Mateus 26

Yesu aongɔɔni ta Getesemani

36 Yesu aimea engbanga na batingami ba nde ta esika ɛbeaka bo Getesemani ko abala na bu boo: «Daani haa, mbai nasasui anaho tina ɛ ongɔɔnɔ.» 37 Atomba Piɛlɛ na bana baami babae ba Djebedai. Abanga ooka ndjokwa ko osatungea. 38 Abala na bu boo: «Molema ma mbai molumi na ndjokwa mbuti na ogwa; dikaani haa ko sɛndjɛlɛni engbanga na mbai.» 39 Asalinda oboso maa osinɛɛ, asadumba na mbanda ta kpɔtɔ ko aongɔɔnɔ boo: «Tata, okapala, dogedja kɔbɔ hee ɛ saya odii mbai. Endolo, titi opala ba mbai, endolo, elengɛɛ ɔpalaka wɛ.» 40 Bea asɔmbɔ odii batingami basato ko abatanea bahwɛli. Abala na Piɛlɛ boo: «Ohɔnitini osɛndjɛlɛ engbanga na mbai noko ehole emɔti? 41 Sɛndjɛlɛni ko ongɔɔnɔni bɛngɛ ɔdaeni pɛpɛ okwa ta lomeko. Mwembo modii na posa enɛnɛ ɛ okɔ opele, endolo mokuku modii na bwɛmbu.»

42 Asasua maa ohali mbala ɛ babae ko aongɔɔnɔ boo: «Tata, kɔbɔ hee ɛ saya emiti donga, nga ekadaa boo nayemwɛ, yɛɛ boo opala baa wɛ bakɔɔme!» 43 Asɔmbɔ koko odii batingami ba nde ko abatanea oko bahwɛli; tina ɛ boo miso ma hiɔ mabapea na ngulu. 44 Yesu abakina koko, asasua ko aongɔɔnɔ mbala ɛ basato ko asɔmbɛɛ oko bibaeli bia bimɔti. 45 Ngɔngɔ djia, asɔmbɔ koko odii batingami ba nde ko abala na bu boo: «Ohwɛlini oko ko ɔhemakani? Hadɛdi, ehole eimei tina ɛ okaba Mwana ɔ moto ta mabɔ ma bato ba masumu. 46 Emani, lakɛɛ! Hokeani, moto okabini odii bo adii haa!»