1 Bai, mwenga mwaalongo bangu' mwamukemilwe na Nnu’ngu' panga mwabandu bake apeleteu, muwase bu’kana na Yesu, ywatunkema Ntumilwe ywa Nnu’ngu' na kai' Mpi’ndo Nku’lu' ywitu ywa dini. 2 Ywembe aatiu’bi’lika kwa Nnu’ngu' ywaansawi apange lyengo lyake kati mu’lu' Musa mwaau’bi’like munyumba ya Nnu’ngu'. 3 Nsengi wa nyumba apalikwa peyelwa isima kulikoni nyumba yaisengite. Nyinyonyo, nembe Yesu apalikwa isimilwa muno kulikoni Musa. 4 Kila nyumba isengilwe na nsengi, lakini Nnu’ngu' nga nsengi wa kila kili’be. 5 Musa aabile ntumisi mwu’bi’li’ka kwa bandu boti ba munyumba ya Nnu’ngu'. Lyengo lyake lyaai kwabakia bandu bo makowe ga Nnu’ngu' gaalu’a longela masu’ba ga nnu’ngi'. 6 Lakini Kilisitu nga Mwana mwu’bi’li’ka, ywayi’mi’li’ka bandu ba nyumba ya Nnu’ngu'. Na twenga nga twabandu bo, mana twayendelya kangamala mpaka kuundi’la na kwipunia mugalu' gatugau’bi’lya.

7 Kwa nyo, kati mwabaya Loo Mpeleteu,

"Li’no mana muliyu’wine lilobe lya Nnu’ngu',

8 kanemwipange myoyo yinu minonopau,

kati au’ku' binu mwabaapangite nsimu wu’lu' pabannei Nnu’ngu',

kati nsimu wu’lu' wa mapayilwo ku’lu' kulupu’ngu’ti'.

9 Akwo, au’ku' binu baatinipaya na kunipekeseni,

pamope no panga baaibweni iyendo yangu' kwa myaka alubaini!

10 Kwa kitumbu so, naatikwausikya bandu bo nganibaya,

‘Mawaso ga bandu ba gayelengine,

banapatali kugatanga katu mali’la gangu'.’

11 Bai, naatiusika nganilapa,

‘Katu, bandu bo baayingyali pandu pangu' po pu’mu’lya panaabi’kile.’"

12 Bai, mwaalongo bangu', mwili’ndi’le pakati yinu kanekube na mundu mwene mwoyo nnau wangau’bi’lya, wawibi’ka kuutalu na Nnu’ngu' mwene ukoti. 13 Kwa mwanjaa, li’lu' liyi’gi’yo lyalibaya "Li’no" balo lituli’nga twenga. Mupalikwa yangatiana wakati woti li’nga mundu ywoywoti mukipi’nga sinu aakane baa na mwoyo nnonopau kwa kitumbu so kongelwa na sambi. 14 Kwa mwanjaa, twenga twaboti tutama kiselele na Kilisitu mana twayendelya kamwa liu’bi’lyo lyatutumbwi nalyo mpaka kuundi’la.

15 Maandiko Mapeleteu gabaya nnyanya, "Li’no mana muliyu’wine lilobe lya Nnu’ngu', kanemwipange myoyo yinu minonopau, kati au’ku' binu mwabaapangite nsimu wu’lu' pabannei Nnu’ngu'."

16 Kinyai babaayu’wine lilobe lya Nnu’ngu' na kunneka? Abo, nga balu' boti babaalongoyilwe na Musa bu’ka Misili. 17 Kai', kinyai babaamusile myaka alubaini? Nengite balu' babaapangite sambi na mitwii yabe yaatu’mbu’ki kulupu’ngu’ti'? 18 Kai', kinyai babaalapilwe na Nnu’ngu' panga baayingyali mukipu’mu’lyo saabi’kile? Nengite balu' babaakani kunnyu’wa? 19 Bai, twibona panga baawesiteli yingya kwa kitumbu so kotoka u’bi’lya kwabe.