1 Imwizana payakazhula imhande yashanu inembili, kwakaba nokunyalala kudenga kungaba chikamu che awa. 2 Pakalepo ndikabona ingilozi ishanu jinembili jinoma mbeli kwaMwali, nenkwembo ishanu jinembili jakapiwa kwajili.

3 Akale imwe ingilozi yakezha ikama pe debulilo lina chifhungaiso chendalama, nenfhungaijo inji kuti ishanganiswe neminamato yabachena bose pedebulilo lyendalama mbeli kwechibhula chobushe, 4 akale busi bwefhungaijo bwakanyamuka buli neminamato yabachena zwiva muluboko lwengilozi mbeli kwaMwali. 5 Pakalepo ingilozi yakatola chifungaijio ikachizhaja nomoto unova pedebulilo ikaposela penyika, akale kukaba nokudilima, kunguluma, kumweeka kolupalanganda, akale nokudengeda kwenyika.

6 Ngweno ingilozi ishanu jinembili jakabelina mikwembo mishanu inemibili jakalonganyila kulija.

7 Ingilozi yotanga yakalija lukwembo lwayo, kukatobela chivulamabwe nomoto, zwiloshangana nelopa, zwakambwejelwa penyika, akale chibabi chatatu chenyika chakapiswa, akale chibabi chatatu chemiti chakapya, akale nobuhwa bunyolo bose bwakapya.

8 Ingilozi yabili yakalija lukwembo lwayo, akale chinangedunhu igulwana, chitutuma moto, chakaposelwa mugungwa, akale chibabi chetatu chegungwa chakaba ilopa, 9 chibabi chatatu chezwibumbwa zwipenyu mugungwa zwakafa, nechibabi chatatu chobwato chakapalajwa.

10 Ingilozi yatatu yakalija lukwembo lwayo, inyenyeji ihulwana kasakasa yakawa iva kudenga, itutuma sechimuniko, akale ikawila pechibabi chatatu chenjizi namashawi evula. 11 Izina lyenyenyeji linowhi "nshashanyama". Chibabi chatatu chevula chakababa, akale banhu banji bakabulayiwa nevula yeyi, nokuti yakabababa.

12 Ingilozi yechina yakalija lukwembo lwayo, chibabi chatatu chezhuba chakabola, nechibabi chatatu chomweji, nechibabi chatatu chenyenyeji, kutila kuti chibabi chatatu chokumunika kwazo chakabe nhilima, chibabi chetatu chamasikati chakajimwa, nechibabi chatatu chobusiku.

13 Kova ndilinga, akale ndikawha ipungu lilila newhi lipo pezhulu kasa, lipululuka mudenga pezhulu kasa, liti"Masheto, masheto, masheto kunaabo banogala penyika, nokuti ingilozi inhatu kana jabulolija"