Ndjapä kə ä mata ə̂në Zââ Batistə yîsə̂ nə kə atrawaya nə̂ ye kɔ.» 2 Jezu pâ kə əndje ə pa: «Alɔ ə̂në e sə kə yu Ndjapä, e pä:

Abä!

Ä yində nə ə pa azü nɔ̂ lʉ əɨrɨ zə ə̂në ə sə kpî kɔ,

əndje yërɔ əbə tə Əyïngerə nə̂ əndje.

3 Tö rəgo nə̂ ä nə̂ əlo bale bale kə ä.

4 Gbä tshelə anyaka nə̂ ä lə kumu ä,

mbrə ə̂në ä-ä ndje,

ä gba tshelə ködä nyaka lə kumu alayïnyaka nə̂ ä.

Kätə̂ ä kä ä te gâ lə afrɔ ərə ne.»

5 Jezu pâ kwatə̂ye kə əndje ə pa: «Əde lə takpa tə̂ e kə sə də ə̈bə̈ gbɔbəngâ nə ə̂në tshə na gâ ndə ye də tsheləbu kpə ə̂grûtshe ə pa kə ətshə ə pa: "Gbɔbəngâ, kö mapa vəta kə əmə, mə kirə də nə kə əbə je. 6 Mbrə ə̂në ə̈bə̈ gbɔbəngâ əmə bale ə̂në tshə sə lə ə̈ngrʉ̈ ana kɔ wûtu mâ ndə əmə, mə sə sə də ə̈bə̈ ərə bale ndə kə za kə ətshə ne." 7 Kədə ngâ nə səkɔ sə pə mâ lə anda nə mâ je ə kirə əpʉ kə ətshə ə pa: "Kätə̂ kə toworo əmə gâ ye, ä tshû manda gâ tə̂ nə gâ ye, əmə də aneshe nə̂ əmə ä shô gâ tʉ gâ ye, äwä ndə kə pa mə afɔ ə ko amapa nə kə əbə guta gu ne." 8 Mə pa kə e: Kədə tshə afɔ a ndə kə ko amapa nə kə ətshə mbrə ə̂në tshə sə tə gbɔbəngâ nə ne, tshə sə kə afɔ ndə kə ko aərə ə̂në tshə yində nə kɔ nɔ̂ kə ətshə mbrə ə̂në tshə ka katə̂ kə toworo ətshə ne.

9 «Bale, mə pa kə e: E yü tshuku ərə, əndje sə kə za kə e; e prä ərə, e sə kə sɔtə̂ nə; e ngë manda, əndje sə kə krɔ nə kə e. 10 Mbrə ə̂në əzü ə̂në tshə yu tshuku ərə, əndje sə kə za kə ətshə; əzü ə̂në tshə pra ərə, tshə sə kə sɔtə̂ nə; əzü ə̂në tshə nge manda, əndje sə kə krɔ nə kə ətshə. 11 Abä əgblə əde lə takpa tə̂ e də̂ əgblə nə̂ ye yu ətshə tə̂*11.11 Alabə̈ afraka Ndjapä də ama grakə zâ əpʉ səye: «tə̂ mapa â tshə sə kə za badja kə ətshə?» gâ pâ nə. giangû â tshə sə kə za əkrɔ kə ətshə tə̂ ə̂sə̂ giangû nə? 12 Wala, kədə tshə yu tshuku əprʉ ngatə kə ətshə â tshə sə kə za kplakongo kə ətshə? 13 Kədə, e-e ə̂në e sə tə aəmbrʉ azü kɔ, e wusə̂ kə ko aə̂rɔ̂ aərə kə aneshe nə̂ e, Abä ə̂në tshə sə mâ lafɔ kɔ lï lï ndə kə wla Âgbɔ̂ Yîrə̂ kə azü ə̂në əndje yu tshuku ye kə ətshə kɔ ə ro ne a?»

14 Ndə ə̈bə̈ alɔ, Jezu grɔ̂ afrɔ yîrə̂ tə̂ ə̈bə̈ koshe ə̂në tshə sə tə gbɔndɨbʉ kɔ. Alɔ ə̂në afrɔ yîrə̂ nə wûtu lə koshe nə gâ ye kɔ, tshə vɔ̂tə̂ kə pa tshema ye. Bale, kumu ə̂kpû azü nə kpê pâ əndu əndje. 15 Lə ə̂kpû azü nə, alabə̈ əndje pâ: «Tshə grɔ aafrɔ ayirə̂ nə də awlra nə̂ Beləzebulə*11.15 Beləzebulə: Ə sə tə ə̈bə̈ ata əɨrɨ djablo., makɔndji nə̂ aafrɔ ayirə̂ nə.» 16 Alabə̈ aata əndje yîndə kə le Jezu nə ə le ə pâ kə ətshə ə pa tshə ma ə̈bə̈ ərə ndə kə yisə̂ nə ə pa Ndjapä kə wlâ əne kɔ.

