1 Aipau cai tinggimgwame keda ngkiengsüt kecu ge tinggim gade nghung kela Ih ngau. Pecu hemwa ge gage kezui nah pe peu reu ga tangningnaria ge la. Pezu au tingnaimiak nzwa nah pe pi au mi tsiadung nzwa. 2 Pa peba ga laisiudum keceuna ge let pwakebam ge bam. Pa pe pi zetle jaaidi reu ga sap nah pe pi hile hangdeu reu ga sap. 3 Pecai pa hingho kemra nzwa sahbak gai. Pa sah gaige, tingceu henadung de mra eh keligai. 4 Tingceu kwa henadung de mra gaige, Ih rau kera teilu, dede Ih tinggim gade makwa ge siu, "Tingceu henadung kerang de ngkim nzeulu.* Cide rau so." 5 Pecai tinggimgwabe jaaidi reu ga nah kideu reu ga sap kebam Ih kengaube de pe ba zetle tinggim lam ge hwagai.✝ 6 Pa kelungta ringla kelabe, tinggim nah cika kebam leune, kideu nah cika kebam leune, jaaidi nah cika kebam leune, dam kegaibe zi gade sampet eh cu, "Tinggwang kekwa ting de cang dida.✝ 7 Dede tinggimgwabe pehenabe marang kegai tingdau, pa pe telui kwagai kera dau, cidau Tinggwang lungning kecok de pa pe kilame caihakecime dage samliakeyi rang kebeu nzwa teicang luzie.*" 8 Pecai tinggim gade Ih makwa kesiu de a dage rang dai eh cu: "Mie, tinggimgwabe jaaidi nah kideu reu ga sap kebambe ba gade laisiudum let pwa kebam keceuna de keulu." 9 Cine Ih tinggimgwabe da mie acu laisiudum keceuna de peu lo ranggai. Pa a dage rangdi, "Cide keulu delwe tyeilu. Cide nza tei kaa dizie, dede cide n mui gade au heliadui nzwa kum zie."✝ 10 Cine Ih tinggimgwabe ba gade laisiudum keceuna de keulu delwe cide tyeilu. Cide amui gade heliadui nzwa kum, dede Ih cide tyei luge, aza tei kaadi. 11 Ge tinggimgwame ge a dage rangdi, "Nang mina maadung, heleuhdung, heletdung, nah hegwangdung ha cairasam rangdai maisia da."