1 Ŋ’eman Yeso ãndɔɔ mam mbueel oyɛɛn ye baal b’ákeyoo ndɛ, ndɛ oyɛn Kapelanahum. 2 Okɔ, éli ye mbiri a ambwel-mbwel ngɔmɔ̃ wa Lom. Ndɛ áli y’ɔ̃nkyal ngɔmɔ̃ wu ékedzii ndɛ bibi. Ɔ̃nkyal ondɛ áli y’ãluu mɛn emeesiil k’ambaal ampie. 3 Ŋ’eyoo mbiri a ambwel-mbwel ondɛ nsia a Yeso, ndɛ oyuɔɔl akuul-kuul b’Ayuda ke kwɛ, me ndɔɔ yi ayeluɔɔn Yeso kwɛn ndɛ ayebvuul ɔ̃nkyal a ndɛ. 4 Ŋ’etɔ bɔ ola Yeso, bɔ abvi ndɛ obuɛɛn bibi, bu ayɛɛn ndɛ bubu: «Mbuul wu obvaan kwɛn yɛ wuaal a ndɛ! 5 Ke ngwel wɛ, ndɛ odzii baal a bia-byɛ, bu atuu bia-byɛ nzɔ a ãbuɛɛn.» 6 Obobɔ, Yeso oyɛn ye bɔ.

Ŋ’etɔ bɔ tsotsoo a nzɔ, mbiri a ambwel-mbwel oyuɔɔl andoo a ndɛ ayeyɛɛn Yeso bubu: «Mfam, bee nzuru a yɛ yam mpal otuaal, mɛ̃ ke mvaan wɛ kwɛn yɛ sam onse nzɔ a mɛ̃. 7 Obɔ otsɛn bɛn, mɛ̃ emwɛn kwɛn mɛ̃ ke mvaan m’oya ola yɛ myam wɛ. Yɛɛn kɛn a ndɔɔ ngamɔ̃, ɔ̃nkyal a mɛ̃ olɔ obvuul! 8 Ke ngwel wɛ, mɛ̃ ebelweel amfam ba ke ywel a mɛ̃. Kɛn a mɛ̃ hɛ̃ ndi y’ambwel-mbwel ba ke nsɛn a mɛ̃ b’ayoo mɛ̃. Mɛ̃ ongyɛɛn ngɔmɔ̃ wɛn: "Yi!", ndɛ oyɛn. Mɛ̃ eyɛɛn wukyɛ wɛn: "Ya!", ndɛ hɛ̃ oyi. Bvool okɛɛn mɛ̃ ntam ɔ̃sal a mɛ̃ wɛn: "Sa bubu!", ndɛ hɛ̃ osi obobɔ.»

9 Ŋ’eyoo Yeso ãyɛɛn omɔ̃, ndɛ okam bam bibi, okɔɔl, bu ayɛɛn ye baal b’ákeluɛɛn a ndɛ bubu: «Mɛ̃ ngyɛɛn byɛ wɛn, onkyam ola baal b’Isalayel, mɛ̃ kɛn amwɛn okiool bo bubu wɛ!» 10 Ŋ’ebvool baal obɔ nzɔ a mbiri a ambwel-mbwel, bɔ ayebɔɔ ɔ̃nkyal o ndɛ oyii nzuru kɛɛ-kɛɛ.

11 Ke mbee oŋɔ̃, Yeso oyɛn ola b’ata me Nayin. Ayio a ndɛ y’embuul ki bibi ákeyi ye ndɛ. 12 Ŋ’etɔ ndɛ sua ɔ̃nywã wu ola, ndɛ omwɛɛn ye baal b’ákeyi ebiĩ odziool k’ãmpiɛɛn. Ɔ̃kaal wu ékwi muaan áli ɔ̃pfiil. Ndɛ áli kɛn a y’ensuu e muaan ngemɔ̃ olɔ li ékwi. Baal b’ola obɔ bibi ákeyi ndɛ osuul. 13 Ŋ’emwɛn Mfam Yeso ɔ̃kaal ondɛ, ndɛ nyiĩ a ndɛ ebɔɔ yam bibi, bu alieel ndɛ bubu: «Oŋɔ̃ wuun, bee obelel!»

14 Yeso osyel tsotsoo ebɛɛ*, okwaal lɔ. Baal b’ákebiri lɔ bu atɛɛn. Ndɛ bu ayɛɛn bubu: «Nsam a bɔɔl, mɛ̃ ngyɛɛn yɛ wɛn siool!» 15 Obobɔ, muaan wu ákwi obvi nsɛn, bvool obvi oyɛɛn. Yeso bu abveel ndɛ ola ngoo. 16 Baal bam bueel buɔ obɔɔ. Bɔ bu abvi Nziã olweel ndiri: «Ɔ̃liaal-ɛ̃kiɛɛn a Nziã ngɔmɔ̃ wu ɔ̃nɛn opal onse bia-byɛ! Nziã oyewuaal a baal a ndɛ!» 17 Nsia a Yeso etsɔɔn me nsie a Yude yam yueel, y’ãla mã nku-a-nku a yɔ.