17 Bale, Jezu wûsə̂ əpʉ ə̂në ə sə̂ mâ tə̂ lɔsu əndje kɔ, ə pâ kə əndje ə pa: «Əgɔ nɔ̂ ə̂në azü tshelə nə sə kə mbrə awlra lə takpa tə̂ əndje, əgɔ nə sə kə ndɨ nə, aanda tshelə əgɔ nə sə kə ngɔ gbo angâ əndje. 18 Kədə Sataa ma awlra gâ tə̂ ye də ə̂tə̂ ye, əgɔngerə nə̂ ye ə sə pə je atâ a? Mbrə ə̂në e pa mə grɔ aafrɔ ayirə̂ də awlra nə̂ Beləzebulə. 19 Kədə əmə, mə grɔ aafrɔ ayirə̂ də awlra nə̂ Beləzebulə, azü nə̂ e, əndje sə kə grɔ aafrɔ ayirə̂ nə də awlra nə̂ əde? Âdârə ə̂në azü nə̂ e də ə̂tə̂ əndje yisə̂ nə ə pa əpʉ nə̂ e nə sə sə də äwänə ne. 20 Bale, kədə əmə, mə sə kə grɔ aafrɔ ayirə̂ nə də awlra nə̂ Ndjapä, kandää Əgɔngerə nə̂ Ndjapä wûtu ndjɔ gâ tə̂ e gâ ye.

21 «Alɔ ə̂në ə̈bə̈ əzü sə də awlra də aərə koshe tə̂ ye â sə kə bata anda nə̂ ye, ə̈bə̈ ərə sə sə kə mbrə tə̂ aərə nə̂ ye ne. 22 Bale, kədə ə̈bə̈ əyïworɔgbɔ kə wutu mâ ndə ye â za ətshə gbo tshe, tshə sə kə ko aərə koshe nə̂ ye nə nɔ̂ ə̂në tshə za lɔsu ye gâ pâ nə kɔ tə̂ ye ə ko aərə nə̂ ye nə ə kru tshelə nə tə̂ azü.

23 «Əzü ə̂në tshə sə sə djoko ndə əmə ne, tshə wə̂ra tə̂ ye tə̂ əmə gâ ye. Əzü ə̂në tshə yi kəna ye yi kə əmə ndə kə ngbo aərə gâ tə̂ nə ne, tshə sə tə awondjɔ tshelə aərə.»

24 Bale, Jezu kwâtə̂ye ə pâ: «Alɔ ə̂në ə̈bə̈ afrɔ yîrə̂ wûtu lə ə̈bə̈ əzü, afrɔ yîrə̂ nə sə kə na ana lə ngbûndû ndə kə pra ə̈bə̈ ətshe ndə kə wu tə̂ ye tə̂ nə. Kədə tshə â sɔtə̂ ətshe nə sɔ ne, bale, tshə sə kə pa nə ə pa: "Mə sə kə do tə̂ əmə ə gu mâ lə anda nə̂ əmə ə̂në mə wûtu lə nə kɔ." 25 Alɔ ə̂në tshə do tə̂ ye ə gu, tshə sə kə wu anda nə ə̂në əndje ngbô tshelə nə mvo gâ ye ə gâmba tshelə nə tə ə̂rɔ̂nə gâ ye kɔ. 26 Bale, tshə sə kə na ə ko alabə̈ angâ nə də̂ aafrɔ ayirə̂ nə mindû amanə bishi ə̂në əndje sə tə aəmbrʉ nə ə rô ətshə gâ ye kɔ, əndje sə kə gu ə li ə gamba ə̂sə̂ əndje gâ lə anda nə. Mandânə, əzü nə sə kə wu əyo ə ro pâ ənə̂ ətshi nə kɔ!»

27 Alɔ ə̂në Jezu sə̂ kə pa əpʉ rəkɔ, ə̈bə̈ yashe lə ə̂kpû azü nə tâ râwâ ə pâ kə ətshə ə pa: «Ənə̂ ye tə ə̂rɔ̂nə, yashe ə̂në tshə zâ əndu zə ə zâ angɔ kə əbə kɔ.» 28 Jezu kîrə əpʉ ə pa: «Ənə̂ əndje tə ə̂rɔ̂nə ə rô pâ nə, azü ə̂në əndje dji Əpʉ nə̂ Ndjapä ə mbrə tə̂ əndje Lïndə̂ nə!»

