1 "Ephesus namdi ga kebam ngqwa samgwabe dage rau gailu: ‘Pe ba zetle hegi hena pwa kebambe nah kecak mitaubungbam hena kakga tet kebambe, aide rangzeu: 2 "Ih n batadung nah nang laikai tei eh heta tei kebam nah nang sünne eh lia kebam, nah mina kesia keteime de nang lia lula kemak cibam. Nang mi penuikatei penuide le langkegaime meliede, ciciu lie kelamedung de kedak pieda, nah nang penui kenretme kecu cilu da. 3 Nang n lung tie nah nang a zi ziemne keherei sütgai, ciciude nang leudi kemak Ih cibam. 4 Dede nang acu keku de gi kedi ziemne Ih ncu mmau la. 5 Cine nang dai gade kaudi bi kecu nsung lulo. Nlung nreulu delwe ndaa ketei tadung de teilu. Dede ciciu lu mecai, Ih nda gwang eh n mitaubungbam de pe bam gade keugi dizie—nang nlung nreulu mecai. 6 Dede nang au aide bam: Nang au Nicolaitanme batadung de ngkaula, Ih de cide ngkaula.✝ 7 Pekwen kebambe de peu Tinggwang Rabe ngqwamedung dage kerang de kingnei lulo. Ngkieng kelube de peu Tinggwang kereluini ga kebam kering tsingbang tsi de gade tyei kera Ih tei beuzie."’"✝

8 "Smyrna namdi ga kebam ngqwa samgwabe dage rau gailu:

‘Raitube nah Kamtube, tsai di eh ringdai kelube aide rangzeu:✝ 9 "Ih n reidung nah nang magah kebam cibam (dede nang au mahei), nah penuikatei penuide le pwane Jewme lie la, dede kemakme, meliene penui au satan ngqwame nnuide rangmsia kelade Ih ci bam. 10 Nang a ziemne keherei lai eh kebam de hing so. Ainie! Herakesiabe nnui kangge de kedak pie kerane hebaangki gage kelien gai laizeu, nah nnui ziangrei ge keherei zie. Ketsai kecangde masanglu, iciu de Ih ncu kering peurwa peuzie.✝ 11 Pekwen kebambe de peu Tinggwang Rabe ngqwamedung dage kerang de kingnei lulo. Ngkieng kelube de ketsai kenabe ne tei rezam dilak."’"

12 "Pergamum namdi ga kebam ngqwa samgwabe dage rau gailu:

‘Kiengtie pe mui lule ailam keteibe kebambe aide rangzeu: 13 "Ih nang lungh kebam ni de cibam, cide Satan hegwangbam kebam ga. Dede nang a zi de herak ntiprip pwabam nah Antipas a zierangbe, a kesamsangbe, Satan lungh kebam ga, nnui kakgade teitset kedi tingdau kecang de nang n kenlum ada kebam de mlaidi ma. 14 Dede madungge gade Ih ncu mmau bam: Nnui kakga mina kangge Balaam keledeu* de herak ntiprip eh kebamdung ge bam, pa Israelme namedung dwa gage mipi kensui ge kelien gai kera Balak de ledeu beu, iciu eh peu penuide mamie de reca beu kedi ketyeipuk tyei nah kemmha ta teilu kerane.✝ 15 Cinzwa eh nnui kakga mina kangge Nicolaitanme keledeu de herak ntiprip pwa kebamdung ge bam. 16 Cine, helungnreu lulo! Dede nang ciciu lu mecai, Ih nda zette gwang zie, delwe a mui gade kepet kingtie de le penuide renia zie.✝ 17 Pekwen kebambe de peu Tinggwang Rabe ngqwamedung dage kerang de kingnei lulo. Ngkieng kelube de, Ih manna hebai pwa kelade kesa peuzie, nah tangtsu keha reu gage hezi keheci ge raulwe Ih pecu peu zie, hezi cide ngau kelube ne gwale migede ci gailak."’"✝

18 "Thyatira namdi ga ngqwabe samgwabe dage rau gailu:

‘Tinggwang Nabe, pe miak miheu nzwa kebambe nah pe pi hetageu neu nzai pwa kebam nzwa kebambe ne aide rangzeu:✝ 19 "Ih n batadung, n keku, n masang, n ta nah nlung ketie de cibam. N bata keraibedung de swade cudau batadung be yiki. 20 Dede Ih aide ncu mmaula: Nang mipui Jezebel,✝ pekatei pecu le pwane caihakecibepui lie kelabe puide mzai la. Pe keledeu dene pa a kilamedung de cwa eh peu kemmha ta tei nah peu mamie de ratak teibeu kedi taktyei de tyei.✝ 21 Ih pecu helungnreulu kera ting pwa peu, dede pa pe mmha gade nreu neu tadi. 22 Ainie! Ih pecu keteeizeu gage kai dizie, nah pecu ngngwa eh kemmha ta keteime de peu kehereisüt zie, petadung gade penui helungnreulu meliecai. 23 Ih pe name de teitset dizie, nah ngqwadung pelane Ih milungning nah lungcetdung pie kelabe lie kecu ci luzie. Ih nnui hangge gede nnui batadung rehi gade peu zie.✝ 24 Dede nnui Thyatira ga kebam kedame, keledeu aide mzai la kemakmedung, nah Satan gu kengkim kecok lie eh kangge rang keladung de ci kemakme, Ih nnui dage rangla, ‘Ih nnui dage hepüt kerüt kedage de kaisi ma.’ 25 Dede Ih gwang kemaktane nnui herak pwa kebam de herakntip pwa bamlu.

26 Ngkieng kelube nah penli kecang a tadung tei jüja bam kelube de, Ih heleuhdung reu kengkieng teu kera pecu peu zie.

27 ‘Pa hegeutie ge teu penui reu di zie,

tangdei lidung nzwa eh, pa penuide tei pang kecai dizie.’✝

28 Ih a Pei dade ngau kelu nzwa, Ih de pecu hegi tingcangpui de pecu peu zie. 29 Pekwen kebambe de peu Tinggwang Rabe ngqwamedung dage kerang de kingnei lulo."’"