18 Ayio a Dzaã awi ndɛ nsia a emvieel obvɛ bvam bvieel. Obobɔ, ndɛ oti buaal onse bɔ mbel, 19 bu atam bɔ ola Mfam Yeso, me ndɔɔ yi ayefuul ndɛ ndiri: «Ɔ̃mvuul wu ebekiaal bee yɛ, wuo mbuul ɔ̃kyam?» 20 Ŋ’etɔ bɔ ola Yeso, bɔ ayɛɛn ndɛ bubu: «Dzaã Batis otam bee ola yɛ, kwɛn bee efuul yɛ wɛn: "Ɔ̃mvuul wu ebekiaal bee, yɛ wuo wu àya, wuo mbuul ɔ̃kyam?"»

21 Kɛn a me lio alili olɔ, Yeso obvuul baal bibi b’áli y’ãluu, y’ãmpal m’emfa bwɛn emfa, bvool otswɛɛl ɛ̃fel mi ɛ̃bi-ɛ̃bi mi éli onse baal. Ndɛ hɛ̃ odzweel baal bɛn k’ákemwɛn wɛ mviil. 22 Ke mbee oŋɔ̃, Yeso obveel ayio a Dzaã bubu: «Eyeyɛɛn Dzaã ãndɔɔ m’emwɛn byɛ ye m’eyoo byɛ:

Baal b’ékwi mviil ayii amwɛn ngesɛ, baal b’adzuu tetɔɔ̃ abvi odzuu ngesɛ,

baal b’ali y’ãluu me leba abvi obvuul, ankɛn ayii ayoo,

baal b’ákwi ayii asiool, aywal hɛ̃ ayii ayoo Nsia yi Ngesɛ✝.

23 Esɛ ola mbuul wɛn k’ayɔɔl okiool o ndɛ me ndɔɔ a mɛ̃ wɛ!»

24 Ŋ’ekɔɔl ayio a Dzaã, Yeso obvi oyɛɛn ye baal b’áli oŋɔ̃ me ndɔɔ a ndɛ wu Dzaã. Ndɛ ofuul bɔ ndiri: «Wu eyetal byɛ nkal ɔ̃baan nã? Mbuul wɛn onge ɔ̃mbɛɛl wa tyob-tyob wu enziool mfel? 25 Okɛɛn k’obobɔ wɛ, byɛ nã eyetal? Mbuul ngɔmɔ̃ wu olaal ekɔ bvi ɔ̃bvɛn? Hɛɛ̃-hɛ̃! Ke ngwel wɛ, baal b’abelaal ekɔ bvi ɔ̃bvɛn, bvool b’ali y’opfel, bɔ abekal onse ãnzɔ m’akwɛn! 26 Wu eyetal byɛ nã? Ɔ̃liaal-ɛ̃kiɛɛn a Nziã? Hɛɛ̃, taa-taa! Mɛ̃ ngyɛɛn byɛ wɛn, ndɛ bam onduru ɔ̃liaal-ɛ̃kiɛɛn a Nziã! 27 Ke ngwel wɛ, Dzaã oli mbuul wɛn ákel onse Ɔ̃nkaan a Nziã me ndɔɔ a ndɛ ndiri:

"Tal, mɛ̃ èyuɔɔl ntam a mɛ̃ atsɔɔn nkwel a yɛ,

me ndɔɔ yi afaal yɛ ɔ̃siɔɔn✝."»

28 Yeso olweel bubu: «Mɛ̃ ngyɛɛn byɛ wɛn k’eli ye mbuul ngɔmɔ̃ wu áburu me nsie yi wu ánduru Dzaã wɛ. Kɛn a onse Okwɛn o Nziã meba ŋã, mbuul wu obvool mbee wu ondruru ndɛ.» 29 Baal bam bueel ye baal b’awal mpal ayoo ãtee ã Dzaã, bɔ akiool kwɛn Nziã oli dzu, bvool ayewal opongo o Dzaã. 30 Kɛn Afalisaye y’ayiool b’ãngel abee k’awal opongo o Dzaã. M’emfa okyɛ, bɔ abee ãndɔɔ m’ékedzii Nziã bɔ osa.

31 Yeso bvool olweel bubu: «Obobɔ, mɛ̃ baal ba nonɔ̃ ba y’anã emvɛɛl bɔ? Bɔ onge anã ali? 32 Tal! Bɔ ali onge baan b’abvi nsɛn ke taan me ndɔɔ yi asa ɛ̃taan, ayɛɛn bam-a-bam ndiri:

"Bee esio byɛ mpaa, byɛ k’ekɛn wɛ!

Bee eyam byɛ ãnziĩ m’ãwua, byɛ hɛ̃ k’elel wɛ!"