29 Ə̂në ə̂kpû azü nə ngbrû gâ ngotə̂ Jezu kɔ, tshə vɔ̂tə̂ kə pa əpʉ ə pa: «Azü tshe kpəsəye sə tə aəmbrʉ azü. Əndje yində kə wu ə̈bə̈ ərə ə̈lü. Bale, əndje sə sə kə wu nə bale ne, kʉtə̂ ərə ə̈lü ə̂në ə wûtu gâ tə̂ awopandəma Ndjapä Jonasə kɔ ə lî gâ ye. 30 Äwä bale mata ə̂në Jonasə*11.30 Wu Jona 1–4. sə̂ tə ərə ə̈lü mbrə azü əgɔ Ninivə kɔ, Əgblə nə̂ Əzü sə kə sə ndje tə ərə ə̈lü nə̂ Ndjapä mbrə azü tshe kpəsəye. 31 Tə̂ alɔ kə wa ngbanga nə̂ Ndjapä, yashe ngerə əgɔ tshepakɔnɔ sə kə afɔ kpə ətshi azü tshe kpəsəye ndə kə za əpʉ gâ lə kumu əndje. Mbrə ə̂në tshə âfɔ lə əgɔ ə̂në ə sə ngrʉ̂ kɔ ə nâ ndə kə dji əpʉ kə wusə̂ âdâ ərə lə ama Salomɔ. Bale, ə̈bə̈ əzü sə kotəye ə̂në tshə rô Salomɔ nə gâ ye. 32 Tə̂ alɔ kə wa ngbanga nə̂ Ndjapä, azü əgɔ Ninivə sə kə afɔ kpə ətshi azü tshe kpəsəye ndə kə za əpʉ gâ lə kumu əndje. Mbrə ə̂në azü əgɔ Ninivə tshî äwä angbrɔ kə mbrə tə̂ əndje tʉ ə̂në əndje djî kə mʉ əpʉ nə̂ Jonasə kɔ. Bale, ə̈bə̈ əzü sə kotəye ə̂në tshə rô Jonasə nə gâ ye.»

33 «Ə̈bə̈ əzü za əwo za gâ lə lamba ndə kə za wû ne, wala ndə kə za gâ tshekudu ləsû ne. Əzü â za əwo gâ lə lamba, tshə za di gâ tə̂ ərə gâ lafɔ ndə kə pa azü ə̂në əndje li gâ lə anda nə kɔ, əndje lishi ndə nə. 34 Ala zə sə tə lamba tshekotə̂ zə. Alɔ ə̂në ala zə sə tə ə̂rɔ̂nə, tshekotə̂ zə nɔ̂ sə lə ə̂yîtshe. Bale, kədə ala zə nə kə ndɨ̂ gâ ye, tshekotə̂ zə nɔ̂ sə lə əbutshe. 35 Mä əndɨ mä ndə kə pa ə̂yîəwo ə̂në ə sə lə zə kɔ ə sə tə əbutshe ne. 36 Kədə ə̂yîəwo kə za dji ndʉ zə nɔ̂ â ə̈bə̈ əbutshe bale guta gu ne, tshekotə̂ zə nɔ̂ sə kə sə lə ə̂yîtshe mata ə̂në ə̂yîəwo lamba sə kə tshe gâ tə̂ zə kɔ.»

37 Ə̂në Jezu sə̂ pə kə pa əpʉ kɔ, ə̈bə̈ Fariza ê ətshə ndə kə pa tshə na ə zɨ rəgo mâ lə anda nə̂ əne. Tshə lî gâ lə anda nə ə sə̂ gâ tʉ ndə kə zɨ rəgo nə. 38 Fariza nə wû ə pa Jezu yûtu kəna ye yûtu ne*11.38 Kə yutu kəna sə tə mandʉ ərə əpʉ Ndjapä nə̂ Ajuwufu. â vɔ̂tə̂ kə zɨ rəgo nə kɔ, kumu ye kpê pâ əndu ye. 39 Bale, Âgbɔ̂ Əyïngerə nə pâ kə ətshə ə pa: «E-e də̂ Afariza, e sə kə yutu tshepa kopo nə də sambe nə! Kandää, əgo angba də aəmbrʉ aərə rô pâ nə lə e gâ ye. 40 Aəndɨ! Ndjapä ə̂në tshə mâ tshepa ərə kɔ, tshə mâ ndje tshelə nə mâ ne a? 41 E kö aərə ə̂në ə sə lə akopo nə də asambe nə̂ e nə kɔ kə alayïəyo ka e sə mvo nɔ̂.

