Nnwẹr s'Akpaar-aponga 13

Ẹmmaana ch’Samson

1 Wa anạng p’Israẹl abạra asi ibyibyiadik k’ititikha s’Ọvaar Ubinọkpaabyi. Ọvaar Ubinọkpaabyi osenga ma, otte bẹ ọbọhk, abẹ aninga k’isekh-isek kw’aPhilistiya k’icho arạbh afa.

2 Wa ujunung mạnna wạnọ kw’okpen Manoa, kw’ubin Zora, k’ẹkhạma ch’Dan, ọkhaam ikwanạng kw’ode ujidim nnwa nọ́mmaana. 3 Wa itọhmọ s’Ọvaar Ubinọkpaabyi iyini ikhebha ikwanạng nwọ, iben bẹ́, "Ọma ade ujidim, nnwa kákhaam. Okhenkha, ọma m’atima ifhạr, amaan ujunung-nwa. 4 Khenka songa bẹ́ atwuk mágwo tạrr oseng k’abhinga-twuk. Ọma uchiattọhk f’n’nọ́baana máchi. 5 Ọma m’atima ifhạr amaan ujunung-nnwa kw’ẹgọhbha jạnẹ-jạnẹ nạn khẹ k’echo mítwu mesese, ukwuru bẹ́, udikkobh nwọ m’ode ọNazirit,*13.5 k’eHiburu, ọnạng kw’nạn itwuk-kpọhkha k’nógwo, kw’ẹgọhbha jạnẹ-jạnẹ nạn isisira sẹ mesese mítwu, abẹ ayer-ẹ Nazirit. m’ode nnwa kw’abẹ atạm k’ẹfhạr atte ọbọhk anạng Ubinọkpaabyi. Ẹma wọ m’utima anạng eden, ọrạbha anạng p’Israẹl k’mbọhk s’Philistiya."

6 Wa ikwanạng nwọ ofon ọta okpaak udim kwẹ bẹ́, "Usi-ẹyaakaha kw’Ubinọkpaabyi uyini okhebh-m. Ẹma oyeni okher-m Itọhmọ s’Ubinọkpaabyi s’ipe-m ifor mạnna a. Amma khẹ ibyi s’ubin ukwu nạ́mbạbha, ẹma oyeni khaam eche chẹ nọ́bạra ọkpaakha. 7 Okhenkha oben-m bẹ́, "Ọma m’atima ifhạr amaan ujunung-nwa. Ma o, atwuk mágwo, tạrr oseng k’abhinga-twuk. Uchiattọhk f’n’nọ́baana mábạra achi, ukwuru bẹ́, udikkobh nwọ m’ode ọNazirit, m’ode nnwa kw’abẹ atạm k’ẹfhạr atte ọbọhk anạng Ubinọkpaabyi tạrr, ukpira k’ebowu chẹ.’ "

8 Ma wọ Manoa ose njọhm ọnạng Ọvaar Ubinọkpaabyi oben bẹ́: O Ọvaar Ubinọkpaabyi, se amma ọttọhmnạng kwọ ikwosi. Amma n’nchin-ọ-uchini bẹ́, atte ittọhmọ sọ kw’wara attọhmọ akkena mạna ọbọhk ibạra ikpa nnạm ikwu ọfha ọtọhn mạna oche kw’m’ansenga annạk udikkobh-nwa nwọ kw’m’ọmmaana."

9 Ubinọkpaabyi ọbhaang njọhm s’Manoa. Itọhmọ s’Ubinọkpaabyi iyin adạkhẹ ikhebha ikwanạng nwọ s’uning kha owonu; okhenka, wa udim kwẹ Manoa mạma kòde. 10 Ikwanạng nwọ ọrạbh ọta ọkpaak udim bẹ́, "Ujunung nwọ ttạng kw’iwu njọ uyini okhebh-m, kk’adạkhẹ ukwua e!"

11 Manoa ubina otor ikwanạng kwẹ nnạm. Masẹ ukwu okhebha ujunung nwọ, ọbạbh-ẹ bẹ́, "Ọma wọ ade ujunung kw’iwu njọ akpaakhẹ ikwanạng kwaam udik?"

Ubhina bẹ́, "Uwe e, amma wọ e."