33 Ke ngwel wɛ, Dzaã oyewa baal opongo. Ndɛ obee k’adza, obee k’anywã, byɛ etɔ m’oliaal wɛn: "Ndɛ oli y’ɔ̃fel wu ɔ̃bi-ɔ̃bi!" 34 Muaan a mbuul oyi, adza, anywã, byɛ bvool etɔ m’oliaal wɛn: "Etal mbuul wu! Ndɛ ɔ̃sal kɛn odza, kɛn onywã! Ndɛ oli ndoo a baal b’awal mpal ye baal b’ãbi!" 35 Kɛn ãyal ã Nziã ãmɔɔn onse baal bam bueel b’akiool mɔ̃.»

36 Ɔ̃falisaye ngɔmɔ̃ oti Yeso mbel me ndɔɔ yi ayedza ola ndɛ. Yeso osam onse nzɔ a ndɛ, bvool owel mboo m’odza. 37 Ŋ’esa oŋɔ̃, onse ola obɔ éli y’ɔ̃kaal nga-ãbi ngɔmɔ̃. Ŋ’eyoo ndɛ ndiri Yeso obvi nsɛn ke misa onse nzɔ a Ɔ̃falisaye ondɛ, ndɛ owel ɔ̃langa ngɔmɔ̃ wu alebat wu aluul m’ãnasi. 38 Ndɛ oyetɛɛn ke mbee a Yeso, ke ntaã e ndɛ. Ndɛ alel, ãnsia ã ndɛ ãbuaal ntaã e Yeso. Ndɛ ayiaal yɔ me mfu e ndɛ, abuun yɔ bu apwɛɛ yɔ ãnasi omɔ̃. 39 Ŋ’emwɛn Ɔ̃falisaye wu áti Yeso mbel obobɔ, ndɛ oyɛɛn ndyam-a-ndyam onse ɔ̃kwal bubu: «Taa-taa bam, okɛɛn mbuul wu oli ɔ̃liaal-ɛ̃kiɛɛn a Nziã, ndɛ olɔ akaayɛɛ kwɛn ɔ̃kaal wu abekwaal ndɛ wu, oli ɔ̃kaal nga-ãbi!» 40 Obobɔ, Yeso olieel Ɔ̃falisaye bubu: «Simɔ̃, mɛ̃ ndi ye ndɔɔ yi eyɛɛn yɛ.» Ɔ̃falisaye obveel ndɛ ndiri: «Yɛɛn, Ɔ̃tee!»

41 Yeso olieel ndɛ ndiri: «Baal buaal áli y’ebiin e mbuul ngɔmɔ̃. Mbuul wu ɛ̃kwel ásuɔɔn nzi bibi, wa buaal ásuɔɔn ɔ̃bvɛn wuwu nsa kuun. 42 Onge bɛn bɔ k’ákekoo k’afuru ebiin e bɔ wɛ, ngaa-nzi ombaal bɔ bvɛ. M’ãtsam ã yɛ, onse mbaal obɔ ange-buaal, wu àdzii ndɛ bibi wɛn?» 43 Simɔ̃ obveel ndɛ ndiri: «M’ãtsam ã mɛ̃, olɔ ekal mbuul wu embaal ndɛ ebiin ki enduru olɔ.» Yeso oyɛɛn ndɛ ndiri: «Yɛ li y’ɔ̃dzoo.»

44 Obobɔ, Yeso okɔɔl ol’ɔ̃kaal ondɛ, bu alieel Simɔ̃ bubu: «Yɛ amwɛn ɔ̃kaal wu? Mɛ̃ nsam onse nzɔ a yɛ, yɛ ke wi mɛ̃ ãdza m’esuɔɔl ntaã wɛ. Kɛn a ndɛ, ndɛ obueel ntaã e mɛ̃ m’ãnsia ã ndɛ, bvool oyieel yɔ me mfu e ndɛ. 45 Yɛ ke buun mɛ̃ wɛ, ndɛ mbuul wɛn, mwɛn esam mɛ̃ ŋã, ndɛ k’ayɔɔl k’abuun ntaã e mɛ̃ wɛ. 46 Yɛ ke pwɛɛ mɛ̃ ãnasi m’ɔ̃tswɛ wɛ. Ndɛ mbuul wu pwɛɛ mɛ̃ mɔ̃ me ntaã. 47 Obɔ otsɛn bɛn, mɛ̃ eyɛɛn yɛ wɛn, okɛɛn ndɛ osuo dzii li enɛn li, me ndɔɔ yɛn adzeel boo-boo li ãbi ã ndɛ. Mbuul wɛn adzeel ãbi ã ndɛ kɛn etsi-tsiri, ndɛ asuo dzii hɛ̃ kɛn etsi-tsiri.» 48 Yeso bu ayɛɛn y’ɔ̃kaal ondɛ bubu: «Mɛ̃ ngyɛɛn wɛn adzeel ãbi ã yɛ!»

49 Baal b’abvi nsɛn ke misa ye ndɛ, abvi oyɛɛn bam-a-bam ndiri: «Mbuul wu nã ali, kwɛn ndɛ asa ãmbɛɛ̃ m’adzeel ãbi ã baal?» 50 Kɛn a Yeso olieel ɔ̃kaal ondɛ bubu: «Okiool o yɛ obvuul yɛ. Yi ngesɛ!»