1 Meurünnabe kaugiak pehenabe de let kegai dau, tinggim ga bamdakkak piege kenzwa ge zing de bamdi. 2 Pecai Ih tinggimgwame hang hena Tinggwang dwaga sap kebam ngau, nah telui hena penuide pwapeu.

3 Tinggimgwame kedage, marim kehengui kecak kwak ge pwalwe gwang marim kehengui recabam ga saplu. Marim kehengui kekiee ge pecu peugai ciciude pa kemcime pelane kekiedung si eh hegwangbam dwaga kebam marim kehengui kecak recabam gage reca gailu kerane.✝ 4 Marim kehengui mika de, kemcime kekiedung si eh tinggimgwabe ba gade Tinggwang dwaga cuhdi.✝ 5 Pecai tinggimgwabe marim kehengui kwak de pwalwe recabam gade cide mi le kai puilu. Pecai pa cide kideu gage kelien miegai, ge tingceu kengyim, tinghepik, nah nnuihteudi.✝

6 Pecai tinggimgwame hang hena telui hena pwa kebamdung de cidungde kwagai kera mteilu.

7 Tinggimgwabe keraibe pe telui kwagai, ge tangheu nah mi hejai ncütlu. Cide kideu gage kelien nghung gai, nah kideu zicum zi ge rudi, tsingbangdung zicum zi ge rudi, nah tsehei kemdiak pelane rudi.✝*

8 Pecai tinggimgwabe pekenabe pe telui kwagai, nah lamlwa kedi heu kebam kenzwage jaaidi gage kelien gai. Jaaidi zicum zi ge hejai mmi di,* 9 jaaidi ga lungh kebam kaunedung zicum zi ge tsaidi, nah liemdung zicum zi ge tei msiadi.

10 Pecai tinggimgwabe pekecumbe pe telui kwagai, ge tinggim gade hegi kedi ge, helei nzwa heu eh cak miedi, nah cide kereukidung nah duirwakdung zicum zi ge reu ga cak miedi.✝ 11 Hegi zi au Wormwood.* Dui zicum zi ge kaadi, nah mina kekiee ge dui kaa kedi de saklwe tsaidi.✝

12 Pecai tinggimgwabe pemdaibe pe telui kwagai, ge tingnaimiak zicum zi ge, nah hekei zicum zi ge, nah hegidung zicum zi ge de samdi, ciciu eh cidungde zicum zi ge muidi. Tingba zicum zi ge baa tadi, nah tingmui de cinzwadi.

13 Pecai Ih piegai ge, mipeu reule lim kela helie* ge sahbak eh kerang Ih siu, "Ainie, ainie, ainie, kideu ga lungh kebammedung da keherei gwang zieda, kedanemene tinggimgwame hangcum cude penui telui kwa kwagai laizeu reulu."