1 Pakalepo ndakabona imwe ingilozi inesimba kasakasa izha iva kudenga, yaka putilijwa negole, nejinga pansholo wayo, akale kumesho kwayo kwakabeli sezhuba, akale makumbo ayo akabeli samatabilijo omoto. 2 Yakabeli nakakwalo katukutuku kalozhulwa muluboko lwayo. Ikabiga igumbo lyayo lolulyi mugungwa, akale igumbo lyechesho likatoba penyika, 3 yakashomeja newhi lyopezhulu, seshumba imunguluma, payakashomeja, mitimbo mishanu inamibili yakadabila idilima. 4 Akale payakati yadilima mitimbo mishanu inamibili, ndakaba ndalibo kwala, koga ndakawha iwhi liva kudenga liti, "Ita zwalebwa nemitimbo mishanu inamibili libesiswa, akale usizwikwale."

5 Akale ingilozi yandakabona ilimile pegungwa nopenyika yakanyamulila luboko lwayo lolulyi kudenga, 6 ekowha naiye unabupenyu businopela, wakabumba idenga naizwo zwose zwimo mwaili, nenyika naizwo zwose zwimo mwaili, negungwa naizwo zwose zwimo mwalili, kuti "Kusibane nokumwe kuchelejeka, 7 koga kuti, mumazhuba okushomeja kolukwembo luchalijwa nengilozi yashanu nembili, chichenamiso chaMwali, sezwaka zibiswa kubashingi babe bapolofeti, chinokwelela kuzhajikijwa."

8 Pakalepo iwhi lindakabawha liva kudenga lyakalebeleka kwandili akale, liti, "Inda unotola lukwalo lulozhulwa muluboko lwengilozi imile mugugwa nopenyika."

9 Nokudalo ndakenda kungilozi ndikati indipe kakwalo katukutuku, iyo yakati kwandili, "Katole ukalye, kanozipa mundomo mumo sobuchi koga kemyonga muntumbu uwo,"

10 Akale ndakakatola kakwalo katukutuku muluboko lwengilozi ndikakalya, kakabezipa swobuchi mundomo mwangu, koga pandakati ndakalya mutumbu mwangu mwakamyonga. 11 Akale ndakabujwa kuti, "Iwi ulokwelela kupolofita akale nozwabanhu banji nenduji nendimi namashe."