1 Ingilozi yashanu yakalija lukwembo lwayo, akale ndikabona inyenyeji yakabambwela iva kudenga izha penyika, akale yakapiwa chikonyiso chedizwa linomila kusinojiba. 2 Yakazhula idizwa linomila kusinojiba, akale mudizwa mwakabhuda busi bunanga bwevuto igulwana kasa, akale izhuba nompepo zwakaswibhiswa nobusi bwakava mudizwa. 3 Pakalepo mubusi mwakabhuda imhashu jizha penyika, akale jakapiwa isimba linanga lyemhami jomunyika. 4 Jakabujwa kuti jisichinye buhwa bwenyika kana chinomela chose chinyolo kana unti wechimo chipi, koga jinangane chete nabanhu basina imhande yaMwali pehuma jabo. 5 Imhashu jakavumilwa kubayangatisa kwemyeji mishanu, koga jisinobabulaya, akale kuyabisa kwajo kwakaba kuli soluyabiso lwemhami, painoluma unhu. 6 Akale mumazhuba yawo banhu banoopota lufu koga abatooluwana, banooda kufa, asi lufu lunoopululuka lubatizha.

7 Mukulingika imhashu jakabeli samabhiza alolongelwa ihondo, pamisholo yajo pakabelina zwakabelingika sejinhulu jendalama, chiso chajo chakabeli sokwabanhu, 8 masusu ajo samasusu abanhukaji, nameno ajo sameno eshumba, 9 jilina mapande anange nsimbi jopefuba, akale unkuwaluzha wamapapilo ajo wakaba uli sowengolo inji namabhiza zwingwina muhondo. 10 Jina myise inoluma seyemhami, akale isimba lyajo lyoyabisa banhu kwemyeji mishanu liko kumyise. 11 Ingilozi ndiye She wajo wegwizhana linomila kusinojiba, izina lyayo muchiHebhelu ndiAbhadoni, muchiGiliki unowhi Apoloni.

12 Injabulo yotanga yapinda, ilingani, injabulo imbili jichinozha.

13 Pakalepo ingilozi yashanu nemwempela yakalija lukwembo lwayo, ndikawha iwhi liva mumbizho ina jedebulilo lyendalama mbeli kwaMwali, 14 liti kungilozi yashanu nemwempela yakabelina lukwembo, "Sungunula ingilozi ina jilo sungililwa palwizi lukulwana iYufuletisi." 15 Nokudalo ingilozi ina jakasungunulwa, jakabakabambilwa iawa, izhuba, mweji negole, kubulaya chikamu chatatu chabanhu. 16 Bunji bwabalwi bamabhiza bwakabepama tubili pegumi lyozwiulu lilopamhwa kaligumi kozwiulu, ndakabuwha bunji bwabo. 17 Akale yeyi ndiyo inzila yandabona mabhiza yaya mumbono wangu, bagadi bakabakambala inhibi jopefuba jinalubala lomoto akale nesafaya nesalifa, akale misholo yamabhiza yakaba ili semisholo yeshumba, akale elimashaba somoto nobusi akale, sewhakwa zwakaba zwibhuda mumilomo yamabhiza. 18 Ishulamatongo yeji inhatu, chikamu chetatu chabanhu penyika chakabulayiwa, nomoto nobusi nesalufa yakabebhuda mumilomo yawo. 19 Nokuti isimba lyamabhiza lyakabeli mumilomo yawo nemimwise yakabeli senyoka, elina misholo, akale nemisholo yayo ilwajisa banhu.

20 Bunji bwabanhu, basakabulayiwa neeji ishulamatongo, abajaka zwifija mumishingo yamaboko abo kana kulekeja kunamata madimoni akale nezwimwali zwendalama nesiliva nengula namabwe nezwikunyana, zwisinobona, kana kuwha,kana kukwenda, 21 abajaka zwifija, mububulayi bwabo, bulowi bwabo, mubusangu bwabo, nomukukwiba kwabo.