1 Pecai tinggimgwabe kering dui reuki de acu keulia, crystal nzwa mcigi. Cide Tinggwang nah Meurünna hegwangbam gade lwa mie 2 namdibe puidiki sum ga lwa hung. Hereukikung lule ailam kering tsingbang petsi ketsamtsam kereiekena bui eh hekei ramsang petsi bui beula. Tsingbang neidung de au heleuhdung de teimmi lu kerane.✝ 3 Nah cika reset kera magede bam silak. Tinggwang nah Meurünna hegwangbam namdi cika bam zie, nah pe kilamedung pe gwa tei zie.✝ 4 Penui pe zu ngau zie,* nah pe zi penui sipiedung ga la zie. 5 Cika tingmui bam si lakta, nah penui mitaubung mede tingnaimiak teu si lakta kedanemene Rampaube Tinggwang ne kebaabe dizie nah penui kelungta hegwang tei zie.

6 Pecai tinggimgwabe a dage rangdi, "Aipau samdung de au nlumlukebui sam nah kesang. Rampaube, caihakecime rabedung Tinggwang, pe kilame dage matei kelwa gwang kerabe keulia lo pe gwabe de langgai."✝

7 "Ainie! Ih kelwa gwang zie! Laisiukwak aika caihakecisam keladung de mzai kelume samlam pungtu."

8 Ih, John, ma aidungde siu nah kengaube da. Ih cidungde siu nah ngau luge, acu ma aidungde keu keliabe tinggimgwabe de reca zielie Ih pi ga keumie. 9 Dede pa a dage rangdi, "Cide tei so! Ih au nang nah n siname caihakecimedung, nah laisiukwak aika kela samdung de mzai kelamedung de ngngwa kila zangme gelu. Tinggwang de recalu!"

10 Pecai pa a dage rangdi, "Laisiukwak aika kela caihakeci samdung de ngkiem kang nzeu diso, kedanemene aidungde teigwang kera peting nnadi delu. 11 Peu kesia keteibe de, kesia tei bamdi. Keherabe de peu hera bamdi. Keyi keteime de peu keyi tei bamlu. Kemcime de peu mci bamlu." 12 "Ainie! Ih kelwa gwangla da, nah a ziehidung au a da la,* hangge ge kecude pe bata rehi gade ziehi pwapeu kerane.✝ 13 Ih au Alpha nah Omega, nah raitube nah kamtube, pebangdwabe nah penlibe. 14 Penui paini heta mcidi eh kering tsingbang gade petsi tyei nah namdibe riekidung gade lütlu kebui nzeu kebamme samlam pungtu.* 15 Hegwale bie kebamme au heteudung,* kerekame, kemmhame, mide dapketsetme, mamie kerecame nah nret eh pe suira tei kelame.

16 Ih, Jisu, ma aidungde teu ngqwamedung dage zierang tei kerane nnui dage a tinggimgwabe de langgai. Ih au David mah nah pe leuh, baaha kebam tingcang pui delie."✝

17 Nah Rabe nah lakciupui rang, "Gwanglu!" Cine siu kelume leune de peu, "Gwanglu!" de eh ranglo. Nah hereu kelame de peu gwanglu. Keringdui luu neu kelame de peu pemi tei mene luulu.✝

18 Ih caihakeci samdung kesiume leune dage zierang tei gaila: Keheibe de aidung gage kaisi cai, laisiukwak aide gage raupwa kela kehereidung de Tinggwang ne pecu kaibeu si zie.✝ 19 Nah keheibe de caihakeci sam laisiukwak aide gade keugi dicai, laisiukwak aide ga raupwa kela kering tsingbang nah kemci namdi gade Tinggwang ne pe qwa keugi dizie.*

20 Ma aidungde zierang tei kegaibe rangla, "Yeo! Ih kelwa gwangla da." Amen! Gwanglu, Rampau Jisu!

21 Rampaube Jisu ngaugia de peu kemcime da la kelube tei lulo. Amen.