1 Pecai tinggim ga marehi tsamsüt kecu ge petdi: mipui ge tingnaimiak le pe paini tei, nah hekei le pe pidau tei, nah pe peu ga hegi kereiekena kebam peurwa gela. 2 Pa au tetlakla, nah pa hena tedteei teei eh hap bam, nah mna kera keherei eh bam. 3 Pecai tinggim ga marehi kedage petdi: Ainie, neidi kegie disüt kecu ge, pe peu hena nah pe kii kerei, nah pe peudung ga hegwangpeurwa gege la. 4 Nah pe mi tinggim ga hegidung zicum zige biak gidi eh kideu gage kelien nghung gaidi. Neidi de mna lai eh kebam mipui de dwa ga saplu, iciu eh pa mna lude, pa pe na de tuityei lu kerane. 5 Pecai pa mipei nage de mnalu, hegeutie teu heleuh pelane reu kedi tei kerabe de. Pe na de neidi de dade Tinggwang nah pe hegwangbam ga süt teu gwangdi, 6 nah mipui de hetaideu gage pak gaidi, cika pa Tinggwang ne heni mtei kebeu ge bam, ciciu eh pecu tingba zie 1,260 ge pe ma pielu kerane.

7 Cu tinggim ga hereu teidi. Michael nah pe samgwamedung neidi de ngngwa regi; ge neidi nah pe samgwamedung de ngngwa regi gwadi. 8 Neidi de de ngamlu, nah pa nah pe samgwame de peu tinggim ga bamsi tadi.✝ 9 Cine neidi kedi dede kelien ngkeidi—ndaa henei de,* herakesiabe nah Satan lie qu kelabe, kideu pelane de cwa kedibe de—pecu kideu gage kelien gaidi, nah pecu ngngwa pe samgwamedung dede kelien ngkeidi.✝ 10 Pecai tinggim gade makwa sahbak eh kerang Ih siu,

"Cu au kelikelu nah kengkieng,

nah anui Tinggwang hegwang,

nah Khrista kengkieng gwang bam dida.

Kedanemene anui sinamedung de mmau kelabe* de kelien nghungdi delu,

tingmui tingba anui Tinggwang dwa gade penuide mmau bam kelabe de.✝

11 Penui Meurünna jai nah penui zierang ketei sam gade pecu ngam luda,

kedanemene penui ketsai kecangde penui teilung hungdi kemakne.

12 Cine tinggimme nnui suiyi lulo,

nah cika lungh kebam pelane!

Dede ainie kideube nah jaaidi da keherei gwang zieda,

kedanemene herakesiabe nnuida nghungdi delu!

Pa au rata kehing le puipung bam

kedanemene pa peda peting kecamnage kebam ci kecune!" ✝

13 Neidi de pecu kideu gage kelien nghung kedi cilu ge, pa mipeina de mna kelube puide de gwazui miedi. 14 Dede mipui de helie kedi hesiu kena peu, iciu eh pe bam hetaideu gage limgwang gailu kerane, cika pecu mmi kecum eh pepie ge pema pie nah heneibe dwagade kwaklu kerane. 15 Henei pemui gade dui hereuki ge nzwa mipui de cai gage teilwa mpetgai, iciu eh pa pecu peu duikedi le diapung gidi lu kerane. 16 Dede kideube mipui de nghabeu. Kideube pemui ngkei lwe neidi pemui gade kereuki rui mpet kegai de mneu pwadi. 17 Cidau neidi de mipui de pe rata sütdi nah pe name kedamedung, Tinggwang sam kemzaime nah Jisu zierang keteimedung de ngngwa hereu tei kera tetdi. 18 Pecai neidi jaaidi kung heciang reu ga saplu. *