1 Emwɛn e Yeso Mãsia li éwi Nziã ndɛ me ndɔɔ yɛn ndɛ asuo asal a ndɛ mɛn ãbvaan ãsa ãya. Ndɛ osuo lɔ ŋ’eyuɔɔl ndɛ ãnzwel ã ndɛ ol’ɔ̃sal a ndɛ Dzaã. 2 Ndɛ wu Dzaã otsweel ndiri m’emwɛn ndɛ ãli Endɔɔ e Nziã bvool ãli otaa-taa b’eyɛɛl Yeso Mãsia ndɛ. 3 Esɛ ngamfɛn ola wu atsiɔ Ɔ̃nkaan a Nziã wu. Esɛ ngamfɛn hɛ̃ ola b’ayoo ãyɛɛn m’ãfi ola Nziã bvool asa m’akel onse Ɔ̃nkaan ondɛ. Ke ngwel wɛ, lio eyii tsotsoo.

4 Mɛ̃ wu Dzaã nkel ɔ̃nkaan wu m’ãbvɔɔn nsiaan mã k’etswi e nsie ki Adzi. Yɔɔl kwɛn Nziã wu oli, wu áli, bvool wu aya, andɔɔl byɛ kuɔɔl, awa byɛ opi, b’ofi ol’ɛ̃fel nsiaan mi ɛ̃li ke nkwel a kiri e ndɛ li okwɛn. 5 Ondɔɔl o kuɔɔl y’opi obɔ ofi hɛ̃ ola Yeso Mãsia, wu ɔ̃tsweel wa taa-taa, wu ásiool ɛ̃kwel onse b’ákwi-ákwi, bvool wu oli Mfam a akwɛn a nsie. Ndɛ wu odzii bia-byɛ, bvool opaal bia-byɛ onse ãbi m’ãkel ã ndɛ.

6 Ndɛ osi kwɛn bia-byɛ ekal baal b’okwɛn o Nziã, bvool osuul bia-byɛ angaa-a-Nziã me ndɔɔ yi esal me ndɔɔ a Nziã wu Tal a ndɛ. Yɔɔl kwɛn lweel y’omfam ekal bvi ndɛ ɔ̃bu! Amɛn! 7 Etal, ndɛ aya onse epɛn, bvool baal bueel akieel amwɛn ndɛ, onkyam b’átab ndɛ ebɛɛ. Ãyam ã nsie mbueel ãkieel ãkal me mpiri me ndɔɔ a ndɛ. Ngwanyã, amɛn! 8 Mfam Nziã olieel ndiri: «Mɛ̃ ndyam ndi Obɛɛn y’Osɛɛl, wu ɛ̃kwel ye wa ntɔ*1.8 Bakyɛ ati «Obɛɛn» y'«Osɛɛl» m'«Alefa» y'«Omega». Mɛ̃ ndi wu oli, wu áli, bvool wu aya. Mɛ̃ ndi Nziã-Nga-Waan.»

9 Mɛ̃ wu Dzaã, mɛ̃ ndi ndoo a byɛ. Mɛ̃ ndi bvoo ye byɛ onse ãmpal, onse Okwɛn o Nziã bvool y’osɛ-mwiĩ me bvoo a bia-byɛ ye Yeso. Mɛ̃ éli k’esanga ki ata me Patimos me ndɔɔ Endɔɔ e Nziã, y’otsweel b’ebetsweel mɛ̃ Yeso. 10 Me tsoo e Mfam, Ɔ̃fel osiin mɛ̃. Mɛ̃ bu ngyoo nkii yi kokɔ onge nkii a mvel-a-mvel ke mbee a mɛ̃. 11 Nkii oyɔ ékeyɛɛn ndiri: «M’emwɛn yɛ, kel mɔ̃ onse ɔ̃nkaan, yuɔɔl ndɛ ãbvɔɔn nsiaan mã: Efedze, Simiine, Pɛɛgame, Tiatiil, Saades, Filadelefi ye Lahodise.» 12 Mɛ̃ nkɔɔl ntal mbee, me ndɔɔ yi etal wu ákeyɛɛn ye mɛ̃. Ŋe nkɔɔl mɛ̃ ntal mbee, mɛ̃ mwɛn eluɔ nsiaan bvi abendɔɔl ambunda bvi ábuo me ɔɔl. 13 Mpɛɛ̃-a-mpɛɛ̃ eluɔ nsiaan bvi abendɔɔl ambunda obvɛ, éli ye wu áli m’emfa ki mbuul. Ndɛ álaal ɔ̃nkuru wu ɔ̃la, bvool álaal ɔ̃sii wa ɔɔl me luu. 14 Ɔ̃tswɛ ye mfu e ndɛ éli bvam fuu kɛɛn. Mviil ã ndɛ ã́kengal mam onge mbaa. 15 Ntaã e ndɛ ékenyɛɛn onge bvieel li ata me bolonze li alɔ onse mbaa yi kokɔ. Nkii a ndɛ ékesiaan onge epoo e nzal yi nɛn. 16 Onse kuɔɔl e ndɛ ki elam, éli y’anga-a-ngam nsiaan. Onse ɔ̃nywã a ndɛ, epwel ki ápɛɛl ékepal. Osu o ndɛ óli onge mwiĩ wu ata nzie. 17 Ŋ’emwɛn mɛ̃ ndɛ, mɛ̃ mvi ke ntaã e ndɛ onge mbuul wu okwi. Ndɛ bu andɔɔl mɛ̃ kuɔɔl e ndɛ ki elam y’ãyɛɛn m’ɔ̃nywã ndiri: «Bee buɔ obal! Mɛ̃ ndyam ndi mbuul wu ɛ̃kwel bvool wa ntɔ. 18 Mɛ̃ ndi wa mwiĩ hɛ̃. Mɛ̃ ékwii, kɛn a meba mɛ̃ nsiool ɔ̃bu, bvool mɛ̃ ndi y’okwɛn nkal epfu bvool nkal ola o b’ákwi-ákwi. 19 Oŋɔ̃ kel m’emwɛn yɛ, m’ãbebwel meba, ye m’ãkieel aya ke mbee. 20 Me b’otal otsɛn bo m’edziɔɔn b’angam-a-ngam nsiaan b’emwɛn yɛ onse kuɔɔl e mɛ̃ ki elam, ye b’eluɔ nsiaan bvi abendɔɔl ambunda bvi ási me ɔɔl, angam-a-ngam nsiaan ali ãnzwel m’ãbvɔɔn nsiaan, eluɔ nsiaan bvi abendɔɔl ambunda bvi ási me ɔɔl eli ãbvɔɔn nsiaan.»