1 Ɓè mǝɓangnǝa lùllǝì ama Iliya, ɓwa Tishbe, a bù-nzali Gilǝyat, yiu sǝ banggi Murǝm Ahap ama, <<Mbak-kàngkàng Yahweh Ɓakuli mala Isǝrayila nakam, mǝnana ǝn camgiyi a ɓadǝmbi ka, twal ado aban ká arǝ apǝlǝa mǝnana à kǝ yiu ka, ncimna pa nǝ̀ kpa ɗang,*17:1 Ɓalli gbal aɓa: Luk 4:25; Jem 5:17. sǝ mbulo pa nǝ̀ nya ɗang, she ɓǝ̀n bangŋǝna ama mbulo ɓǝ̀ nya ka.>>

2 Anzǝm mǝno ka, cau mala Yahweh yiu aban Iliya ama, 3 <<Nying ban mǝnia ka, sǝ wu o nǝ njar-takuli, kya sǝmbǝrǝa a ban myalmúr Kerit, mǝnana nda a njar-takuli mala Nggeasala Jodan ngga. 4 Awu nǝ nggǝ nu mùr a mǝno yì myalmúr ka; ǝn tasǝna agang’lang ɓǝà kǝ po girlina a banì.>>

5 Nda Iliya lo wario sǝ kpata cau mala Yahweh; wario kya do a nkanggari myalmúr Kerit, mǝnana nda a njar-takuli mala Nggeasala Jodan ngga. 6 Agang’lang kǝ yinǝì wi nǝ bǝredi andǝ nyama koya dǝmbari andǝ pwarikpǝra; sǝ kǝ nu mùr a mǝno yì myalmúr ka. 7 Sǝama nǝnzǝ́mò ka, mùr mala mǝno yì myalmúr ka yi im kat, acemǝnana mbulo nya aɓa nzali mǝno ɗàng.

8 Pǝlǝa cau mala Yahweh yiu abani, ama, 9 <<Lo, o a *17:9 Ɓalli gbal aɓa: Oba 1:20; Luk 4:26.Zarefat, là mana nda tù aban nggea-là Sidon ngga, sǝ wu duk kanó. Sǝni, ǝn tsǝ́ngŋǝ̀nà ɓè mā-lú a ban mǝno ka ɓǝ̀ po girlina.>>

10 Nda Iliya lo sǝ wari a Zarefat ka. Lang yina nǝ̀ kùtí a là ka, sǝn ɓè mā-lú aban ram mǝsǝ’nggun; pǝlǝa tunǝi sǝ banggi wi ama, <<Ida, yinǝàm nǝ mùr bǝti aɓa dù, ace mǝnana mǝ nu ka.>> 11 Lang ndaban o nǝ̀ nggá yinǝ mùr ka, Iliya tunǝi sǝ banggi wi ama, <<Ida, yinǝàm nǝ bǝredi bǝti gbal a buo!>>

12 Ɓwame nyesǝi wi ama, <<Ən kán nǝ Yahweh Ɓakuli mô mǝyilǝmui, ǝn panǝ ɓekǝ bǝredi a ɓala mem ɗàng. Kǝ gìr mana mǝ ndanǝi ka, muku na a ɓabù aɓa kwar, andǝ mùrú olif bǝti aɓa muna-dù. Ən pur kani ace tàrki mǝsǝ’nggun mǝ kyan nǝi a ɓala ace bwal bǝsa, ace mǝnana mǝ lam masǝlǝata girlina acem sǝnǝ munem, ɓǝ̀ sǝm li sǝ ɓǝ̀ sǝm wú.>>

13 Sǝ Iliya banggi wi ama, <<Cè ɓangciu pakko ɗàng, kyane pa kǝla mana a bang ngga; sǝama a tadǝmbe ka pàkkam bǝredi bǝti nǝ gir mǝnana a ndanǝi ka, yinǝàm nǝi, anzǝm mǝno ka, sǝ wu pàk ɓè aceo wunǝ munio. 14 Mǝnia ka nda cau mǝnana Yahweh, yì Ɓakuli mala amǝ Isǝrayila na ka: <Muku mana aɓa kwar ka pà nǝ̀ mal ɗang, sǝ mùrú mana aɓa dù ka pà nǝ̀ gatti ɗang, she pwari mana Mim Yahweh, mǝ nǝ tasǝ mbulo ɓǝ̀ nya amur nzali ka.> >>

15 Pǝlǝa mā-lú man o kya pa kǝla mǝnana Iliya banggi wi ka; sǝ koya pwari, arǝ anonggio pas ka, girlina nakam mana mā-lú man, andǝ amǝɓala male, andǝ Iliya, à li sǝ kārǝia ka. 16 Muku mana aɓa kwar ka mal ɗang, sǝ mùrú mana aɓa dù ka gatti ɗang, kǝla cau mala Yahweh mana bangŋi nǝ kún Iliya ka.

17 Anzǝm mǝnia ka, mā-lú man, mana gbal nda mǝtala-ɓala ka, muni nong kwánó; rǝkwane ɓike, sǝ lidǝmba nǝ ɓike kǝ̀rkǝ́r; a masǝlǝate ka lin’ueo mala munê yi kasǝa.

18 Ɓwame banggi Iliya ama, <<Mana kpapiam sǝnǝ we, we ɓwa mala Ɓakuli? A yiu kani ace pusǝta cauɓikea mem, sǝ wu yinǝ lú mala munem le?>>

19 Iliya banggi wi ama, <<Yinǝàm nǝ munio.>> Pǝlǝa ak muna a bù nggè, sǝ eau nǝi a kurǝm-kuli, ban mǝnana sulǝ kam ngga. Wario kya nongsǝ munê amur gyangŋan-nongŋo male. 20 Pǝlǝa loasǝ gì ɓua aɓa hiwi aban Yahweh, ama, <<Yahweh Ɓakuli mem, mā-lú mǝnia ka nda pàm bansulǝo kani a ɓala male ka; palang ɗǝm sǝ a yinǝ múrɓikea amurí, a wal-lú muni?>> 21 Pǝlǝa Iliya sárǝ́ rǝì amúr muna kusǝ tàrú, sǝ ɓua aban Yahweh ama, <<Yahweh Ɓakuli mem, ida, ɗeki yilǝmi muna man ɓǝ̀ nyare aɓa nyami ɗǝm.>>

22 Yahweh ok ɓua mala Iliya; muna tita lin’ueo ɗǝm sǝ lo nǝyilǝmu. 23 Iliya twal munê sǝ sulǝ nǝi a ɓaɓala, sǝ nyesǝi pè nggè; pǝlǝa Iliya bang ama, <<Sǝni, munio nia nǝyilǝmu ka.>>

24 Nda ɓwame banggi Iliya ama, <<Ado ka, ǝn sǝlǝna ama a nda ɓwa mala Ɓakuli, sǝ cau mala Yahweh a kuno ka mǝsǝcaua.>>