1 Pakalepo ingilozi yakanditondeja lwizi lwevula yobupenyu, inobelengela sekristali, ikunga iva muchibhula chobushe chaMwali akale necheMhwizana, 2 lupinda pakati pongwagwa weguta. Akale mumapazu ose olwizi, kumile miti yobupenyu nemichelo yayo iligumi nemibili, izwala michelo yayo mweji nomweji, akale mazhani onti akabeli okuchilisa inyika. 3 Apachinobana nozwifhizhwo.

Chibhula chobushe chaMwali necheMhwizana zwinoba zwili mukati mwalyo iguta, akale banoonshingila bashingi babe. 4 Banoobona chiso chiche, akale izina lilye linooba lili pehuma jabo. 5 Akale apatooba pechina busiku, abatooda kumunika kwechimuko kana kwezhuba, nokuti Iye She Mwali unooba mwenje wabo, akale banootonga kwemisi isinopela.

6 Ingilozi yakati kwandili, "Yaya mawhi alobimbika akale ichokomende. She, Mwali wemipepo yabapolofeti, watuma ingilozi iye kutondeja bashingi babe zwinokwelela kutikana nokukambijisa."

7 "Ilinga, ndikumuzha nokukambijisa. Ulokombolelwa iye unolondota mawhi obupolofeti bwewhalo yeyi."

8 Imi Joni ndimi ndakawha akale ndikabona yezwi zwinhu. Akale pandakazwiwha, ndikazwibona, ndakawa nechiso pamakumbo engilozi yakanditondeja yezwi kuti ndinamate, 9 koga yakati kwandili, "Autokwelela kuta yezwi! Imi ndinshingikwaina uwo akale nabanakwaina babo bapolofeti, naabo banolondota mawhi omuwhalo yeyi. Namata Mwali." 10 Akale wakati kwandili, "Usikonye mawhi obupolofeti bwewhalo yeyi, nokuti unshaji waba pelyo. 11 Lekeja unota bubi endilembeli eta bubi, unosheshemesa endilembeli eta zwinosheshemesa, akale ulolulama endilembeli eta bululami, akale unchena endilembeli elinchena."

12 "Ilinga, ndikumuzha nokukambijisa, ndibuza indipo yangu, koolipa umwenoumwe nezwaakata. 13 Ndimi Alifa akale Omega, wotanga akale opejeleja, matangisilo akale namapejelejo."

14 Balokombolelwa yabo banopopa ingubo jabo, kuti bebe nendulamilo kunti wobupenyu akale kuti bengwine muguta nopamashubo. 15 Kuzhe kunembwa, banozana ifumbo, nabapomboli, nababulayi nabanonamata zwibezhwa, akale neniepi.

16 "Imi Jesu ndatuma ingilozi yangu kunamwi nobusumikiji yobu kumakubungano. Imi ndimi chizekululu akale inzwalo yaDavidi, inyenyeji inopenya yezhingwanangwana."

17 UMpepo noNdobolwa banoti, "iZha."

Akale iye yoyo umuwha ngeti, "iZha." Akale iye yoyo unenyota ngezhe, iye yoyo unozwimbuja ngetole ivula yobupenyu pesina undipo.

18 Imi Joni ndimuchenjeja wose unowha mawhi obupolofeti bwewhalo yeyi, kana pelina uchapamija kunaiwo, Mwali unoopamijila kwaali impalajo jilo pandululwa muwhalo yeyi, 19 akale kana umwe angobhisa zwimwe mumawhi ewhalo yobupolofeti bwalyo, Mwali unoontolela inkobelo iye munti obupenyu nomuguta ijena, zwilobandwa muwhalo yeyi.

20 Iye unosumikija kunezwi zwinhu unoti, "Chokomende ndikumuzha nokukambijisa."

Ameni. Izha Tezi Jesu!

21 Chipiwo chaTezi Jesu chibe nabanhu bose.