1 Pǝlǝa Solomon tunǝ amúr-là mala Isǝrayila andǝ aɓwana-mǝgule amur atau mala amǝ Isǝrayila kat ɓǝà yi dapi a baní a Urǝshalima. Tunǝia ace mǝnana ɓǝà yi twal Akwati Kùrcau mala Yahweh a ban mǝnana à tsǝì kàm a Siyona, yì Nggea-là mala Dauda ka. 2 Pǝlǝa aburana mala Isǝrayila kat ramba aɓadǝm Murǝm Solomon, a Lamsan mala Agumli, mǝnana à kǝ pe a zongŋo Etanim, yì tongno-nong-ɓaria zongŋo ka.

3 Lang aɓwana-mǝgule mala Isǝrayila kat yina ka, apǝris twal Akwati Kùrcau. 4 Apǝris andǝ amǝ’Lawi u Tara Ban-peri, sǝ à pwania andǝ agir mǝfele mǝnana aɓalǝi ka kat, andǝ Akwati Kùrcau, à yinǝia a ɓala mala Yahweh. 5 Murǝm Solomon andǝ amǝ Isǝrayila puppup mǝnana à yi ramba a baní aɓadǝm Akwati Kùrcau ka, à pa ɓoro mala gìr’nkila nǝ anzur andǝ ajamnda pas mǝnana à gandǝ ɓallia raka ace ɓiki lakkì malea.

6 Pǝlǝa apǝris yinǝ Akwati Kùrcau mala Yahweh à kútí nǝi a bancame male aɓata ankpamtari acerup, aɓa kurǝm mǝ’ɓaɓalǝuî, yì Ban Nggea Mǝfele mala ɓala mala Yahweh. 7 Sǝ acerup mǝnana ankpamtaria mǝnna amur ban mǝnana à tsǝk Akwati kàm ngga, à túr yilǝm amur Akwati andǝ agare. 8 Ace ɓiki sakkya mala agare mǝnia ka, ɓwa nǝ̀ gandǝ sǝn kúnià ɓǝ̀ cam aɓa Ban Mǝfele aɓadǝm Ban Nggea Mǝfele ka, sǝama nǝ nza ka, ɓwa pà nǝ̀ gandǝ sǝnia ɗàng. À nda kam a ban mǝno ba yalung. 9 Kǝgir pà kàm aɓa Akwatinî ɗàng, shekǝ akpamgbǝlang tali ɓari mana Musa tsǝia aɓalǝi a Nkono Horep, ban mǝnana Yahweh kùtí aɓa kùrcau nǝ amǝ Isǝrayila, lang à purî ɓá nzali Masar ka.*

10 Lang apǝris purî Ban Mǝfele ka, pǝrɓang yi lumsǝ ɓala mala Yahweh, 11 sǝ à gandǝ came ace pàk túró malea ɗàng atàcau mala pǝrɓang, acemǝnana tǎ mala ɓoarɓwa mala Yahweh lùmsǝ ɓá ɓala male.*

12 Pǝlǝa Solomon bang ama:

Yahweh bangŋǝna ama, yì ka nǝ̀ do aɓa pǝndǝa mǝcikcikni;

13 sǝ mim ngga, ndya ǝn ɓangŋǝna kaɓa ɓala mǝɓoarɓwe aceo,

ban mǝnana nda aceo, wu duk kam tàtǝ́k ka.

14 Pǝlǝa murǝm pǝlǝrǝì, sǝ tsǝki ɓwabundǝa mala Isǝrayila bù; sǝ ɓwabundǝa mala Isǝrayila kat cam-nǝ-came. 15 Sǝ bang ama:

Ɓǝ̀ ɓwangsǝban pa aban Yahweh, Ɓakuli mala Isǝrayila.

Gìr mǝnana pàcau ace nǝ kúni, aban tárrám, Dauda ka,

lùmsǝ̀nì nǝ rǝcandǝa male.

Bang ama,

16 <<Twal a pwari mǝnana ǝn pusǝ aɓwana mem Isǝrayila,

à purî ɓá nzali Masar ka,

ǝn twal-ma ɓekǝ nggea-là aɓalǝ atau kat mala Isǝrayila,

ama mǝ nǝ ɓak ɓala kàm,

ace mǝnana ɓǝ̀ lullǝam pàk kàm ngga ɗàng.

Sǝama, ǝn twalǝna Dauda ɓǝ̀ duk murǝm

amur aɓwana mem, Isǝrayila.>>

17 Sǝ tárrám Dauda ka, ndanǝi a ɓabumi

nǝ̀ ɓak ɓala ace lullǝ Yahweh,

yì Ɓakuli mala Isǝrayila.

