1 Akale ndakabona chibanda chifumpuka chibhuda mugungwa, chinamabizho aligumi nemisholo mishanu ina mibili, nenhulu igumi pamabizho acho nezina linotuka Mwali pamisholo yacho. 2 Chibanda chindakabona chakabeli sengwe, makumbo acho eli sebhele, undomo wacho wakabeli soweshumba. Ibhukanana lyakapa chibanda masimba alyo nechibhula chobushe nobutongi bukulwana. 3 Umwe wemisholo yacho wakabeboneka soti una chilonda chikulwana kasa, koga chilonda chacho chikulwana kasa chakabachila, akale inyika yose yakachenamiswa nechipuka ikachitobela. 4 Banhu bakanamata ibhukanana, nokuti lyakabaapa chipuka butongo bwalyo, akale banhu bakanamata chibanda, beti, "Ndiyani unanga sechibanda, akale ndiyani angalwana nacho!"

5 Akale chipuka chakapiwa undomo wakalebeleka mawhi okuzwikuja nokutuka Mwali, akale chakavumilwa kushingisa butongi kwemyeji makumi mana ana mabili. 6 Chakazhula undomo wacho kutuka Mwali, kutuka izina lilye nobugalo bubwe, yezwi zwili, yabo banogala kudenga.

7 Akale chakavumilwa kulwana ihondo nabachena baMwali akale nokubazunda. Akale butongi chakabupiwa pezhulu pemishobo yose, yabanhu, yendimi akale nenyika. 8 Bose banogala penyika banoochinamata chibanda, wose unezina lisanu lyakwalwa muwhalo yeMhwizana yobupenyu, iMhwizana yakabulayiwa kuvila kumatangisilo okubumbwa kwenyika.

9 Yoyo unenzebe, ngewhe. 10 Kana pelina bachatapwa, kubutapwa unonda, kana pelina umwe uchabulayiwa negwalabaza, negwalabaza banobulayiwa. Yoku kushobelela kokusimatija kuna kugontama nokudimbwa kubachena baMwali.

11 Pakalepo ndakabona chimwe chibanda, chakabhuda chiva munyika. Chakabeli namabizho mabili semhwizana, koga chakabelebeleka sebhukanana. 12 Icho chakashingisa isimba lyose lyechibanda chotanga icho chilipo, akale chikata kuti inyika nabagali bayo benamate chibanda chotanga, chechilonda chikulwana chakabachila. 13 Chibanda chabili chakata zwitondejelo zwikulwana, nokubhisa moto kuva kudenga uzha pasi banhu bose bakalinga. 14 Chakachenga bagali bopenyika, nezwitondejelo zwachakavumilwa kuti chite chakamililila chibanda chokutanga. Chakabalayija kuti bete chibumbwa chokukuja chibanda chakabalwajiswa negwalabaza koga chikachila. 15 Chibanda chabili chakapiwa isimba, kupa lufemo kuchibumbwa chechibanda chotanga kuti chibumbwa chechibanda chotanga chitubule kulebeleka, akale chita bose basinonamata chibumbwa chechibanda bebulayiwe. 16 Chakabhata nesimba banhu bose, bakulwana nabatukutuku, balofuma nabasheti, balosungunuka nabalanda, kuti betemulwe imhande kumaboko abo olulyi kana pehuma jabo. 17 Kutila kuti pesibe nouchatenga kana kushambaja esina nemhande, ndilo izina lyechibanda kana chilabo chilomilila izina.

18 Yezwi zwinoda buchenjevu. Yoyo unhu unowhisisa ngezibe chilabo chechibanda, nokuti chilabo yechi chilomilila izina lyomwe unhu. Chilabo yechi mazana mashanu ane mwempela namakumi mashanu ana limwempela nechishanu china chimwempela.