1 Pakalepo imwe yengilozi ishanu jinembili jakabeli nembiya ishanu nembili yakezha kwandili ikati, "Izha, ndookutondeja kulangwa kwevemu igulwana ligele pezhulu pevula inji, 2 mashe openyika bakapombola nalyo, nabagali bopenyika bakakolwa newaini yobupomboli bwalyo."

3 Ndili mumpempo ingilozi yakandinyamula ikenda nami mugwegulu, ndakabona unhukaji eligele pechibanda chishaba chakabelizhele mazina okutukaMwali, akale chili nemisholo mishanu inamibili namabizho aligumi. 4 Unhukaji wakabakambala zwensulubele akale zwishaba, ekapenyeswa nendalama nobushongo namabwe mabhodo, akabhata muluboko lulwe ikomechi yendalama izhele zwinosheshemisa neshambwa yobupomboli bubwe, 5 pehuma iye pabakakwalwa izina linoleba zwilosisika zwinoti, "Bhabhiloni igulwana, mai bamavemu ose akale nezwi sheshemeso zwopenyika." 6 Akale ndakabona iye unhukaji yoyu, akakolwa nelopa lyabachena akale nelopa lyakasumikijila Jesu.

Pandakoombona ndakachenama zwikulwana kasakasa. 7 Koga ingilozi yakati kwandili, "Ini zwaukumuchenama? Ndokubuja isiswa lyonhukaji nelechibanda chinamisholo mishanu ina mibili akale namabizho ali gumi chalotana. 8 Chibanda chiwabona chakabelipo, akale achichipo, akale chinofumpuka chiva mudizwa lisinojiba akale chinda kukujiila kwemisi isinopela, akale bagali penyika bana mazina asilokwalwa muwhalo yobupenyu kuvila kumatangisilo enyika, banoochenama kubona chibanda, nokuti chakabelipo koga achichipo asi chichinoozha kabili.

9 "Yezwi zwinoda indangalilo ina buchenjevu nokuwhisisa. Misholo mishanu ina mibili matunhu mashanu ana mabili paanogala unhukaji yoyu. 10 Ndiwo bo mashe mashanu ana mabili, mashanu akawa, umwempela upo, umwe aajanhu ezha, paachezha unokwelela kubayipo konshaji unshomanana. 11 Chibanda chakabelipo akale chisichipo, icho ndiche chishanu nenhatu koga eli umwe wamashe mashanu ana mabili, akale unonda kukupalajwa kukwe.

12 "Akale mabizho makumi yaya awakabona mashe ali gumi asanu aponchwa bushe, koga banootambula isimba lobutongi samashe kwe awa imwempela, pamwempela nechibanda. 13 Yaba banendangalilo imwempela banopa isimba lyabo nobutongi bwabo kuchibanda. 14 Ibo banoomusa ihondo neMhwizana, akale iMhwizana inoobazunda, nokuti iye ndiTezi wamatezi akale ndiShe wamashe, akale yabo bayiko kwaali baloshobwa, nokushalwa akale balobimbika."

15 Ingilozi yakati kwandili, "Ivula yawabona, yopo pagele ivemu ilomililila banhu, luvute, inyika akale nendimi. 16 Akale mabizho makumi awakabona, iwo nechibanda banoobenga ivemu, banoonta kuti ebe ega ebechinkuna, belye inyama iye akale boompise nomoto, 17 nokuti Mwali wakazwibiga mumyoyo yabo kuti bete chinangwa chiche beli nendangalilo imwempela akale bepa masimba abo obushe kuchibanda, kuswikila mawhi aMwali azhajikijwa.

18 "Akale unhukaji yoyu wawakabona ndilyo iguta igulwana linotonga mashe openyika."