12 Ma wọ Manoa ọbạbh-ẹ bẹ́, "Okpe kw’itọhnga sọ m’ikhaama ẹyaakha, bạng inyina jọ ch’udikkobh nwọ m’uruk akpen otor, ọbạra usi ọtọhm otor?"

13 Wa itọhmọ s’Ọvaar Ubinọkpaabyi ibhin bẹ́, "Oyonga ikwanạng kwọ m’usi idik sidede phyi-phyibh s’kk’ẹ mkpaakha bẹ́ usi. 14 Nọ́baana bẹ́ uchi fidede f’ubin k’grep, nọ́baana bẹ́ ogwo atwuk bạnọ-bạnọ, oseng k’abhinga-twuk, nọ́baana bẹ́ uchi unyina-ttọhk. Oyonga m’usi fidede f’kk’ẹ ntọhna bẹ́ usi."

15 Manoa oben itọhmọ s’Ọvaar Ubinọkpaabyi bẹ́, "Wạra ọdaakhẹ mạna bẹ́, ọma aninga mạna abẹ mama tạrr, ankkạng uvu-nwa annạng-ọ."

16 Itọhmọ nnọ s’Ọvaar Ubinọkpaabyi ibhin bẹ́, "Ọbạra avạkh-m achok ma, amma uchiattọhk vạnọ-vạnọ f’abạnga mạ́nchi. Khenka fọhnọ ẹja ẹkkạmachẹ nạng Ọvaar Ubinọkpaabyi." (Wa Manoa nútina bẹ́, itọhmọ s’Ọvaar Ubinọkpaabyi rọ.)

17 Wa Manoa ọbạbhọ itọhmọ s’Ọvaar Ubinọkpaabyi bẹ́, "Ọma akpen yạn o, ọfha annạng-ọ ikpukpobha k’okpe kw’ọtọhnga kwọ m’ọkhaama ẹyaakha k’udik-ọkka?"

18 Itọhmọ s’Ọvaar Ubinọkpaabyi ibhin bẹ́, "Asi yạn abạbh-m eche? Akwẹ khọ mọ́ttaanẹ e." 19 Ma wọ Manoa ọtạk uvu-nwa ọttạra k’ẹnạnga ch’agwu, utima ọfọhnọ ẹja k’ẹtakpa ẹrạng-ẹrạng ọnạng Ọvaar Ubinọkpaabyi. Mạnna wọ kw’Ọvaar Ubinọkpaabyi usi ikkkukkona-dik s’Manoa ọttạra ikwa ase. 20 Masẹ akpondaak ayạm k’ijabyi atena k’ẹrạng, itọhmọ s’Ọvaar Ubinọkpaabyi isenga k’akpondaak mbọ ifona. Masẹ Manoa ọttạra ikwa ase udik ngwa, abẹ atto akhubha utitikha fabẹ k’isisek. 21 Masẹ itọhmọ s’Ọvaar Ubinọkpaabyi nạn adạkhẹ níyina ikhebha Manoa ọttạra ikwa, mạma wọ Manoa n’utini bẹ́, itọhmọ s’Ọvaar Ubinọkpaabyi ẹrọ ma.

22 Manoa oben ikwa bẹ́, "Amạna kk’ampua e, amạna kk’Ubinọkpaabyi ansia e!"

23 Okhenkha, ikwanạng kwẹ ọpọhn bẹ́, "Ode wạra Ọvaar Ubinọkpaabyi ọkhạmọ bẹ́ ọfhọ mạna, wạra ẹnạnga ẹkkạmachẹ ọttạra k’ẹnạnga chamạna ch’agwu k’mbọhk samạna mọ́tạkha. Wạra mạna idik nna phyibh mọ́khọhkha, wạra mạna sẹ kpạ-kpaak mọ́kpaak bạra."

24 Ikwanạng nwọ wa ukwu ọmaan ujunung-nwa, ukpẹ-ẹ Samson. Wa nnwa nwọ ọbạrẹ, Ọvaar Ubinọkpaabyi udi-ẹ. 25 Wa Iguguma s’Ọvaar Ubinọkpaabyi s’ẹfa inwẹ-ẹ s’uning kha Mahane-dan, k’ngekha kw’Zora ọttạra Ẹshtaol.