1 Mushule mwezwi ndakawha sewhi lipezhulu lyoluvute lukulwana lwabanhu bokudenga beshomeja, beti, "Haleluya! Luchijo, kungaima nesimba ngozwaMwali wedu, 2 nokuti butongo bubwe ngobwe chokomende nokululama. Wakapa untongo kuvemu igulwana lyakaswibhisa inyika nobupomboli bwalyo, akale wakabwilizila pana ilyo ilopa lyabashingi babe." 3 Bakashomeja kwechibili beti, "Haleluya! Busi bunova kuna iyo bunonda pezhulu kwemisi isinopela." 4 Akale bakulwana makumi mabili nabana, nezwibumbwa zwina zwipenyu, bakawila pasi bakanamata Mwali wakabeligele pechigalo chobushe, beti, "Ameni. Haleluya!"

5 Akale kuva muchibhula chobushe kwakawhika iwhi lishomeja, liti, "Kujani Mwali wedu, imwi mose bashingi babe, imwi munoontya, bakulwana nabatukutuku." 6 Pakalepo ndakawha zwakaba zwili sewhi loluvute igulwana, sontimbo wevula inji akale sokudilima kukulwana kolupalanganda, beshomeja beti, "Haleluya! Nokuti She Mwali wedu wamasimba umutonga. 7 Atishanteni tishantisise akale tipelukujo kuna iye, nokuti kulobola kweMhwizana kwaswika, akale undobolwa uwe wazwilonganyila. 8 Wakavumilwa iye kuti embajikwe ingubo joncheka umbodo, unopenya akale uloshambijika. Uncheka umbodo, zwito zwilolulama zwabachena."

9 Akale ingilozi yaMwali yakati kwandili, "Kwala yezwi uti, Balokombolelwa yabo balokokwa kumiliya yokulobola kweMhwizana." Ingilozi yakati kwandili, "Yaya mawhi echokomende aMwali."

10 Pakalepo ndakafugama pamamukumbo awe kuunamata, koga iye wakati kwandili, "Usizwite yezwi! Imi ndili umwe wabashingi sawi akale ndimwanakwaina uwo ulobhata busumikiji bwaJesu. Namata Mwali."

Nokuti busumikiji bwaJesu ndiwo umpepo wobupolofita.

11 Pakalepo ndakabona idenga likazhulika, akale mbeli kwangu kuli nebhiza ijena! Iye wakabakaligada unowhi Kubimbika Nechokomende, mubululami unotonga akale undwani wehondo. 12 Mesho awe ananga sontutumo womoto, akale munsholo mumwe muna zwilemba zwinji, akale unezina lilokwalwa lisinozibwa nonhu kuzhe kukwe iye. 13 Ulombala chimbalo chakanjovekwa mulopa, akale izina lilye linowhi, "iWhi lyaMwali." 14 Makapo abalwi bokudenga, ekambala ingubo jemicheka mibuya, michena akale iloshambijika, akoontobela eli pamabhiza machena. 15 Mundomo mumwe munobhuda igwalabaza lilopiza lyokubulaya nalyo induji, akale unoobatonga nonzato wensimbi, unootoba chiswinilo chewaini nobukali bokunyetela kwaMwali Wamasimba Ose. 16 Pechimbalo chiche akale nopedumbi lilye palokwalwa izina, She wamashe akale Tezi wamatezi.

17 Pakalepo ndakabona ingilozi ilimile muzhuba, akale newhi lipopezhulu yakashomeja kunyuni jose jinopululuka mudenga lyopakati, "Izhani, bunganilani miliya mikulwana yaMwali, 18 koolya inyama yemibili yamashe, neyabatungamilili babalwi, neyabanhulume banesimba, neyamabhiza akale nabagadi bawo, neyabanhu bose balosungunuka nabalanda, bakulwana nabatukutuku."

19 Akale ndakabona chibanda akale namashe enyika namakapo abo abalwi bakabungana kumusa ihondo noyo ulogada ibhiza nabalwi babe. 20 Kwakabhatwa chibanda akale nompolofeti wamaniepwa wakata zwitondejelo icho chilipo zwili izo zwakachengela yabo bakatambula imhande yechibanda akale bakanamata chibumbwa chacho. Yaba babili bakaposelwa mugandwa lyomoto unopisa nesalifa belibapenyu. 21 Bamwe bose bakabulaiwa negwalabaza linobhuda mundomo moyo ulotana ibhiza. Inyuni jose jakagutisisa nenyama yombili wabo.