42 «Əyo gâ pâ e, Afariza! Mbrə ə̂në e ko dimə kako ayɔ kəndɨ nə̂ e, aərə mata matə də ru də dimə kako gûsû nə̂ e kə Ndjapä. Bale, e tshi ə̂rɔ̂ kə mbrə tə̂ əzü də kə yində Ndjapä tʉ: kandää, aərə ə̂në e lï ndə kə mbrə nə kɔ kə sə̂ â mbrə ə̂dû aərə nə gâ ndə nə.

43 «Əyo gâ pâ e, Afariza! Mbrə ə̂në e yində nə ə pa e sə gâ ətshinə gâ pâ angende lə aanda aangbɔ, e yində nə ə pa azü afɔ ka ə bla e lə ə̂kpû azü.

44 «Əyo gâ pâ e! Mbrə ə̂në e sə mata aə̂dû akuzu ə̂në azü wu wu ne ə wusə̂ nə wu ne â sə kə na pâ nə kɔ!» 45 Ə̈bə̈ awoyisə̂ âgbɔ̂ əpʉ nə̂ Əyïlingû bale zâ əpʉ ə pâ kə Jezu ə pa: «Awoyisə̂ ərə, əpʉ nə ə̂në bə pa rəkɔ, bə sə kə gu ä-ä ndje kə sə̂ a!» 46 Jezu kîrə əpʉ kə ətshə ə pa: «Əyo gâ pâ e ndje, aawoyisə̂ âgbɔ̂ əpʉ nə̂ Əyïlingû! Mbrə ə̂në e sə kə ko kongbɔ ə̂në ə lʉ̂ wââ kɔ gâ lə kumu azü, e go goro də ə̂tə̂ e də mato kəna e bale ne!

47 «Əyo gâ pâ e! Mbrə ə̂në e sə kə so aə̂dû aawopandəma Ndjapä ə̂në alätä e kə wô əndje gâ ye kɔ. 48 E sə kə yisə̂ nə ə pa e yində aərə ə̂në alätä e mbrə̂ gâ ye kɔ, mbrə ə̂në, əndje, əndje wô aawopandəma Ndjapä nə, e-e, e sə kə so aə̂dû əndje nə. 49 Âdârə ə̂në Ndjapä pâ tə̂ äwä kə wusə̂ âdâ ərə nə̂ ye ə pa: "Mə sə kə wla aawopandəma Ndjapä də alayïawla kə əndje. Əndje sə kə wo alabə̈ nə ə sə kə gi əyo tə̂ alabə̈ əndje." 50 Bale, Ndjapä sə kə yu azü tshe kpəsəye gâ pâ ə̈ndjï aawopandəma Ndjapä nə nɔ̂ ə̂në əndje wô əndje kɔ ə vɔ̂tə̂ nə mâ tə̂ ama kə mo tshepashɔ ʉrrr ndjɔ kpəsəye. 51 Ə vɔ̂tə̂ nə mâ tə̂ ə̈ndjï Abalə*11.51 Wu Vɔtə̂ 4.8-16. ʉrrr wutu nə gâ tə̂ ə̈ndjï Zakari*11.51 Wu 2Nger 24.20-22. ə̂në əndje wô ətshə lə əpro tə̂ gblaka də tshelə Anda Ndjapä nə kɔ. Mə pa kə e: Ndjapä sə kə yu azü tshe kpəsəye gâ pâ kuzu aawopandəma Ndjapä səkɔ!

52 «Əyo gâ pâ e, aawoyisə̂ âgbɔ̂ əpʉ nə̂ Mayïzə mbrə ə̂në e djɔ̂ krele manda kə wusə̂ ərə gâ ye: e-e də ə̂tə̂ e, e lî lî gâ lə nə ne, e gbɔ̂ tə̂ äwä tə̂ azü ə̂në əndje yîndə kə li gâ lə nə kɔ gâ ye!»

53 Ə̂në Jezu wûtu lə anda nə gashu gâ ye kɔ, tshelə aawoyisə̂ âgbɔ̂ əpʉ nə̂ Mayïzə nə də Afariza nə kô əndje tə bandanə tə̂ ye. Əndje yû ətshə də əpʉ gâ pâ adongo aərə kpî kpî kpî. 54 Əndje yîndə kə le ətshə ə le ndə kə sɔtə̂ ə̈bə̈ əpʉ lə ama ye.