18 Sǝama, Yahweh banggi tárrám Dauda ama,

<<A pangŋǝ̀nà mǝɓoarne, yi mana a tsǝngŋǝ̀nà a ɓabumo ama,

awu nǝ ɓak ɓala ace lullǝam ngga.

19 Kat andǝ amani ka, a nda mǝnana a nǝ ɓak ɓalae ka ɗàng.

Muna-ɓwabura mô, mǝnana à nǝ̀ ɓǝlô wi ka,

nda ɓwa mǝnana nǝ̀ ɓak ɓala ace lullǝam ngga.>>

20 Adyan ngga Yahweh lumsǝna pacau male mǝnana bangce ka.

Sǝ mim ngga, ǝn longŋǝna a bancame mala tárrám, Dauda,

sǝ mǝ ndya ǝn do amur buno-murǝm mala Isǝrayila,

kǝla mǝnana Yahweh pacau ka.

Sǝ ǝn ɓangŋǝna ɓala ace lullǝ Yahweh,

yì Ɓakuli mala Isǝrayila.

21 Sǝ ǝn gilǝkina bân ace yì Akwati,

mǝnana kùrcau mala Yahweh na kam aɓalǝi ka,

yì kùrcau mǝnana pè nǝ aká-sǝm,

a bàkú mǝnana pusǝia à purî ɓá nzali Masar ka.

22 Pǝlǝa Solomon came aɓadǝm gyangŋan mala Yahweh, a ɓadǝm ramba mala Isǝrayila kat, sǝ sárǝ́ abui aban ká kuli, 23 sǝ bang ama:

We Yahweh, Ɓakuli mala Isǝrayila,

kǝ Ɓakuli pa kàm, kǝla we, a kuli ko a nzali, a ɓanza ɗàng.

A kǝ bwal kùrcau mò,

sǝ a kǝ lǝmdǝ earcearǝu mana kǝ mal raka,

aban aguro mò mǝnana à kǝ gya aɓadǝmbo nǝ ɓabumia kat ka.

24 A bwalǝna pacau mò mǝnana a pe aban guro mò, Dauda,

yì tárrám ngga.

A ne nǝ kúno, sǝ ndya a lumsǝni nǝ rǝcandǝa mò yalung ngga.

25 Sǝ adyan ngga, We Yahweh, Ɓakuli mala Isǝrayila,

kpata pacau mǝnana a pe aban guro mò, Dauda, yì tárrám,

mǝnana a banggi wi ama,

<<A pà wu nǝ ɗwanyi ɓwa a nggurkwar mò mǝnana nǝ̀ do aɓadǝmbam,

amur buno-murǝm mala Isǝrayila ka ɗàng,

ɓǝ̀ mbak-kàngkàng amǝkeo tsǝkiria pepè arǝ njar malea,

à nǝ̀ gya aɓadǝmbam kǝla mǝnana a gya aɓadǝmbam ngga.>>

26 Sǝ adyan ngga, We Ɓakuli mala Isǝrayila,

ɗeki ɓǝ̀ pacau mò mana a pe aban guro mò Dauda, yì tárrám ngga,

ɓǝ̀ purmǝsǝi.

27 Sǝ yì Ɓakuli, mǝsǝcau ka, nǝ̀ do a ɓanza le?

Nggearǝ kuli, yì kuli kano ɓong-ɓong ngga,

pà nǝ̀ gandǝ karǝ eo aɓalǝi ɗàng;

sǝ koshi mǝnia yì ɓala ǝn ɓê ka!

28 Kat andǝ amani ka, We Yahweh, Ɓakuli mem,

awu nǝ kwakikiro arǝ hiwi andǝ zǝmba mem, mim guro mò,

wu ok ɓua mem andǝ hiwi,

mana mim guro mò ǝn nggǝ yinǝi aɓadǝmbo yalung ngga.

29 Tsǝk mǝsǝo arǝ ɓala man, du andǝ pwari,

yì ban mǝnana a bangŋǝna ama,

<<Lullǝam ngga, nǝ̀ pa a banì,>>

sǝ ace mǝnana wu kwakikiro arǝ hiwi mala guro mò,

mana ǝn nggǝ pa a bano nǝ pǝlǝ ɓamǝsǝam nǝ’njar ban mǝnia ka.

