1 Mushule mwezwi mbeli kwangu ndakawana ndikalingana, nedendele lilozhulika kudenga.

Akale iwhi lyotanga lindakabawha lilebeleka kwandili solukwembo, lyakati, "Izhila pezhulu yokuno, akale ndikutondeje zwichatikana mushule mwezwi." 2 Pakalepo ndakangwina muMpepo, akale mbeli kwangu kwakabeli nechigalo chobushe kudenga, kuli noumwe wakabeli gele pachili! 3 Yoyo wakabeligele pechigalo wakabelingika sebwe linokosha linowhi jasipa akale nelimwe linowhi kaneliyeni linabukandi, akale sebwe linokosha lye emaradi lina bushaba. Ijinga linolingika sebwe linokosha, lizyunguluka chigalo chobushe. 4 Kuzyunguluka chigalo chobushe kwakabakuli nezwigalo zwobushe makumi mabili anazwina, akale pazwigalo yezwi pakabeli gele bakulwana makumi mabili ana mana, bakambala ingubo inchena, nechilemba chendalama pamisholo yabo. 5 Kuva pechigalo chobushe kwakabeli kumweka kolupalanganda, kunguluma nokudilima kukulwana, akale mbeli kwechigalo chobushe kumututuma zwimuniko zwishanu zwina zwibili zwomoto, yeyi ndiyo mipepo mishanu nemibili yaMwali, 6 akale mbeli kwechigalo chobushe pana zwinolingika segungwa lyamagilazi, linobelengela sebwe lilokosha lyekristali. Pakati nomumbali mwechigalo chobushe, peli nezwipuka zwina zwipenyu, zwizhele mesho mbeli nomushule. 7 Chipuka chipenyu chotanga chinanga seshumba, chabili chipuka chipenyu chinanga senkabe, chetatu chipuka chipenyu china chiso chonhu, akale chechina chipuka chipenyu chinanga chipungu chimupululuka. 8 Chimwe nechimwe chezwipuka zwina zwipenyu, chakabeli namapapilo mashanu analimwempela, akale zwilizhele mesho alozyunguluka kose nomukati, akale masikati nobusiku azwitolekeja kukwimba zwiti,

"Unchena, unchena, unchena, She Mwali wamasimba

wakaba elipo, upo akale uchoobuya.!"

9 Akale zwipuka zwipenyu pazwinopa lukujo nolulemekejo akale nokuboka kuna iye ugele pechigalo chobushe, umpenyu kwemisi isinopela, 10 bakulwana makumi mabili nabana banofhugama mbeli kukwe ugele pechigalo chobushe akale boonamata iye una bupenyu businopela, banobiga inhulu mbeli kwechibhula chobushe, bekwimba,

11 " She Mwali wedu, ulokwelela iwi

kuwana lukujo nolulemekejo nesimba,

nokuti wakabumba zwinhu zwose,

akale nechido chicho zwakabaipo akale zwakabumbwa."