1 "Kwalila Ingilozi yokugubungano lyokuEfesu uti:

"Yaya mawhi oyo ulobhata inyenyeji ishanu jine mbili muluboko lulwe lolulyi, unokwendenda pakati pozwigajiko zwendalama zwozwimuniko zwishanu zwinazwibili. 2 Ndoyiziba mishingo yenu, kushinga kwenu nesimba nokusimilila, nemyoyo yenu milefu. Akale nokuso whanana nabanhu babi, koga mwakakweja yabo baluzwiti bapositoli koga besili ibo, akale mukawana kuti ngibamaniepwa. 3 Ndoziba kuti unozwisimisa nomwoyondefu, akale uzwisimisila izina lyangu, akale aujimunyajwa nazwo. 4 Koga ndina nechi chandino nyunyuta kunawi, kuti wakalasha ludo luwakabeli nalo pakutanga. 5 Kumbulukwa ngweno kuti wakawa chini, zwifije ute mishingo yawakabeta pakutanga. Ungosozwita, ndoozha kwauli ndibhise chigajiko chicho chechimuniko pabugalo pachili. 6 Koga yechi chibuya una nacho, unobenga mishingo yamaNikolayiteni, yandinobenga bo.

7 "Iye unenzebe, ngewhe kuti uMpepo umutini kumakubungano!

"Kuna yoyo unozunda ndoomvumija kuti elye michelo yonti wobupenyu, umo mupaladiso yaMwali.

8 "Kwalila ingilozi yegubungano lyokuSimina, uti,

"Mawhi anova kunoyo wokutanga nookujibija, iye wakafa akale akamuka. 9 ‘Ndokuziba kuyabiswa kuko akale nobusheti bubo, koga umfumi akale nechipito chaabo banozwiti baJuda, besiibo koga beli isinagogo yaSatani. 10 Usitye busheti bwalobokuswikila. Ilinga, guluzhanje waloboposela bamwe benu muntolongo, kuti mukwejwe, kwamazhuba aligumi unoba mumasheto. Iwi bimbika kuswikila palufu, akale imi ndokupa bupenyu senhulu yokukoma.’"

11 "Iye unenzebe, ngewhe kuti uMpepo umutini kumakubungano."

"Iye uchazunda aatolwajiswa nolufu lwabili."

12 "Kwalila ingilozi yegubungano lyokuPegamamu uti:

"Yaya mawhi awe iye unegwalabaza linopiza linocheka kwosekwose. 13 Ndokuziba kwaunogala, ndiko kunachigalo chobushe chaSatani. Koga ulobhatilila muzina lyangu akale aujakalamba kudimbwa kuko kunami kana mumazhuba aAntipasi, unsumikiji wangu ulobimbika, wakabulayiwa muguta lyenu, mwanogala Satani. 14 Koga ndinazwishoma zwandinonyunyuta kwauli, unabamwe balobhatilila indayijo yaBhalamu, wakalayija Bhalaki kuteya bana baIzilayeli, kuti belye kulya kwakabapilwa kuzwimwali akale nokuta busangu. 15 Nezwo iwi una bamwe balobhatilila kundayijo yamaNikolayiteni. 16 Nezwo shanduka. Kungosoba alo, ndoozha kwauli nokukambijisa, akale ndoolwana nabo negwalabaza londomo wangu."

17 "Iye unenzebe, ngewhe kuti uMpepo umulebani kumakubungano."

"Kuna yoyo uchazunda ndoompa imwe yemana ilosisika, akale ndoompa ibwe ijena, nezina ibhya lilokwalwa pebwe yelo lisinozibwa noomwe kuzhe kooyo uchalitambula."

18 "Kwalila ingilozi yegubungano lyokuTiyatila.

"Yaya ndiwo mawhi oMwananhulumyana waMwali, unamesho anangasontutumo womoto, makumbo awe anangasengula ilokwijingwa. 19 Ndoiziba mishingo iyo, ludo lulo, kudimbwa, bushingili nokugontama kuko kokubhatilila. Akale nokuti mishingo iyo yangweno inopinda yotanga. 20 Koga ndina nezwi zwandinonyunyuta kwauli, kuti iwi unotobelejelana nonhukaji yoyu Jezebhelu, unozwishoba kuti umpolofetikaji. Umulayija nokuchengela bashingi bangu kuti besanguke akale kuti belye zwapilwa kuzwimwali. 21 Ndakompa unshaji kuti eshanduke, koga ukumulamba kusiya busangu bubwe. 22 Ilinga, ndoomposela pabulo bobulwaji, akale nayabo banopombola naye ndoobaposela mumasheto makulwana, kuzhe kokuti beshanduke muzwito zwabo. 23 Lingani, ndoobulaya bana babe. Makubungano wose ndipo paachoziba kuti ndimi iye unopenyengula indangalilo nemyoyo, akale ndoolipa umwe noumwe nezwino kwendelana nemishingo iye."

24 ‘Koga mubunji bwenu muTiyatila amujakatobela indayijo yeyi yobubi, musanu mwabhatilila kundayijo jilomila muzwinhu zwaSatani, kunamwi ndoti, anditobiga umwe untolo pezhulu penu. 25 Ibhatililani chete kuna zwamunanazwo, ndijine ndibuye. 26 Iye unozunda akale elondota mishingo yangu kuswikila kumapejelejo, ndoompa isimba pezhulu penduji, 27 akale unoobatonga nonzato wensimbi, sezwinotikana kana ihali ipwachaulwa mutubabi, 28 sezwo ndakatambula isimba liva kunaTate bangu, neebo ndoopa intanda.

29 "Iye unenzebe, ngewhe zwimulebwa noMpepo kumakubungano."