30 Kwakikiro arǝ zǝmba mala guro mò,

andǝ mala aɓwana mô, amǝ Isǝrayila,

a koya pwari à pakhiwi a bano

nǝ pǝlǝ ɓamǝsǝia nǝ’njar ban mǝnia ka.

A ban-do mô a kuli ka, awu nǝ ok sǝm;

sǝ lang a ongŋǝna ka, twala-sǝm-banì.

31 Ɓǝ̀ ɓwa ka, à tsǝkî-cau-arǝì mala pàkkî ɓì mǝ’murkala mǝɓane,

sǝ à tsǝì ɓǝ̀ kángìr,*

sǝ yiu aɓadǝm gyangŋan mò a ɓala man,

sǝ kán ama, <<Ən pe ɗàng>> ngga;

32 awu nǝ oè a kuli, a nǝ kasǝ-ɓashi.

Sǝ awu nǝ ɓashì aguro mò,

nǝ kasǝ’ɓashi-lú amur ɓwa mǝnana a kumi nǝ-cau’arǝì ka,

sǝ awu nǝ nyesǝi wi bafe mala ɓeali amurí,

sǝ mǝɓealɓoarna ka, awu nǝ pe wi tangnakusǝi

mǝnana kārǝ́ arǝ ɓealɓoarna male ka.

33 Sǝ lang aɓwana mò Isǝrayila ka,

aɓiu-mǝbura malea gandǝnia a munǝo,

acemǝnana à pàngŋǝ́nò cauɓikea ka,

sǝ ɓǝ̀ à pǝlǝ ɗǝm a bano, à earnǝ lullǝo,

à pakhiwi sǝ à zǝmba a bano ace bwalia-wia,

a ɓala mǝnia ka,

34 awu nǝ ok hiwi malea a kuli,

sǝ awu nǝ twalban cauɓikea mala aɓwana mô, Isǝrayila,

sǝ awu nǝ nyesǝia ɗǝm,

a nzali mǝnana a pea akeâ ka.

35 Sǝ lang kuli ka, à gìrì sǝ mbulo pa kàm raka,

acemǝnana à pàngŋǝ́nò cauɓikea,

sǝ ɓǝ̀ à pakhiwi a bano nǝ pǝlǝ ɓamǝsǝia nǝ’njar ban mǝnia,

sǝ à earnǝ lullǝo,

sǝ à pǝlǝ nzǝmia arǝ cauɓikea malea,

acemǝnana a yinǝ gir-kwanrǝu amúrià ka,

36 awu nǝ oea a kuli,

sǝ awu nǝ twalban cauɓikea mala aguro mò,

aɓwana mô Isǝrayila,

ace mǝnana awu nǝ kània wia njar mǝɓoarne mala gingnǝ ɓealia;

sǝ wu tasǝ mbulo amur nzali mô,

yì nzali mǝnana a panì aɓwana mô dumǝna nzali liɓala malea ka.

37 Sǝ ɓǝ̀ nzal-gula yi kpa aɓa nzali,

sǝ ɓǝ̀ kwánó-ɓikea sulǝo amur aɓwana,

sǝ ɓǝ̀ agirɓaban malea kiɗiki atàcau mala nyàɗàng,

ko kwàpì, ko kpa mala doshi, ko sa mala nggwaso,

sǝ ɓǝ̀ ɓibura malea kutio aɓa nzali malea

sǝ gumbǝli anggea-là malea nǝ munǝo;

ɓǝya kwánó-twàl-là na,

ko ɓǝya rǝkwana na sǝ kumia ka;

38 ɓǝya hiwi à pè, ɓǝya zǝmba na à yinǝi,

ko mala ɓwa mwashat na,

ko mala aɓwana mô Isǝrayila na kat ka,

koyan ngga súrǝ́nà rǝ tanni mana kumi ka,

sǝ lang à nǝ̀ mǝn abuia aɓa hiwi nǝ’njar ban mǝnia yì ɓala ka,

39 we ka, oeǎ a kuli, yì ban-do mô,

twalbani sǝ wu pak nê mò.

A súrǝ̀ ɓabum koya ɓwa ka;

we nǝmurǝo a nda mǝnana a súrǝ̀ ɓabum amuna ɓwapǝndǝa kat ka.

Acemani ka, pè koyan ngga gìr mǝnana karǝ arǝ anjar male ka,

40 ace mǝnana ɓǝà ɓanggo aɓalǝ anonggio kat mala do malea

aɓa nzali mǝnana a pê akeâ ka.

