1 Pecai acu hetuitie, kemdet geutie kenzwa ge peu. Acu rangbeu, "Cuhlu delwe Tinggwang kerecaki nah recabam, nah cika reca kebamedung de mdet lulo.✝ 2 Dede kerecaki gwalebie kebam kigu de siso, nah cide mdet so, kedanemene cide Jewme kemakme de peudi delu. Penui kemci namdi de kei riakdaiekena ge pidau* teizie. 3 Nah Ih a zierangme kenade kengkieng peu zie, delwe penai tingbazie 1,260 ge rosopai bah eh caihakecisam rangzie." 4 Aikenade au olive bang kena nah kideu reu Rampaube dwa ga kesap mitaubungbam kena deda.✝ 5 Mina keheibe de penaide tei rezam kera tei cai, penai mui gade mi pet eh penai ngauraume de ngkap dizie. Mina keheibe de penaide tei rezam kera cet cai, pecu ainzwa eh teitset dizie.✝ 6 Penai tinggim ngkuilu kera kengkieng bam, ciciu eh penai caihakecisam kerang tingdau tingrui melu kerane. Penai duidung de hejai tei mmi dilu kera nah penai keheidau de keneu dau keherei ketsamtsam teu kideube de kedeu kera kengkieng bam. 7 Penai zierang teicang dide, penli kegah hekwa kecok gade kempet teikuu de penaide ngngwa regi zie. Pa penaide ngamlwe penaide teitset dizie.✝ 8 Namdi kedi puidi gage penai paaube kaizeu dizie (cide de Sodom nah Egypt lie qula) cikage penai Rampaube dede gwaktset. 9 Mina hepui, helet, nah heleuh leune gade tingba zie langcumne eh pepie ge penai paau de piezie, nah penai paau herau gage peu kai dilak. 10 Nah kideu ga lungh kebamme penai ziemne penui suiyi sützie nah renga dizie. Penui hangge ge de mapeu peuzie kedanemene caihakeci aipau kenade ne kideu ga kelunghme de tei kehereisüt kecu ziemne. 11 Dede langcumne eh pepie cai Tinggwang dade penai da keringcuingi lwetdi, nah penai cuhsap dailu, nah penaide kengaume ngngisüt di. 12 Pecai penui tinggim gade makwa ge sahbak eh penaide kerang siu, "Aika nghanglu!" Pecai penai ngauraume penaide pie eh kebam dau penai hemwa gade tinggim ga nghang di. 13 Cipau bamdakkak ga nnuih kedige teudi, nah namdibe zi kerei zige kaudi. Nnuih keteu gade mina cang hena de teitsetdi, nah bangkelumedung ngngisütdi nah tinggim ga kebam Tinggwang de kendu peu.✝

14 Nreikeiketei pekenabe gwang dida. Ainie! Nreikeiketei pekecumbe de kelwa gwang zeu.

15 Pecai tinggimgwabe pehenabe pe telui kwagai, nah tinggim gade makwadung sahbak eh rangdi,

"Kideu hegwangram de anui Rampaube nah pe Khrista hegwangram dida,

nah pa kelungta hegwang tei lamui dizie."

16 Pecai hangkiame ngkaiemdai, Tinggwang dwa ga penui hegwangbamdung ga kebamme, penui zu keumie Tinggwang de reca eh 17 rangdi,

"Ngkiengtube Rampaube Tinggwang, cude nah ndaa de kelabe, anui ncu twala,

kedanemene nang n kengkieng kedi de teulu eh hegwang tei cuh kedine.✝*

18 Nlum kemakme rata le pui dida,

dede n lunghop gwang dida,

nah ketsaime de tiak kera ting,

nah nang n kilame, caihakecimedung, nah kemcimedung,

nah n zi de rüt kelame,

kedime nah keceume de

ziehi peu kera ting gwang bam dida.

Nah kideu de ngkap kelamedung de ngkapti kera ting gwang bam dida."✝

19 Pecai Tinggwang kerecaki tinggim ga kebam de ngkeigai nah samkakbung de cika kebam Ih ngau. Cika tinghepik, tingceu kengyim, nnuihteu, nah tangheukei sütdi.✝