1 Pakalepo ndakawha iwhi lyopezhulu liva mutempeli libuja ingilozi ishanu jine mbili, liti "Indani munyika munodila imbiya ishanu jinembili jolunyetelo lwaMwali!"

2 Ingilozi yokutanga yakenda ikakutulila penyika imbiya yayo, kukaba nezwilonda zwibi zwinolwaja zwakagala pabanhu bakabeli nemhande yechibanda benamata chibumbwa chacho.

3 Ingilozi yabili yakakutulila imbiya yayo mugungwa, likashanduka likaba selopa lyonhu wakafa, akale chose chinhu chipenyu mugungwa chakafa.

4 Ingilozi yatatu yakakutulila munjizi nomumashawi evula imbiya yayo, akale zwikaba ilopa. 5 Pakalepo ndakawha ingilozi yakabelondota ivula iti, "Imwi mulolulama, Imwi muNchena, Imwi mupo akale mwakabelipo, mulolulama mumitongo yeyo! 6 Nokuti banhu bakakutula ilopa lyabachena nelabapolofeti, akale iwi wabapa ilopa kuti benwe senkwelelo yabo!" 7 Akale ndakawha idebulilo lishandula liti, "Eya, She Mwali Wamasimba, mitongo iyo ngiye chokomende akale ilolulama!"

8 Ingilozi yechina yakakutulila imbiya yayo pezhuba, akale izhuba lyakavumilwa kupisa banhu nomoto. 9 Banhu bakanyezwa nokupisa kunotyisa, akale bakafhizha izina lyaMwali, iye wakabeli namasimba pezhulu pempalajo yeji, akale ajakashanduka nokuunkuja.

10 Ingilozi yeshanhu yakakutulila imbiya yayo pechigalo chobushe bwechibanda, bushe bwacho bwakaba munhilima. Banhu bakazwiluma tulimi twabo nokulwajilwa, 11 akale bakafhizha Mwali wokudenga nokulwajilwa akale nezwilonda zwabo, koga abajaka shanduka muzwito zwabo zwibi.

12 Ingilozi yeshanu inemwempela yakakutulila imbiya yayo mulwizi lukulwana iYufuletisi, akale ivula yalo ikakomelela, kulikubambanyila inzila yamashe anova kubuvezhuba. 13 Pakalepo ndakabona mipepo mitatu mibi yakabelingika sezwizhulwa, yakava mundomo webhukanana, nomundomo wechibanda nomundomo wompolofeti woniepa. 14 Yeyi ndiyo mipepo yamadimoni, imuta zwitondejelo, imunda kuzhe kumashe enyika jopasi lyose, kubabunganisila ihondo nezhuba igulwana lyaMwali Wamasimba.

15 "Ilingani, Ndimuzha sembava! Ulokombolelwa iye ulobhwazula akale akambala ingubo jije kuti esikwende chinkuna akale nokuswabiswa kokuboneka eli alo!"

16 Akale mipepo yakababunganya mashe pabugalo bunowhi muchi Hebhelu Amagedoni. 17 Ingilozi yechishanu nembili yakakutulila imbiya yayo mumpepo, akale iwhi lipopezhulu lyakava mutempeli, liva pechigalo chobushe, liti "Zwapela!" 18 Pakalepo kwakaboneka kumweka kolupenyo, kunguluma, kudilima kwevula, akale nokudengeda kwenyika kukulwana zwisakabanu zwaboneka kuvila banhu baba penyika, yoko kuteketa kwenyika kwakabeli kukulwana kasakasa. 19 Iguta igulwana lyakakwamulwa likabazwibabi zwitatu, namakuta enyika akawa, naMwali akakumbulukwa iBhabhiloni igulwana, wakalipa unkombe wokunyema kukwe kukulwana. 20 Akale zwose zwibongo zwakatizha, namatunhu aajaka bechinowanikwa, 21 akale chivulamabwe chikulwana chobulemu bungaba makumi mashanu amakilogilamu chimwe nechimwe, chivula mabwe chiva kudenga chakambwelela pezhulu pabanhu, kuswikila banhu bafizha Mwali pezhulu pempalajo yechivulamabwe, yakabeli impalajo inotyisa.