41 Anggo gbal, koya ɓwa mǝnana bǝriɓwa na,

mǝnana ɓwa Isǝrayila na raka,

mana pur a ɓe nzali, a ban mǝsauwe,

sǝ yiu atàcau mala lullǝo ka,

42 (acemǝnana à nǝ̀ okce lullǝo mǝgule,

andǝ kaɓa rǝcandǝa mò andǝ mazo mala nggwarbuo),

sǝ ɓǝ̀ yiu sǝ pakhiwi a bano

nǝ pǝlǝ ɓamǝsǝi nǝ’njar ban ɓala mǝnia ka,

43 ok hiwi male a kuli, bando mô.

Pàk gìr mǝnana kat yì bǝriɓwa zǝmba a bano ka,

ace mǝnana aɓwapǝndǝa mala ɓanza kat ɓǝà súrǝ̀ lullǝo,

sǝ ɓǝà ɓanggo, kǝla mǝnana aɓwana mô Isǝrayila kǝ pak ka,

sǝ ɓǝà sǝlǝ gbal ama, ɓala mǝnia ǝn ɓê ka,

à kǝ tunǝi nǝ lullǝo.

44 Ɓǝ̀ aɓwana mô puro ace ká munǝo arǝ ɓimǝbura malea,

a koya ban mǝnana kat awu nǝ tasǝia kàm,

sǝ à pakhiwi a bano Yahweh,

nǝ’njar ban nggea-là mǝnana a twalni,

andǝ ɓala mǝnana ǝn ɓê, ace lullǝo ka,

45 ok hiwi malea a kuli andǝ zǝmba malea,

sǝ wu kasǝ-ɓashi, wu pea wia gìr mǝnana malea na ka.

46 Sǝama, ɓǝ̀ à pakkô cauɓikea ka -

*acemǝnana kǝɓwa pà kàm mana kǝ pak cauɓikea raka ɗàng -

sǝ a pak-bumlulla nǝia, a tasǝia a ɓabu ɓiumǝbura,

sǝ à pwania à umnǝia aɓa gbámiban* a nzali mala ɓiumǝbura,

a ban mana nda kuko ko mana nda tù ka,

47 sǝ ɓǝ̀ à nggaɗi ɓabumia aɓa nzali mana à pwanǝnia

à umǝna nǝia kàm kǝla aguro,

sǝ à pwanzali, à zǝmbô,

aɓa nzali mala aɓwana mǝnana à bwalia kǝla aguro ka, ama,

<<Sǝm pàngŋǝ̀nà cauɓikea, sǝ sǝm pàngŋǝ̀nà gìr mǝɓike andǝ caukpaka.>>

48 Sǝ ɓǝ̀ à nyar a bano nǝ ɓabumia kat

andǝ ɗenyicau malea kat,

aɓa nzali mala aɓiamǝbura mana à pwania, à umnǝia kǝla aguro,

sǝ à pakhiwi a bano nǝ pǝlǝ ɓamǝsǝia nǝ’njar ban nzali mǝnana a pe akeâ,

yì nggea-là mana a twalni, andǝ ɓala mǝnia,

mana ǝn ɓê ace lullǝo ka,

49 ok hiwi andǝ zǝmba malea a kuli, ban-do mô,

sǝ wu kasǝ-ɓashi, wu pea wia gìr mǝnana malea na ka.

50 Twaliâbanì, yia aɓwana mô mǝnana à pàkkô cauɓikea ka.

Twaliâban akpakpak mǝnana à pàkkô ka.

Tsǝk aɓwana mǝnana à pwania sǝ à bwalia bwalban-guro ka,

ɓǝà sǝn mǝsǝswatǝr malea.

51 Yià ka aɓwana mô na andǝ agirkuma mò;*

a pusǝia à purî ɓá nzali Masar,

à purî ɓá ndà-bǝsa mala panzǝ bolo-candǝa.*

52 Ɓǝ̀ amǝsǝo mǝnna aban zǝmba mala guro mò,

andǝ azǝmba mala aɓwana mô, Isǝrayila.

Kwakikiro arǝia a pwari mǝnana kat à yinǝ ɓua malea a bano ka.

53 A nda mǝnana a taria-ɗàng aɓalǝ aɓwapǝndǝa kat

mala ɓanza ace mǝnana ɓǝà duk girkuma mò,

kǝla mǝnana a bang nǝ kún Musa, yì guro mò,

a bàkú mana a pusǝ aká-sǝm,

à purî ɓá nzali Masar ka, we Yahweh, Ɓakuli.

