1 Mushule mwezwi ndakabona imwe ingilozi izha iva kudenga, ili namasimba makulwana kasakasa, akale inyika yakapenyeswa noku ngaima kwayo. 2 Akale yakashomeja newhi linesimba igulwana, "Yawa, yawa iBhabhiloni ihulwana kasakasa! Yaba bugalo bwamadimoni, bugalo bunotyisa bwemipepo mibi yose, bugalo bunotyisa bwenyuni jineshambwa, bugalo bunotyisa bwemhuka jineshambwa akale jibengwa, 3 nokuti inyika jose jakanwa iwaini yolulakamilo lweshambwa lwayo, akale mashe openyika bakapombola nayo, nabashambaji bose bopenyika bakafumiswa noluchibo lusina kuzwibhata."

4 Pakalepo ndakawha limwe iwhi liva kudenga liti,

"Banhu bangu bhudani muna iye,

Musishanganyile muluchinyo lulwe!

Musishanganyile mukulangwa kukwe,

5 nokuti luchinyo lulwe lulobutitikwa zwilefu zwokuswika kudenga,

akale Mwali wakumbulukwa inzila jije imbi.

6 Muumbate nenzila yakamubhata nayo,

muumbwilizile zwilopamwa kabili sezwito zwizwe.

Muudilile zwilopamwa kabili zwinova munkombe uwe.

7 Unjabiseni kasa akale muumpe kulila kukulwana

solukujo nefuma, iyo yaakazwipa.

Mumwoyo uwe unozwitunha,

eti, ‘Ndigele pechigalo chobushe sashekaji!

Anditoba inchilikaji,

anditoofa ndalila.’

8 Nokudalo impalajo jije jinoonswikila mezhuba limwempela,

malwaji, kulila, nezhala.

Unoopiswa nomoto,

nokuti unamasimba makulwana She Mwali, iye uchootonga."

9 Mashe openyika, bakapombola naye akale bakakobana nayo kutangala kokugalika, banoolila nokufwikula pezhulu payo bachabona busi bokupya kwayo, 10 banoomila kule, betya kuyabiswa kukwe, akale beti, "Mayee! Mayee! Iwi iguta igulwana, iwi iguta linesimba igulwana, Bhabhiloni! Mu awa imwempela untongo uwo waswika!"

11 Akale bashambaji bopenyika bamufwikula nokundilila kwayo, nokuti apana uchinotenga zwibiya zwabo, 12 apachina unotenga indalama, isiliva, mabwe alokosha, bulungu bulokosha, micheka mibuya yensulubele, inhete inotejemuka, neyiloshapalila, akale mishobo yose yezwikunyana zwinonhuwhilila, zwose zwibezhwa zwembizho, akale nozwezwikunyana zwinodula, insimbi yengula, insimbi namabwe emabhulu, 13 nesinamoni, nobuthwilo, ifhungaijo, imule, idubha, iwaini, mafuta e oliva, buswa bwakapandulwa, ikoloni nengombe nemhwizi, mabhiza nengolo jehondo, nabalanda, akale nobupenyu bwabanhu. 14 Banooti, "Michelo yabelakamilwa nompepo uwo yabhuda mwauli. Bose bubhodo nokuyebeka kuko kwakanyangalika, azwichinoowanika akale!" 15 Bashambaji bezwibiya yezwi, bakawana bufumi kwalili, banoomila kule, betya kuyabiswa kwayo, befwikula akale belila, 16 akale beshomeja beti, "Masheto! Masheto! Kunawi guta igulwana yakabakambajikwa micheka mibhodo, yensulubele neshaba, ilopenyeswa nendalama, mabwe alokosha akale nobulungu bulokosha! 17 Muawa imwempela bufumi bose yobu bwakapalajwa!"

Akale bose batungamili bobwato, bakwendi bomubwato akale nabanhu banoshingila mubwato, naibo bose banoshambaja mubwato, bakamila kule. 18 Bakakwiila pabakabona busi bokupya kwayo, "Ndilipi iguta lyabeli seguta igulwana?" 19 Akale bakazwidila ihuluba mumisholo yabo, belila befwikula, beshomeja beti, "Masheto! Masheto kunawi, iguta igulwana! Nokuti pezhulu pefuma yalyo bose bakabeli nobwato mugungwa bakafuma. Mu awa imwempela lyakapalajwa."

20 Shanta pezhulu palyo, iwi denga! Shantani imwi bachena! Shantani bapositoli nabapolofeti! Nokuti Mwali woopa untongo waakabepa kwamuli.

21 Pakalepo ingilozi inamasimba makulwana yakatola ibwe linanga iziyo igulwana ikaliposela mugungwa, iti, "Ndiyo inzila ichaposwa nayo pasi nesimba iBhabhiloni iguta igulwana, alitoowanikwa akale. 22 Kulila kotudende, mitetele, mikwembo, nokukwimba kwabanhu azwitoowhikana akale mwauli. Apana imhizha yemishingo ipi zwayo ichawanikwa mwauli akale. Nokutimba kweziyo akuchinoowhikana mwauli akale, 23 nontutumo wechimuniko auchinoomunika mwauli akale. Namawhi ondoboli nondobolwa aatowhikana mwauli akale. Bashambaji babo bakabeli banhulume bakulwana penyika. Nefumbo lilyo inyika jose jakalashika."

24 Munailyo mwakawanikwa ilopa lyabapolofeti nelyabachena baMwali, nelyaibo bose bakabulayiwa penyika.