54 Lang Solomon malǝna amǝnia yì ahiwi andǝ azǝmba kat aban Yahweh ka, pǝlǝa loapi ɓadǝm gyangŋan mala Yahweh, ban mǝnana kūndǝ kam loasǝ abui a kuli ka. 55 Cam-nǝ-came sǝ tsǝkî ɓwabundǝa mala Isǝrayila bù puppup, nǝ loasǝ gì kpǝm, ama 56 <<Ɓwangsǝban ɓǝ pa aban Yahweh, mǝnana pànî aɓwana male, Isǝrayila usǝlǝo, kǝla mǝnana pacau ace kat ka. Ko kǝ mwashat kpa a nzali aɓalǝ acau male ɗàng; yì apacau mǝɓoarne male, mǝnana kat bangŋi nǝ kún Musa, guro male ka. 57 Ɓǝ̀ Yahweh, Ɓakuli ma’sǝm, pà atà sǝm, kǝla mǝnana pà atà aká-sǝm ngga. Ɓǝ̀ kǝa nying sǝm, ko nǝ̀ bwakibuì arǝ sǝm ɗàng, 58 ace mǝnana ɓǝ̀ pà sǝm ɓabum mala earce pàk kàne male aɓa koman kat, sǝ ɓǝ̀ sǝm bwal anzongcau, andǝ anê, andǝ anggurcau male, mǝnana tsǝkî aká-sǝm ngga.

59 <<Adyan ngga, ɓǝ̀ do ama, acau mem mǝnia, mǝnana ǝn yinǝia aɓa hiwi aɓadǝm Yahweh Ɓakuli ma’sǝm ngga, ɓǝà ueo a ɓadǝmbi, du andǝ pwari. Ɓǝ̀ camata guro male andǝ aɓwana male Isǝrayila ɓǝà kum gìr mana malea na sǝ à pàktǝle, kǝla mǝnana koya pwari yinǝi ka. 60 Anggo sǝ aɓwapǝndǝa kat mala ɓanza nǝ̀ sǝlǝ ama, Yahweh ka, nda Ɓakuli; kǝɓè pà kàm ɗàng. 61 Acemani ka, wu nying ɓabum wun kat-kat aban Yahweh, Ɓakuli ma’sǝm. Wu kpata anê male sǝ wu bwal anzongcau male, kǝla mana wu kǝ pak yalung ngga.>>

62 Pǝlǝa murǝm andǝ Isǝrayila kat atè, pà gìr’nkila aɓadǝm Yahweh. 63 Solomon pà ɓoro mala dotarǝu aban Yahweh: pà andá-rya á-lumi-ɓari-nong-ɓari (22,000) andǝ anzur á-gbǝman-mwashat nǝ á-lumi-ɓari (120,000). Nda murǝm andǝ amǝ Isǝrayila kat, tàr ɓala mala Yahweh aban Yahweh. 64 Sǝ a kǝ pwari mǝno ka, Solomon ɗārǝ́ tsùrú mala patal mǝnana nda aɓadǝm ɓala mala Yahweh ka, acemǝnana nda a ban mǝno sǝ pà agir’nkila mala pisǝe kǝring, andǝ apagir mala mǝsǝsa, andǝ mùrú-nyama mala apagir mala dotarǝu. Pè anggo acemǝnana gyangŋan mala bolo-bángŋá mana nda aɓadǝm Yahweh ka, ɓiki kyauwe ace ak agir’nkila mala pisǝe kǝring, andǝ apagir mala mǝsǝsa, andǝ mùrú-nyama mala apagir mala dotarǝu mǝno kat ka.

65 Nda Solomon andǝ Isǝrayila kat atè, à pàkkiɗire mala Lamsan mala Agumli, aɓadǝm Yahweh Ɓakuli ma’sǝm, a bàkú mǝno ka. Ɓwabundǝa kǝ̀rkǝ́r purkio arǝ abân kat aɓa nzalinì, twal a Lebo-Hamat kya puro a Myalmúr mala Masar, sǝ à yi ramba. Mǝnia yì pàkkiɗire ka, twal anonggio tongno-nong-ɓari, sǝ aɓea anonggio tongno-nong-ɓari ɗǝm; kpapi-kat ka twal anonggio lum-nong-ine à ndaban pe.*

66 A tongno-nong-tàruià nongŋo ka, Solomon mesǝ aɓwana ɓǝà o, sǝ à tsǝki murǝm bù, sǝ à o arǝ ala malea nǝ banɓoarnado andǝ bumpwasǝa, ace pěmǝɓoarne mǝnana Yahweh lǝmdǝi aban guro male Dauda, sǝ aban Isǝrayila yia aɓwana male ka.